Yesaya 18:3 - Mandinka Bible

³ Alitolu duniyaa moolu mennu be baluuriŋ ñiŋ saŋ kuloo koto, niŋ bandeeroo wulindita konkoo turoo kaŋ, ali a juubee, niŋ saakotoŋ binoo* feeta, ali dandalaaroo moyi.

Yesaya 18:3 ပူးပေါင်းရင်းမြစ်များ

Yesaya 5:26

Yaawe ye bandeeroo wulindi banku jamfariŋo moolu ye le ka naa, a ye moolu kumandi, ka bo naŋ duniyaa daŋo to. A fele ì ka naa, korontoo aniŋ tariyaa ñaama.

Yesaya 26:11

Hee Yaawe, i buloo be teekariŋ ne, ka ì mantoora, bari ì maŋ a je. Allamaa ì ye i hamoo je, i ye meŋ soto i la moolu ye, ì ye malu. Allamaa dimbaa meŋ be pareeriŋ i jawoolu kamma, ye ì jani.

Matiyu 13:16

“Bari barakoo be alitolu ñaalu niŋ ali tuloolu ye le, kaatu ali ye jeroo ke le, aniŋ ali ye moyiroo ke le fanaa.

Matiyu 13:9

Meŋ ye tuloo soto, a si a moyi.”

Jakariya 9:14

Yaawe be finti la naŋ ne, a ye tara a la moolu kunto, a la kalabeñoo ye ŋalasi ko saŋ ŋalasoo. Maarii Alla si kelebinoo fee, a ye wuli naŋ a jawoolu kamma ko turubaadoo, meŋ ka bo naŋ bulubaa karoo la.

Mika 6:9

Ka sila Yaawe la, wo le mu ñaameŋo ti. Yaawe ye kiliroo ke Yerusalaamu saatewo to ko: “Ali i lamoyi, ali si sila busoo la, aniŋ busoo maarii.

Mika 6:2

Ali i lamoyi, alitolu konkoolu, alitolu duniyaa fondamaŋolu mennu be tu la fo abadaa. Ali i lamoyi Yaawe la kiitiyo la, a ye meŋ landi a la moolu kamma, Banisirayilankoolu, a niŋ ì ka taa loo kiitii kenoo le to.

Yeremiya 22:29

Ite bankuŋ, ite bankuŋ, ite bankuŋ, i lamoyi Yaawe la kumoo la!

Yesaya 13:4

Ali i lamoyi, maakaŋo le be konkoolu kaŋ, ko niŋ moo jamaalu le be jee. Ali i lamoyi, wuurikaŋo le ka kuma mansamarali bankoolu kaŋ, ko niŋ bankoolu le ka beŋ. Yaawe Alihawaa Maariyo* le be a la kelediŋ kafoolu parendi kaŋ keloo ye.

Yesaya 13:2

Yaawe* ko: “Ali bandeeroo wulindi konko turoo kaŋ, ali ye kelediŋolu lenka, ka a fo ì ye naa duŋ, niŋ moo kummaalu la dundaŋ daalu la.

Yesaya 7:18

“Niŋ wo waatoo siita, Yaawe be kumandiroo ke la le, aduŋ kelediŋolu be bo la naŋ Misira le komeŋ siyolu, aniŋ ka bo Asiriya, komeŋ kumoolu.

Yesaya 1:2

Saŋ fatoo, i lamoyi! Bankoo, i tuloo loo! Kaatu Yaawe* le ka naa diyaamu. A ko, “Ŋa dindiŋolu kuluu le fo ì menta, bari ì ye balaŋo le tiliŋ n na.

Jabuuroolu 50:1

Sembetii Baa, Yaawe* Alla diyaamuta le, a ye duniyaa moolu bee kumandi ka bo tilibo ka taa tilijii.

Yesaya 31:9

Yaawe meŋ na batudulaa be Yerusalaamu, meŋ na sadaajanidulaa* be Siyoni, ye ñiŋ ne fo ko, Asiriya la kelediŋ bambandiŋolu ko konko beroo be bori la le silaŋo kamma. A la ñaatonkoolu be jikilateyi la le, ì ye bori ka ì la bandeeri dokoo tu jee.

Yesaya 49:22

Maarii Yaawe ye ñiŋ ne fo ko: “Saayiŋ, m be taamanseeroo ke la bantala bankoolu ye le. M be n na bandeeroo wulindi la le, moolu ye a je. Ì be i dinkewolu sika la le, ì ye i dimmusoolu laa ì dabakunkuŋolu kaŋ, ì ye ì naati i ye.

Yeremiya 51:27

“Ali bandeeroo wulindi duniyaa ye ka naa Babiloni kele, ali kelebinoo fee bankoolu ye naŋ taariŋ. Ali bankoolu parendi a kamma keloo la, ali ye ñiŋ mansamarali bankoolu kili naŋ a kamma: Ararati, Minni, aniŋ Asikenasi. Ali kelekuntiyo tomboŋ a kamma, ali ye suwoolu naati ko kuntiŋ jurumoo.

Mika 1:2

Ali moyiroo ke bankoolu bee, ali bee kewu. Duniyaa niŋ a konokono feŋolu, ali i lamoyi. M Maarii Yaawe faŋo le be seedeyaa la ali la kuwo la, ka bo a taradulaa senuŋo to.

Yesaya 11:12

A be bandeeroo wulindi la bankoolu ye le, a ye Banisirayila mutamoolu bendi, a ye Yahuuda moo janjandiŋolu kafu ñoo kaŋ, ka bo duniyaa tonkoŋ naanoo to.