Yuuba 22:13 - Mandinka Bible

¹³ Fo wo le ye a tinna baŋ i kumata ko, “Alla ye muŋ ne loŋ? A si kiitindiroo noo ñaadii le minaayi dibiŋolu kono,

Yuuba 22:13 ပူးပေါင်းရင်းမြစ်များ

Esekiyeli 8:12

Wo to le a ko n ye ko, “Hadamadiŋo, i ye a je le Banisirayila alifaalu be meŋ ke kaŋ kulloo kono baŋ? Ì bee ye jalaŋolu le soto ì la buŋolu kono. Ì ka ñiŋ ne fo ko, ‘Yaawe buka ǹ je, kaatu a ye a daa bondi ǹ na bankoo la kuwo to le.’ ”

Jabuuroolu 10:11

A ka ñiŋ ne fo a faŋ ma ko, “Alla daa te n na kuu to. A ye a ñaa kaasi n na le. A nene te n je la.”

Jabuuroolu 73:11

Ì ye ñiŋ ne muta ko Alla te a loŋ na, ko Mansa Tallaa te wo loŋ noo la.

Esekiyeli 9:9

Wo to le, a ye n jaabi ko, “Banisirayilankoolu niŋ Yahuuda moolu la kuruŋyaa landatambita le. Ì ye ì la bankoo kaŋ bee fandi niŋ moofaa niŋ tilimbaliyaa kuwolu le la. Ì ka naa a fo ko, ‘Yaawe ye a daa bondi ǹ na bankoo la kuwo to le, a buka ǹ je.’

Yesaya 29:15

Kooroo be moolu le ye mennu ye a kata baake, ka ì la yaamaroolu maabo Yaawe ma. Ì ka ì la kebaaroolu ke diboo kono, ì ka a fo ko, “Jumaa le ka ǹ je? Jumaa le be a loŋ na, ǹ ka meŋ ke?”

Jabuuroolu 59:7

A juubee, ì daa ka kumakaŋolu mennu feenee. Ì daakumoo ka munta le ko muroo, aduŋ ì ka a fo le ko, “Jumaa le be m̀ moyi noo la?”

Jabuuroolu 64:5

Ì ka ñoo saayindi kuu jawu kewo la le, ì ka kuma ñoo ye le ì be ì la kutindiŋolu kullootoo laa la ñaameŋ. Ì ka a fo ì faŋ ma le ko, “Jumaa le si ǹ je noo?”

Sefaniya 1:12

Wo waatoo la, m be tara la Yerusalaamu ñini la niŋ lampu maloo le la. M be moolu jarabi la le, mennu be laariŋ ì faŋ na ko, ì la kuwolu be beteyaariŋ ne. Ì ka ñiŋ miira ko, Yaawe te kuu ke la, a jawumaa to baŋ, waraŋ fo a betemaa to.

Jabuuroolu 139:11

Hani niŋ n ko diboo le ye m muuri, waraŋ m be maloo meŋ kono, a ye ke suutoo ti,

Yeremiya 23:24

“Fo moo si a faŋ maabo noo kulloo kono dulaalu to, ñiŋ kamma la n kana a je?” Yaawe le ye a fo. “Fo m maŋ saŋo niŋ bankoo faa tep?” Yaawe le ye a fo.

Yuuba 34:22

Wo dibi te keriŋ, meŋ si junubelaa maabo noo Alla ma.

Jabuuroolu 139:7

N si taa noo mintoo le ka kana i ma? N si bori noo mintoo le i te daameŋ?

Amosi 9:2

Hani niŋ ì ye dinkoo le siŋ fo laakira, n si ì fintindi naŋ a kono. Hani niŋ ì seleta le fo saŋ fatoo to, n si ì jindi naŋ duuma.

Amosi 9:3

Hani niŋ ì taata maabo Karimeli Konkoo le santo, n si ì ñini ka ì fintindi naŋ jee, aduŋ hani niŋ ì maabota m ma fankaasoo duuma le, n si jiikono saa yaamari, a ye ì kiŋ.