Yesaya 9:12 - Mandinka Bible

¹² Aramunkoolu mennu bota tilibo maafaŋo la, Filisitinkoolu mennu bota tilijii maafaŋo la, ì ye Banisirayila tiñaa le ka a kasaara. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.

Yesaya 9:12 ပူးပေါင်းရင်းမြစ်များ

Yesaya 5:25

Wo le ye a tinna Yaawe kamfaata a la moolu kamma, a ye a buloo wulindi ka ì mantoora. Konkoolu jiijaata, moo furewolu keta ko fayifeŋolu, mbeedoolu kaŋ. Ñiŋ bee koolaa, a la kamfaa maŋ jii, a buloo be teekariŋ ne ka ì mantoora.

2 Taarika 28:18

Wo waati kiliŋo la, Filisitinkoolu fanaa ñapita Sefela* konkotundoo* niŋ Nekefu* tundoo kaŋ Yahuuda. Ì ye ñiŋ saatewolu le taa: Beti-Semesi, Ayaloni, Kederoti, Soko niŋ a dandanna saateeriŋolu, Timuna niŋ a dandanna saateeriŋolu, aniŋ Kimuso niŋ a dandanna saateeriŋolu, ì naata sabati jee.

Jabuuroolu 79:7

Kaatu ì ye Yaakuba koomoo kasaara le, ì ye ǹ na bankoo tumbuŋ.

2 Mansoolu 16:6

Wo waatoo le mu Edomu mansa ye Elati saatewo seyinkaŋ muta Edomu bankoo ye, aduŋ a ye Yahuuda moolu bayi, mennu tarata siiriŋ jee. Wo le to Edomunkoolu siita Elati saatewo to, aduŋ ì tarata sabatiriŋ jee le ka naa bula bii la.

Yeremiya 10:25

I la kamfaa jindi banku koteŋ moolu kaŋ, mennu maŋ i loŋ, siyolu kaŋ, mennu buka i batu, kaatu ì ye Yaakuba koomoo kasaara le, ì ye a kasaara le ka a baŋ fereŋ, ì ye ǹ na bankoo tumbuŋ.

Yesaya 10:4

Feŋ te tu la ali ye, fo ka tara motomotoriŋ mutamoolu kono, waraŋ ali ye tara moo faariŋolu kono. Ñiŋ bee koolaa, Yaawe* la kamfaa maŋ jii, a buloo be teekariŋ ne ka ali mantoora.

Yesaya 9:21

Manase ye Efurayimu kele, Efurayimu fanaa ye Manase kele, bituŋ ì naata wuli Yahuuda kamma ñoo la. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.

Yesaya 9:17

Wo le ye a tinna Yaawe maŋ kontaani ì la fondinkewolu la kuwo la, waraŋ ka balafaa ì la aliyatiimoolu ye, aniŋ furuyaamusoolu. Kaatu ì bee ye ì koo dii Alla la le, aduŋ kuu kuruŋ kelaalu le mu ì ti, ì bee ka kuma jawoo le fo. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.

Yeremiya 35:11

Bari biriŋ Babiloni mansakewo Nebukanesa naata ñiŋ bankoo boyinkaŋ, ǹ naata a fo ñoo ye ko, ‘Ali ŋà taa Yerusalaamu, Babiloni kelediŋolu la kuwo silaŋo kamma la, aniŋ Aramu kelediŋolu la kuwo.’ Ǹ naata sabati Yerusalaamu teŋ ne.”

Yeremiya 4:8

Wo kamma la ali booto funtoolu duŋ niikuyaa kamma, ali ye kumboo ka wuuri, kaatu Yaawe la kamfaa baa maŋ bo ǹ kaŋ.

5 Musa 31:17

Wo luŋo la, m be kamfaajawu la ì kamma le. M be n koo dii la ì la le, ŋa maabo ì ma, ì ye kasaara. Toora kuu jamaa si laa ì kaŋ, aniŋ kuu jawu jamaa. Wo luŋo le mu ì be a fo la ko, ‘Ñiŋ kuu jawoolu bee laata ǹ kaŋ, kaatu ǹ na Alla maŋ tara m̀ fee.’

Yesaya 11:14

Ì be Filisitinkoolu boyinkaŋ na ñoo la tilijii karoo la le, ì ye tilibolankoolu fanaa ñapinkaŋ. Ì si ì buloo laa Edomu niŋ Mowabi kaŋ, Ammoninkoolu ye soŋ ì ma.

Esekiyeli 6:14

“M buloo be laa la ì kaŋ ne, ŋa ì la bankoo kenseŋyandi, a ye ke tumbuŋo ti, ka bo keñewuloo*, bulubaa karoo la, ka taa fo Ribula saatewo to, maraa karoo la. Niŋ wo keta le, ì be a loŋ na ko, nte le mu Yaawe ti.”

Esekiyeli 16:27

“Wo to m fanaa be mantooroo laa la i kaŋ ne, ka i la bankoo dulaa doolu buusi i la, ka i duŋ i jawoolu Filisitinkoolu bulu, hani i la ñiŋ malubaliyaa maañaa ka mennu faŋolu malu.

Yesaya 31:1

Kooroo be boyi la moolu kaŋ ne, mennu ka taa maakoyiroo ñini Misira. Ì ka tara jikiriŋ wolu la suwoolu le la, aniŋ ka taamaayaa wolu la keleraŋ sareeti* jurumoolu la, aniŋ ì la suuborindilaa sembemaa baalu. Bari ì buka ì ñaa loo Banisirayila la Senuŋ Baa kaŋ, waraŋ ka maakoyiroo ñini Yaawe* bulu.

Yeremiya 15:7

Ŋa Yahuuda moolu fee n na feerilaŋo le la, saatee dundaŋ daalu to bankoo kaŋ taariŋ. Ŋa bonoo niitooroo, aniŋ kasaaroo le boyi n na moolu kaŋ, kaatu ì maŋ bo ì la sila kuruŋolu kaŋ.

Hoseya 7:10

Banisirayila la faŋ waroo le keta a faŋo seedoo ti. A be bataa kono ñaa-wo-ñaa, a maŋ muru Yaawe kaŋ, a la Alla, sako ka a la maakoyiroo ñini.

Amosi 4:6

Yaawe ye ñiŋ ne fo ko, “Nte le ye konkoo duŋ ali la saatee baalu niŋ saateeriŋolu kono, fo ali kana feŋ soto ali be meŋ domo la. Bari hani wo bee, ali maŋ soŋ muru la n kaŋ.

Amosi 4:8

Moolu timili-tamalita saatee niŋ saatee teema jiiñinoo la, bari ì buka jiyo soto ka i miŋ ì sawoo la. Bari hani wo bee, ali maŋ soŋ muru la n kaŋ.” Yaawe le ye a fo.

Amosi 4:9

“Ŋa ali la siimaŋ feŋolu kuurandi ka toli aniŋ ka jaa. Kuntiŋolu ye ali la naakito feŋolu kasaara, aniŋ ali la wayini* yiri kankaŋolu, sooto yiroolu aniŋ olifu* yiroolu. Bari hani wo bee, ali maŋ soŋ muru la n kaŋ.” Yaawe le ye a fo.

Amosi 4:10

“Ŋa alibalaa kuuraŋo jindi ali kaŋ, ko ŋa a jindi Misirankoolu kaŋ ñaameŋ. Ŋa ali la fondinkewolu faa niŋ hawusaroo* la, ŋa ali la suwoolu duŋ mutoo kono. Ŋa ali nuŋ huwolu fandi furewolu nooroo la ali la daakaalu to. Hani wo bee, ali maŋ soŋ muru la n kaŋ.” Yaawe le ye a fo.

Amosi 4:11

“Ŋa kasaaroo tiliŋ ali la, ko ŋa Sodomu niŋ Komora kasaara ñaameŋ. Moolu mennu kanata ali kono, ì la kuwo keta le komeŋ niŋ i ye taalamaa kuntoo wafu naŋ dimbaa kono. Bari hani wo bee, ali maŋ soŋ muru la n kaŋ.” Yaawe le ye a fo.

Sefaniya 1:6

Moo-wo-moo ye a koo dii nte Yaawe la, m be a kasaara la le, aniŋ mennu buka ì daa ke n na kuu to, sako ka n na yaamaroo ñini.”

Sefaniya 3:2

Saatewo meŋ, a buka yaamari muta, dandalaaroo, a buka wo moyi, a maŋ a jikoo loo Yaawe* kaŋ, a maŋ soŋ ka a ñaa tiliŋ Alla la.