Herkeda kinè nara hèshèkèɗ. Kokwar kinè, vogwa a nʼndeda ma. Gi dau kinè, ndohi ngiɗè ta ndeda ma a sam di kinè. A nde na hèshèkèɗ, ara Sodome man a ngedas na.
Piɗèkwe ngaya, piɗèkwe ngaya, Jérusalem, slambaɗ ngaya, ka man ka sau kokwi ndzoan te ri Ndo nzi pèc pècèk; ka sau te kokwi man skwi ngiɗè te pa a nked ka, a ka sedama.
Wudahi ngaya ta zurdo dai a der kokwar, wuɗi ta azɓai, ara skwi te ɓalai. Ndzoan Ndo nzi pèc pècèk a nge-dassama ta may a te gèɗ, man Zhiklè ngaya a nguv ta.
A i gaɗa: Bi Zhiklè, ta ngèmè? A nengaʼa a ngaɗa: Ha kokwarhi ta nde ta a hèshèkèɗ, ndohi a te pa asaɓai, ndo a te gi asaɓai, a gi dau tèlèba a nʼnde na a hèshèkèɗ ma.
Ndohi gi David, Ndo nzi pèc pècèk a goɗ ar haha: Va-gu kita a prèk langa, va-mbela ndo man ndo ambaɓiaʼa a nga na wuɗai, auda te ri nengaʼa; man ɓai ndzoan ga a shkè auda ara vogwa, a da ndeda skwi a ma, ndo mʼmbècè azɓai, a géɗ maya kinè man ambaɓai.
Na haha iyè i njè ma haha, Ndo nzi pèc pècèk a gaɗa: I da helka ta a deɓa a kokwar haha, a ta gi var a kokwar haha. Ta da dumaʼa, a ta da fa na vogwa. Aman kokwarhi Juda, i da ndeda a kokwar ngedassaʼa, ko ndo staɗ a nzi a pa azɓai.
Wa ngiɗè ba ta da kèlèhi a deɓ sak Ndo nzi pèc pècèk, a ta jèkeda civèɗ tenga ambaɓiaʼa, staɗ staɗ tèlèba, a ta menkaɗa deɓa. Aman Ndo nzi pèc pècèk a gi ndav kumba, a ndzoan man a guv ta ndohi haha a vna.
Va-tila ndav kinè a sam Ndo nzi pèc pècèk, kinè ndohi Juda a ndohi te Jérusalem, man ɓai ndzoan a slèmbèɗè ara vogwa, a ndo a mbècè azɓai, a géɗ mali kinè.
Zhiklè bi mbiaʼa, Zhiklè Israel, a goɗ ar haha. Lèmèlèmè ara man i gau ndzoan mwuɗitpa a géɗ ndohi Jérusalem, lèmèlèmè i da gi shèwa a géɗ kinè, aman kin dè a kokwar Egypte, a kin da gedas kinè. Kin da lèyè, kin phomda, kinè skwi horai, a kin da rka sam haha asaɓai.
Anai, Ndo nzi pèc pècèk a woya a nrka maya kinè man ambaɓai, a skwi hori man kin giaʼa, asaɓai. A géɗ nengaʼa kokwar nga ngedas na, a lèyè, mphomda, ndo a nzi a pa azɓai, ara man a zhè a patsna.
Gar haha Bi Zhiklè Ndo nzi pèc pècèk a goɗ ar haha: I gi ndzoan ga mbiaʼa a géɗ sam haha, a géɗ ndohai, a géɗ skwi kuɗom, a géɗ wof te dak, a géɗ skwi man a ftskaɗauda tʼher-keɗa, ndzoan worworaʼa man a mbècè azɓai.
Wobau! Ani kokwar a gi mbelawa, man halaʼa ndohi kumba te pa! A nʼnde na dikai, man halaʼa mbiaʼa te ndev kokwar bihai. Halaʼa, mba nengaʼa a géɗ kokwar; antanta bèlè.
I da helka kinè auda te ndev ndohi kokwar, i da ɓic kinè a deɓa te ndev kokwar man i ksar kinè a pa, a ri man wuɗi na zhè, a ri ngedaʼa, a ndzoan man i ga kinè.
Gar haha i ba i woy a i ga ta skwi a ndav. I da pi di mwoy-ndo azɓai, ta siyè te va azɓai. Ta da kuɗi a vata a zlembaɗ ga, aman i da cinè ma tengaʼa azɓai.
Ndo nzi pèc pècèk a ngau ara man a goɗ a gèɗ nga, a gèɗ ndohi kita man ta bazla nga kita, a ngu arsa a vava, a nzlündo skwi mwuɗitpa mbiaʼa a gèɗ nga, skwi man a gu te Jérusalem tar sa ɓai a gèɗ herkeda.
Aman ma ga, a skwi man i basla na gèɗ a va a i gaɗa ta ndohi mizlinè ga, ndohi nhadka ma, nʼnga ta babhi kinè ɓi ɗè? A ta menkaɗa deɓa a ta gaɗa: Skwi man Zhiklè bi mbiaʼa a nhur a da ga nga, ara civèɗ nga, ara mizlinè nga, nʼnga nga arsa a vava.
A i ksar ta te ndev ndohi herkeda man ta sun ɓai, a herkeda a nʼnde na hèshèkèɗ te deɓ tengaʼa, ndo a shèwèlè te pa azɓai. Ta ngwoda herkeda mbelaʼa aranta a hèshèkèɗ.