15 Gar haha Zhiklè bi mbiaʼa a goɗ a géɗ ndohi nhadka ma: Iyè i da va ta skwi nsi mwuɗitpa, i da va ta iyam man dèrè te pa. Aman ma nʼngwèɗè ndo te kokwar tèlèba a shkè auda te ndohi nhadka ma te Jérusalem.
Gar haha Ndo nzi pèc pècèk a goɗ ar haha a géɗ ndohi nhadka ma, man ta hodko ma a nzlembaɗ ga, man i zlinde ta ɓai, a ta gaɗa: tsakwal a mai a gi a kokwar haha azɓai. Ndohi nhadka ma haha sèi da bazl ta a tsakwal, da teɗ ta a mai!
Nga nza ɓlussaʼa kè! Ngo-hokoya, a kokwar nʼngalaʼa, a nga zi nga a pa! Te man Ndo nzi pèc pècèk, Zhiklè nga, a zede nga, a va nga iyam dèrè a nga siaʼa, a géɗ man nga gu mali a sam na.
A da gi a pats nasa, a i gedassa nzlembaɗ vrihai te kokwar, a ta hér ta asaɓai. Ndohi nhadka ma, a mèzhèɓ ambaɓiaʼa ba, i dzam ta te kokwar, Zhiklè bi mbiaʼa a gaɗa.
Te ndev kinè, ko nguraʼa, ko ngwoz, ko ndohi gai, ko gwol ngwai, da jèkeda Ndo nzi pèc pècèk, Zhiklè nga, a patsna ɓai a nda tsi ri a zhiklèhi mbèh skwi ndohi herkeda sa. Zluzlor man dèrè te pa, a dèrvowa, i woya a sam kinè ɓai.
Nzlembaɗ bantiaʼa, dèrvowa. A iyam, man ta kezla makar, a nʼngwode na a dèrvowa, a ndohi kumba ta bazl ta, a géɗ man ta su iyam sa, iyam nɗuzlekzlekaʼa.