Yesaya 66:23 - Mandinka Bible

²³ A ko; “Kari Kuta-wo-Kari Kuta* aniŋ Loobula Luŋ-wo-Loobula Luŋ, hadamadiŋolu bee be naa sujudi la n ñaatiliŋo la le.

Yesaya 66:23 ပူးပေါင်းရင်းမြစ်များ

Esekiyeli 46:1

Maarii Yaawe ye ñiŋ ne fo ko: “Konoto luwo dundaŋ daa, meŋ ñaa be tilindiŋ tiliboo la, a ñanta soroŋ na le ka bo lookuŋo tili foloo la ka taa fo a tili wooronjaŋo la. Bari tili woorowulanjaŋo la, meŋ mu Loobula Luŋo ti, a ñanta yele la le. Kari Kuta Juurali* luŋo fanaa, a ñanta yele la le.

Jakariya 14:16

Bankoolu mennu boyita Yerusalaamu kaŋ, a moolu mennu bee tuta baluwo to, be taa le saŋ-wo-saŋ ka Yaawe batu, Mansa baa Alihawaa Maariyo*, aniŋ ka Jembereŋ Juuraloo* kidimandi.

Esekiyeli 46:6

Ì ka Kari Kuta Juuraloo ke luŋo meŋ na, mansa la sadaa be ke la tuuraariŋo le ti ka bo koorewo kono, aniŋ saakotondiŋ wooro, aniŋ saakotoŋ baa kiliŋ, mennu bee maŋ sootaari soto.

Jabuuroolu 86:9

Maariyo, ite le ye duniyaa moolu bee daa. Ì be naa le, ì ye sujudi i ye, aduŋ ì be i too horoma la le,

Lankenemoo 15:4

Maariyo, jumaa le te sila la ite la, jumaa le te i too horoma la? Ite le dammaa seneyaata. Nasiyoŋolu bee be naa ite batu la le, kaatu i la baara kuu tilindiŋolu lankenemata le.”

Yohana 4:23

Bari waatoo be naa kaŋ ne, aduŋ a siita le fokabaŋ, waatoo meŋ na baturilaa tooñaalu be Faamaa batu la nooroo niŋ tooñaa le kono. Ñiŋ ñoŋ baturilaalu, Faamaa lafita wolu le la.

Malaki 1:11

Nte too be warariŋ bankoolu kaŋ ne, ka bo tilibo ka taa tilijii, aduŋ daa-wo-daa seerandi feŋolu le ka siisindi n tooyaa la jee, aniŋ sadaa kendoolu, kaatu n too warata bankoolu kaŋ ne.” Yaawe Alihawaa Maariyo le ye a fo.

Jakariya 14:14

Hani Yahuuda faŋo be duŋ na keloo to Yerusalaamu le. Ì be ì dandanna bankoolu la fankoo kafu la ñoo ma le, meŋ be ko sanoo, kodiforoo aniŋ sitifeŋolu, ì jamaa baa.

Jabuuroolu 65:2

Moolu bee be naa ite le kaŋ, kaatu ite le ka duwaa jaabi.

2 Mansoolu 4:23

A keemaa ko a ye ko, “Muŋ daliila le be i samba la a yaa, bii maŋ ke Kari Kuta Juuraloo* waraŋ Loobula Luŋo ti.” A ko a ye ko, “Wo nte kasi ti.”

Yesaya 19:21

Wo to Yaawe be Misirankoolu londi la a faŋo la le, wo luŋo la, ì ye soŋ a ma. Ì be baturoo ke la niŋ beeyaŋ sadaalu* le la, aniŋ siimaŋ sadaalu, ì ye tawoo taa a ye, ì ye a muta.

Yesaya 19:23

Wo luŋo la, sila fanuŋo le be bo la Misira fo Asiriya. Asiriyankoolu be naa Misira, Misirankoolu ye taa Asiriya. Misirankoolu niŋ Asiriyankoolu be Alla batu la ñoo kaŋ ne.

Yesaya 27:13

Wo luŋo la, saakotoŋ bina* baa le be fee la, ì ye moolu mennu samba Asiriya bankoo kaŋ, aniŋ ì ye mennu bayi ka taa Misira bankoo kaŋ, bee be naa la le ka Yaawe batu Yerusalaamu konko senuŋo* kaŋ.

Yesaya 49:7

Yaawe, Banisirayila la Senuŋ Baa, a Kumakaalaa ka diyaamu moo le ye, bankoolu jututa meŋ na, ì ye a koŋ, a keta maralilaalu la dookuulaa ti, a ye ñiŋ ne fo a ye ko, “Niŋ mansoolu ye i je, ì be wuli la le, maralilaalu fanaa be ñoyi la i ye le, kaatu nte Yaawe le be a saabu la. N ka laahidoolu timmandi le, nte Banisirayila la Senuŋ Baa meŋ ye i tomboŋ.”

Esekiyeli 20:40

Maarii Yaawe ko: “Luŋ be sii la, alitolu Banisirayilankoolu bee be m batu la n na konko senuŋo* le kaŋ santo, Banisirayila bankoo kaŋ. Ali be ali la sadaalu samba la naŋ n ye jee le to, m be seewoo la mennu la. Ñinnu le mu sadaa jankuriŋolu ti ali be mennu samba la n ye naŋ.

Esekiyeli 45:17

Bituŋ mansa be beeyaŋ jani sadaalu samba la naŋ ne, aniŋ siimaŋ sadaalu niŋ miŋ feŋ sadaalu, a ñanta mennu ke la sadaa ti juuraloolu to. Piriisoo le be ñiŋ feŋolu taa la ka ì ke sadaa ti juurali waatoo kono, niŋ Kari Kuta Juuraloo* waatoo siita, Loobula Luŋo, aniŋ wo juurali looriŋolu bee, Banisirayilankoolu ka mennu juura. Mansa ñanta junube kafarilaŋ sadaalu samba la naŋ nte Yaawe kaŋ ne, aniŋ siimaŋ sadaalu, jani sadaalu, aniŋ kayira sabatindiraŋ sadaalu, a la moolu tooyaa la. Aduŋ piriisoo si junube kafaroo naati noo moolu ye wo le ñaama.”

Jabuuroolu 22:28

Maraloo mu Yaawe le taa ti, aduŋ ate le marata bankoolu ma.

Jabuuroolu 65:3

Niŋ tuma meŋ ǹ na kuu jawoolu dunoo kuliyaata ǹ kaŋ, i ka yamfa ǹ na junuboolu la le.

Yesaya 2:2

Luŋ be naa le, Yaawe* Batudulaa Buŋo* be konkoo meŋ kaŋ, wo le be tara la konkoolu bee ye santo la, a jamfoo si tambi konko koteŋolu la. Aduŋ bankoolu bee moolu si jee waliŋ.

Jakariya 14:18

Niŋ Misirankoolu maŋ taa ñiŋ juuraloo to, wo to ì fanaa te sanji soto la. Yaawe be ì mantoora la le, ko a ye bankoolu mantoora ñaameŋ, mennu maŋ maabee juuraloo to.

Jakariya 14:19

Ñiŋ be ke la yankankatoo le ti, meŋ be laa la Misira niŋ banku koteŋolu kaŋ, mennu maŋ taa Jembereŋ Juuraloo kidimandi.