Yesaya 5:26 - Mandinka Bible

²⁶ Yaawe ye bandeeroo wulindi banku jamfariŋo moolu ye le ka naa, a ye moolu kumandi, ka bo naŋ duniyaa daŋo to. A fele ì ka naa, korontoo aniŋ tariyaa ñaama.

Yesaya 5:26 ပူးပေါင်းရင်းမြစ်များ

Jakariya 10:8

“N si m buloo maa ì ye naŋ, ŋa ì kumbeŋ naŋ ñoo ma, kaatu nte le ye ì kiisa naŋ. Ì si siyaa ko ì be nuŋ ñaameŋ.

Yesaya 7:18

“Niŋ wo waatoo siita, Yaawe be kumandiroo ke la le, aduŋ kelediŋolu be bo la naŋ Misira le komeŋ siyolu, aniŋ ka bo Asiriya, komeŋ kumoolu.

Yesaya 18:3

Alitolu duniyaa moolu mennu be baluuriŋ ñiŋ saŋ kuloo koto, niŋ bandeeroo wulindita konkoo turoo kaŋ, ali a juubee, niŋ saakotoŋ binoo* feeta, ali dandalaaroo moyi.

5 Musa 28:49

Yaawe be banku koteŋo moolu le wulindi la ali kamma ka bo naŋ dulaa jaŋ, ali nene maŋ mennu la kaŋo moyi sako ka a fahaamu. Wolu si naa boyi ali kaŋ, ì ye ali cansu ko seeliŋo.

Yesaya 11:12

A be bandeeroo wulindi la bankoolu ye le, a ye Banisirayila mutamoolu bendi, a ye Yahuuda moo janjandiŋolu kafu ñoo kaŋ, ka bo duniyaa tonkoŋ naanoo to.

Malaki 1:11

Nte too be warariŋ bankoolu kaŋ ne, ka bo tilibo ka taa tilijii, aduŋ daa-wo-daa seerandi feŋolu le ka siisindi n tooyaa la jee, aniŋ sadaa kendoolu, kaatu n too warata bankoolu kaŋ ne.” Yaawe Alihawaa Maariyo le ye a fo.

Habakuki 1:8

Ì la suwoolu le tariyaata ka tambi soloo la, aduŋ itolu le ñamoo fatiyaata ka tambi suluu konkoriŋo la. Ì la suu borindilaalu si bo naŋ dulaa jaŋ, ì la suwoolu sinkaŋo be kuma la bankoo kaŋ. Ì tariyaatoo si ì jawoolu waliŋ keloo la ko niŋ seeliŋo be jii la suboo kaŋ duuma.

Yoweli 2:7

Ì ka bori le ko kelejawaroolu, ì ka sele tata sansaŋo la ko kelediŋolu. Ì meŋ-wo-meŋ be a taaraŋ buloo le kaŋ, ì buka jenke.

Niikuyaa Suukuwolu 4:19

Seeliŋo tiitoo, m̀ bayindilaalu le tariyaata wo faŋo ti. Ì ye m̀ bayindi konkoolu kaŋ, ì bitita ǹ kamma keñewuloo kono.

Yeremiya 51:27

“Ali bandeeroo wulindi duniyaa ye ka naa Babiloni kele, ali kelebinoo fee bankoolu ye naŋ taariŋ. Ali bankoolu parendi a kamma keloo la, ali ye ñiŋ mansamarali bankoolu kili naŋ a kamma: Ararati, Minni, aniŋ Asikenasi. Ali kelekuntiyo tomboŋ a kamma, ali ye suwoolu naati ko kuntiŋ jurumoo.

Yeremiya 5:15

Yaawe ko: “Alitolu Banisirayilankoolu, m be jamfajaŋ banku le naati la ka ali boyinkaŋ, banku sembemaa, banku meeriŋ, ali maŋ banku meŋ na kaŋo moyi, sako ali si ì la diyaamoo fahaamu noo.

Yeremiya 4:13

A juubee, jawoolu be naa kaŋ ne komeŋ saŋ tawaloolu, ì la keleraŋ sareetoolu* ka munta ko saafoñotoo, ì la suwoolu tariyaata ka tambi seeliŋolu la. Kooroo boyita ǹ kaŋ ne, ǹ kenseŋo tuta.

Yesaya 39:3

Bituŋ Annabilayi Yesaya taata Mansa Hesekiya kaŋ, a ye a ñininkaa ko, “Wo kewolu ye muŋ ne fo? Ì bota naŋ mintoo le?” Hesekiya ye a jaabi ko, “Ì bota naŋ Babiloni bankoo le kaŋ, banku jamfariŋ baa le mu, ka naa jaŋ.”

Yesaya 30:16

Ali ko, “Hanii, m̀ be sele la suwoolu le kaŋ ŋà bori.” Haa, ali si bori! Ali ko, “M̀ be bori la le,” aduŋ, “M̀ be sele la suu tariŋolu le kaŋ.” Ali bayindilaalu fanaa be tariyaa la wo le ñaama.

Yesaya 13:5

Ì bota naŋ dulaa jaŋ baa le to, ka bo saŋ fatoolu daŋo to. Yaawe niŋ a la kamfaa le naata ka naa bankoo bee kasaara.

Yesaya 13:2

Yaawe* ko: “Ali bandeeroo wulindi konko turoo kaŋ, ali ye kelediŋolu lenka, ka a fo ì ye naa duŋ, niŋ moo kummaalu la dundaŋ daalu la.

Jabuuroolu 72:8

Allamaa a la maraloo ye bo fankaasi ka taa fankaasi, aniŋ ka bo Yufurati Boloŋo to ka taa fo duniyaa daŋo to.

Jabuuroolu 60:4

I ye bandeeroo le wulindi moolu ye, mennu ye i kuliyaa, ñiŋ kamma ì si tanka jawoolu la kalabeñoo ma. S

Yesaya 10:3

Ali be muŋ ne ke la mantooroo luŋo, niŋ kooroo bota naŋ dulaa jaŋ? Ali be taa jumaa le yaa ka maakoyiroo ñini? Ali be ali la naafuloo tu la mintoo le?

Yesaya 13:3

Ŋa n na moo kerekereriŋolu yaamari le, ŋa n na kelejawaroolu kumandi, n na kandaa sikandiriŋolu, fo ì si n na kamfaa taamandi.”

Yesaya 13:4

Ali i lamoyi, maakaŋo le be konkoolu kaŋ, ko niŋ moo jamaalu le be jee. Ali i lamoyi, wuurikaŋo le ka kuma mansamarali bankoolu kaŋ, ko niŋ bankoolu le ka beŋ. Yaawe Alihawaa Maariyo* le be a la kelediŋ kafoolu parendi kaŋ keloo ye.

Yesaya 31:9

Yaawe meŋ na batudulaa be Yerusalaamu, meŋ na sadaajanidulaa* be Siyoni, ye ñiŋ ne fo ko, Asiriya la kelediŋ bambandiŋolu ko konko beroo be bori la le silaŋo kamma. A la ñaatonkoolu be jikilateyi la le, ì ye bori ka ì la bandeeri dokoo tu jee.

Esekiyeli 38:17

Maarii Yaawe ye ñiŋ ne fo ko: “Ite Kooki, ŋa ite la kuwo fo waati jaŋ koomanto ka bo niŋ n na dookuulaalu la, Banisirayila annabiyomoolu. Ì ye kiilaariyaa kumoo fo sanji jamaa la ko, m be ite le samba la naŋ ka ñapi ì kaŋ.”