Yuuba 36:4 - Mandinka Bible

⁴ Tooñaa-tooñaa, m fokumoolu maŋ ke faniyaa kuma ti, aduŋ i ñaa be moo le la teŋ meŋ na londoo koyita fer.

Yuuba 36:4 ပူးပေါင်းရင်းမြစ်များ

Yuuba 37:16

I ye a loŋ ne baŋ, saŋ tawaloolu be yaara kaŋ ñaameŋ? Wo mu Alla la kaawakuwo doo le ti, ate meŋ na londoo koyita fer.

1 Korintinkoolu 14:20

Baadiŋolu, ali kana ke dindiŋolu ti ali la miiroolu to. Ali ke deenaanoolu ti kuu jawoo la kuwo to, bari ali si ke moo mendiŋolu ti ali la miiroolu to.

Kolosankoolu 4:12

Epafaras meŋ mu ali faŋolu la moo ti, aniŋ Kiristu Yeesu la dookuulaa, be ali kontoŋ na. A ka tu duwaa la ali ye le doroŋ a sondomoo bee la, fo ali si meŋ ka yiriwaa ali la lannoo kono, aniŋ ali si dankeneyaa kendeke Alla la lafoo bee to.

2 Korintinkoolu 2:17

A keta ñaa-wo-ñaa, ntolu buka Alla la kumoo ke safaarilaŋo ti ko moo jamaa ka a ke ñaameŋ. Ǹ ka Alla la kumoo kawandi a ñaatiliŋo le la ko moo soobeeyaariŋo ñanta a ke la Kiristu too la ñaameŋ.

Kiilaalu 24:22

Bari Felis, meŋ ye kuu jamaa loŋ ñiŋ siloo la kuwo to, a ye kiitiyo sawundi. A ko ì ye ko, “Niŋ kelediŋ kuntii baa Lisiyas naata le, m be ali la kuwo kiitindi la.”

Luka 1:3

Wo le ye a tinna, n na Alifaa baa Tewofilus, a beteyaata nte fee le fanaa ka ñiŋ kuwolu kiliŋ-kiliŋ naa safee i ye, ŋa mennu kisikisi biriŋ foloodulaa to,

Jabuuroolu 49:3

N na kumoolu be ñaameŋo le dii la, aduŋ n na miiroolu niŋ fahaamuroo le mu.

Yuuba 33:3

M fokumoolu be ke la kuma tilindiŋo le ti, aduŋ ŋa meŋ loŋ, n neŋo ka loo wo le kaŋ tooñaa siloo la.

Yuuba 21:34

Alitolu si nte jusoo sumayandi noo ñaadii le ali niŋ ali la kuma kenseŋolu? Feŋ maŋ tara ali la jaabiroolu kono fo faniyaa!

Yuuba 21:27

Ŋa ali la miiroolu loŋ ne saayiŋ, aniŋ ali la feeroolu ka n tiñaa.

Yuuba 13:7

Ali si faniyaa kumoo fo noo Alla too la baŋ, ali ye neeneeri kumoo fo a tooyaa la?

Yuuba 13:4

Alitolu ye ali la lombaliyaa dendendi faniyaa kumoolu le la. Ali ye ali faŋ ke jaaralilaa ti, ali te hani moo jaara noo la.

Yuuba 6:28

Saayiŋ, ali ke moo kendoo ti baŋ, ali ye n juubee naŋ. Nte te faniyaa fo la ali ñaatiliŋo la.