Aman ta tsu tolom a ta slu dimèsh, a cinè ara daʼai ndo staɗ, a nslébèr-dè a nʼnjèl Ndo nzi pèc pècèk. Aman ta hüno ntsi tolom, a ta tsi ganzavar a tèzlèzlèu a ta fu dimèsh nshid gèɗ a Ndo nzi pèc pècèk: aman nengaʼa amba, a pombi nengaʼa a nzi a mèdèp; vani nʼndha te gi Zhiklè.
Aman ta dè, kelpasl tengaʼa a hèzlèwè, ara iyam mbiaʼa, ara daʼai Bi Zhiklè man a gèɗè, ara nhèzlèwè ndohi var. Aman ta zlatsa tʼhai, ta pizla kelpasl ta;
Gi Zhiklè, gi tʼhwaɗaʼa, a hwaɗ gala tʼuda a sam nʼngalaʼa, a ntatak gai, a nvakavar, a civèɗ nʼngalaʼa makar man ta tèuda a pa, mbè te pa a wof, tèlèba.
Te deɓaʼa a ndiyè a ntamagi te civèɗ man a géɗèʼa, a ma gi Zhiklè. Aman i pu dai, na haha nʼnjèl Ndo nzi pèc pècèk a nʼndha gi Zhiklè. A i kalahi a deɓ sak nengaʼa.
A i rka Bi Zhiklè a nzlatsa a géɗ sam mvi skwi a Zhiklè, a ngaɗa: Tsau sak gai, a sam man ndohi ta mbècè a pa a gudzai! Batsama ta gèɗ a vna, a njè-kèɗiaʼa i woy a i bazl ta tèlèba a tsakwal. Ko staɗ te ndev tengaʼa da mbel na ɓai! A ndo man a hi na a mbélè auda azɓai.
A ta wina gi Bi Zhiklè te zhiklè, a koti nderzlè-ma nengaʼa a rkè te gi Zhiklè, a iyam a nʼndi dai, a iyam a ntsai, a herkeda a ngudzai, a vandzal a nshkè.
