Yesaya 51:3 - Mandinka Bible

³ Tooñaa-tooñaa, Yaawe be Siyoninkoolu* sabarindi la le, aduŋ a be balafaa soto la ì ye le, ì la saatewo tumbunta ñaameŋ. A be ì la wuloo ke la le ko Edeni naakoo, ì la keñewuloo* ye ke ko Yaawe la naakoo. Ì be seewoo niŋ kontaanoo soto la jee le, ì ye Alla tentu niŋ suukuulaa la.

Yesaya 51:3 ပူးပေါင်းရင်းမြစ်များ

Yesaya 49:13

Saŋ fatoolu, ali sari santo seewoo kamma, bankoo ye kontaani, konkoolu ye wutu suukuwo ti, kaatu Yaawe ye a la moolu jusoo ñabu le, aduŋ a be balafaa soto la a la moo bataariŋolu ye le.

Yesaya 52:9

Yerusalaamu tumbuŋolu, ali wutu ñoo la ka seewootoo suukuwo laa, kaatu Yaawe ye a la moolu sabarindi le, a ye Yerusalaamu kumakaa.

Yoweli 2:3

Kelediŋolu ñaatiliŋo la, dimbaa le ka feŋo bee domo, niŋ ì ye ì koo dii, dimbaa neŋo ye janiroo ke. Janniŋ ì ka naa, bankoo be le ko Edeni naakoo, biriŋ ì ye ì koo dii, a keta keñewuloo* ti, feŋ buka kana ì ma.

1 Pita 1:8

Ali nene maŋ a je ñaa-wo-ñaa, bari ali ye a kanu. Hani ali maŋ ate je saayiŋ, ali laata a la, aduŋ ali be faariŋ niŋ seewoo baa la, meŋ warata fo a te misaali noo la.

Yeremiya 31:25

M be moo nii koririŋolu kereyandi la le, aduŋ m be moo bataariŋolu wasa la le.”

1 Musa 13:10

Luuti ye a ñaa muruŋ-muruŋ, a ye a je ko, Yoridani Boloŋo kene fanuŋo bee, ka taa fo Sowari, wolu le ye jii jamaa soto. Jee ka munta le komeŋ Yaawe la naakoo aniŋ Misira bankoo. Ñiŋ mu waati le ti, janniŋ Yaawe ka Sodomu saatewo niŋ Komora saatewo kasaara.

Yesaya 51:12

Yaawe ko: “Nte, nte faŋo le ka ali sabarindi. Wo to muŋ ne ye a tinna, ali ka sila hadamadiŋo la, saayaa be meŋ kunna, hadamadiŋo meŋ maŋ ke feŋ ti fo ñaamoo?

Yesaya 44:26

N ka n na dookuulaa la kumoo timmandi le, ŋa n na annabiyomoo la bankeeroo ke kuu sotoriŋo ti. Ŋa a fo le ko, moolu be sabati la Yerusalaamu le kotenke, ì ye Yahuuda saatewolu lookuu. Ì la saatewolu be bo la tumbundiŋ ne, ì ye seyi ì ñaama.

Yesaya 25:9

Wo luŋo la, ñiŋ ne be fo la, “A fele, ñiŋ ne mu ǹ na Alla ti, ǹ jikita a la le, aduŋ a ye ǹ tankandi. Ñiŋ ne mu Yaawe ti, ǹ jikita meŋ na. Ali ŋà seewoo, ka jusulaa a la kiisandiroo la.”

Yesaya 12:1

Wo luŋo la, i be a fo la le ko: “Hee Yaawe*, m be i jayi la le! I kamfaabaata n kamma ñaa-wo-ñaa, i la kamfaa banta le, i ye n ñaajiyo fita.

Jabuuroolu 85:8

Silaŋ, m be n lamoyi la Yaawe Alla la kumakaŋo le la, bayiri a be kayira kuwo le fo la a la moolu ye, a la moo tilindiŋolu, wo to ì kana ì la tooleeyaa maañaa seyinkaŋ.

Yesaya 49:8

Yaawe ye ñiŋ ne fo a la dookuulaa ye ko: “Niŋ n na hiinoo waatoo siita, m be i danku la le. Niŋ kiisoo luŋo siita, m be i maakoyi la le. M be i kanda la, i ye ke n niŋ moolu teema kambeŋo ti, ka banku tumbundiŋo seyindi a ñaama, ka kenoo talaa moolu teema ka ke ì ye keetaafeŋo ti.

Yesaya 35:6

Lanjuurutoo si sawuŋ ko minaŋo, mumunewo ye denkiloo laa seewoo kono. Kaatu keñewuloo be faa la jiyo la le, wuloo bee ye ke boloŋo ti.

Yesaya 41:16

Ali be ì fayi la foñoo kono le, ì ye janjaŋ, burufatoo ye ì tindi. Wo to ali be kontaani la le, kaatu nte le mu Yaawe ali la Alla ti, ali be nte Banisirayila la Senuŋ Baa jayi la le.

Yesaya 43:19

Ali a juubee, m be kuu kutoo le ke kaŋ. A be keriŋ ne saayiŋ, fo ali maŋ a je baŋ? M be siloo parendi kaŋ keñewuloo* kono le, ŋa woyoolu ke ali ye dulaa jaariŋolu to.

Yesaya 49:19

“Ì ye i tiñaa, aniŋ ka i la saatewo kasaara ñaa-wo-ñaa, ka i la bankoo kenseŋyandi, bari saayiŋ, bankoo be dooyaabaa la i la moolu ye le, mennu naata, aduŋ mennu ye i kasaara be jamfa la i la le.

Yesaya 61:10

Yaawe la kuwo seewoo tambita n kunna le, n niyo laata n na Alla la karoo la le. Kaatu a ye kiisoo dendikamaa le duŋ n na, a ye tiliŋo warambamaa duŋ n na, ko maañootiyo ka i paree ñaameŋ, aniŋ ko maañoo ka a faŋo ñiiñandi a la ñaroolu la ñaameŋ.

Yesaya 65:18

Bari m be feŋolu mennu daa la be a tinna la le, ali ye tara seewoo niŋ maadiyaa kono fo abadaa. Kaatu m be Yerusalaamu daakuu la le, ka ke ñaaboo dulaa ti, a moolu la kuwo si n seewoo.

Esekiyeli 28:13

I be Edeni le nuŋ, Alla la naakoo kono. I ñarandita bere ñiimaa siifaa bee la, wolu le mu rubi beroo ti, topasi aniŋ emeradi, kisoliti, onisi aniŋ jasipa, safiiri, turuki aniŋ berili, ì kononkesemaa be sanoo kono. I daata luŋo meŋ na, ì bee be pareeriŋ i ye le.

Esekiyeli 36:11

M be moolu niŋ beeyaŋolu jiidindi la jee le, ì ye yiriwaa. M be a ke la le moolu ye sabati konkoolu kaŋ, ko ì be nuŋ jee ñaameŋ, aduŋ a be beteyaa la ali fee le ko a nene maŋ ke ali ye nuŋ ñaameŋ. Niŋ wo keta ali be a loŋ na le ko, nte le mu Yaawe ti.

Esekiyeli 36:35

Ì be a fo la le ko, ‘Ñiŋ dulaa meŋ kenseŋyaata nuŋ, a fele, a naata ke ko Edeni naakoo. Aduŋ wo saatee tumbundiŋolu fele, ì naata ì tatoolu lookuu aniŋ ì be faariŋ moolu la ñaameŋ!’