Yesaya 45:9 - Mandinka Bible

⁹ Kooroo boyita moo kaŋ ne, meŋ niŋ a Daamansoo ka sonka. A maarii maŋ ke feŋ ti, fo daa telendaŋolu mennu be fayiriŋ bankoo to. Fo boo ka a fo boodaalaa ye le ko, “I ka muŋ ne daa?” waraŋ, “A maŋ dadaa kuu”?

Yesaya 45:9 ပူးပေါင်းရင်းမြစ်များ

Yesaya 64:8

Bari Yaawe*, ite le mu m̀ Faamaa ti. Ǹ ka munta le ko potoo, aduŋ ite le mu boodaalaa ti, i buloolu le ye ntolu bee daa.

Yeremiya 18:6

“Muna alitolu Banisirayilankoolu, fo nte te wo ke noo la ali la baŋ, ko boodaalaa ka a ke ñaameŋ? A juubee, ko boo ka tara boodaalaa bulu ñaameŋ, ali be m bulu wo le ñaama, alitolu Banisirayilankoolu. Nte Yaawe le ye a fo.

Yesaya 29:16

Ali ka kuwolu kunna faliŋ ne, ko niŋ boodaalaa faŋo falinta potoo ti. Fo meŋ dadaata si a fo noo a dadaalaa ye, “I maŋ n dadaa”? Daandiŋo si a fo noo a dadaalaa ye ñaadii le ko, “I maŋ feŋ loŋ”?

Yesaya 10:15

Bari, fo teeraŋo si a faŋo sikandi noo a maarii bulu, meŋ ka a sawundi, waraŋ seeroo ye a faŋo kibirindi a maarii ye, meŋ ka dookuwo ke a la? Fo dokoo si moo firifiri meŋ ye a sika, waraŋ babara kuntoo ye moo finjaŋ-finjaŋ?

Kuma Kotoomaalu 21:30

Ñaameŋ te jee, fahaamuru te jee, aduŋ feere te jee meŋ si taamandi noo Yaawe kaŋ.

Yeremiya 50:24

Ite Babiloni, ŋa dooliŋo le laa i ye, a ye i muta, aduŋ i maŋ a loŋ. Ŋa i soto le, ŋa i ñankoŋ, kaatu i ka nte Yaawe le kele.

1 Korintinkoolu 10:22

Fo ǹ lafita Maariyo kiiliyandi la le baŋ? Fo ntolu le bambanta ate ti baŋ?

Yuuba 9:12

Jumaa le si Alla bali noo feŋo taa la, a lafita ka meŋ taa? Jumaa le si haañi ka a ñininkaa a la?

Yuuba 33:13

Muŋ ne ye a tinna i ye Alla tuumi, kaatu a maŋ i la ñininkaaroolu jaabi?

Yuuba 40:2

“I niŋ nte Alla Tallaa le be ñoo saba la baŋ? I lafita n soosoo la le baŋ? Wo to n jaabi.”

Kawandilaa 6:10

Feŋ-wo-feŋ be sotoriŋ, too le diita a la, aduŋ hadamadiŋo mu meŋ ti, wo be londiŋ ne. Meŋ semboo warata i ti, i niŋ wo buka ñoo saba noo.

Yesaya 45:10

Kooroo boyita moo kaŋ ne, meŋ ka a fo a faamaa ye ko, “Muŋ ne ye a tinna i ye n naati ñiŋ duniyaa kono?” waraŋ ka a fo a baamaa ye ko, “Muŋ ne ye a tinna i ye n wuluu?”

Yeremiya 36:29

I si ñiŋ fo Yehoyakimu la kuwo to jee ko, nte Yaawe ye ñiŋ ne fo ko, ate ye ñiŋ kitaaboo jani le. A ko muŋ ne ye a tinna Yeremiya ye a safee jee ko, fo Babiloni mansakewo si naa doroŋ, a ye ñiŋ bankoo kasaara. A be hadamadiŋolu niŋ beeyaŋolu bee turubaŋ na jee le.

Daniyeli 4:35

Duniyaa moolu bee buka muluŋ a ñaa koto feŋ ti. A la lafoo mu meŋ ti, a ka wo le ke malaayikoolu kono santo, aniŋ hadamadiŋolu kono duuma. Moo te a la keroo baayi noo la, waraŋ ka a ñininkaa a kekuwo la.

Yuuba 9:4

Alla le mu sembetiyo ti, aniŋ ñaameŋo. Jumaa le nene ka balaŋ a ma, a ye a maarii wati?

Yuuba 10:9

A loŋ ko, ite le ye n daa komeŋ potoo kitiŋo. Saayiŋ, fo i be m murundi la bankumunkoo ti le baŋ?

Yesaya 64:7

Moo buka i too kumandi waraŋ ka a fo i ye a maakoyi, kaatu i ye i koo dii ǹ na le. I ye m̀ bula fo ǹ na junuboolu ye ǹ kasaara.