Yesaya 15:2 - Mandinka Bible

² Diboninkoolu taata ì la batudulaa to le, ì la batudulaa tintiŋolu* to ka woosii, Mowabinkoolu lembata Nebo niŋ Medeba la kuwo la. Ì ye ì kuŋolu bee nunku le, ì ye ì booraalu bee lii niikuyaa kamma.

Yesaya 15:2 ပူးပေါင်းရင်းမြစ်များ

Yeremiya 48:1

Ñiŋ kiilaariyaa kumoo le fota Mowabi ma: Yaawe* Alihawaa Maariyo*, Banisirayila la Alla ye ñiŋ ne fo ko: “Kooroo be Nebo saatewo ye, kaatu a be tumbuŋ na le. Kiriyatayimu be bula la maloo kono le, ì ye jee saatewo muta, maloo ye laa a tatoo kaŋ ka a boyi.

3 Musa 21:5

Piriisoolu kana ì kuŋ kara kiliŋo lii, waraŋ ka ì booraa dandaŋo mesu, waraŋ ka ì faŋ baloo ñenje, ka a yitandi ko ì be saŋakumboo le la.

Yeremiya 48:18

“Alitolu Diboninkoolu, ali jii naŋ ali la dulaa horomariŋo to, ali ye sii buutoo kono, kaatu Mowabi bankoo kasaaralaa, wo le ka naa ali kamma, ka ali la tata bambandiŋolu kasaara.

Yesaya 3:24

Sunkaŋo le be seeroo la palaasoo taa la, teesitiraŋ ñiimaa be yelema la julu kotoo le ti, kuŋ ñarandoo ye yelema kuŋ nunkoo ti, paree ñiimaa ye yelema booto funtu duŋo ti, muluŋ ñiimaa si yelema maloo ti.

5 Musa 34:1

Bituŋ Musa bota Mowabi kene fanuŋo to, ka taa Nebo Konkoo to. A seleta Pisika Konkoo turoo to, meŋ be Yeriko ñaatiliŋo la. Yaawe* ye bankoo bee yitandi a la ka bo Kileyadi tundoo to ka taa fo Dani saatewo to,

4 Musa 21:30

Ŋà Amorinkoolu noo le, Hesiboni ka taa fo Diboni, ka taa hani fo Nofa meŋ be Medeba daala, ŋà ì bee le turutumbuŋ.”

Esekiyeli 7:18

Ì be booto funtoolu le duŋ na ka ì la niikuyaa yitandi, kijafara baa le be duŋ na ì la. Malu kuwo le be moo bee ñaadaa muuri la, ì be ì kuŋolu nunku la maloo kamma le.

Yeremiya 48:31

“Wo to m be kumboo la Mowabi ye le, m be wuuri la Mowabi bee le ye, ŋa Kiri-Hareseti saatee moolu la kuwo woosii.

Yeremiya 47:5

Kuŋ nunkoo siita Kaasa ma le, ka ì la niikuyaa yitandi, Asikeloni taata deyoo kono yem. Alitolu Anaki koomalankoolu, ali be tu la faŋ bala namoo la fo muŋ tuma?

Yeremiya 7:29

“Yerusalaamunkoolu, ali ali kuntiñoo lii ka a fayi, saŋakumboo kamma la. Ali saŋawoosiyo ke konkoolu santo. Kaatu Yaawe ye alitolu ñiŋ jamaanoo moolu bula le, a ye a koo dii ali la, aduŋ a be kamfaariŋ ali kamma le.”

Yesaya 22:12

Yaawe Alihawaa Maariyo be lafi la le, ali ye woosii ka kumboo wo luŋo la kuwo la, ali ye ali kuŋo lii ka booto funtoo duŋ, ka ali la niikuyaa yitandi.

Yesaya 16:12

Mowabinkoolu ka taa batudulaa tintiŋo* to taariŋ fo ì bataata. Ì taata ì la jalambuŋolu to duwaa la ñaa-wo-ñaa, a te feŋ jaara la ì ye.

Yesaya 16:7

Wo to, Mowabinkoolu si lemba, moolu bee si lemba, ì la kuwo balafaa kaŋ. Ali sunu baake, ali ye sunu kendeke, Kiri-Hareseti saatewo la tiñaa kamma la, kaatu a la domori diimaa te soto la kotenke.

Yesaya 15:3

Ì ka booto funtoolu le duŋ mbeedoolu kaŋ, ka taa bantabaalu to, aniŋ ì la buŋ santo teruriŋolu* kaŋ. Ì bee le ka wuuri, ì ye i fayi duuma ka kumboo.

Yesaya 14:31

Saatee dundaŋ daalu, ali wuuri santo! Saatewo ye lemba! Alitolu Filisitinkoolu, ali bee kijoo ye ali fara! Kankaŋ baa le ka bo naŋ maraa karoo la, aduŋ kelediŋ te wo kafu baa kono meŋ be tu la kooma.

Yuuba 1:20

Bituŋ Yuuba wulita, a ye a la duŋ feŋolu fara niikuyaa kamma la, a ye a kuŋo lii, a sujudita, a ye Alla batu.

5 Musa 14:1

Musa ko Banisirayilankoolu ye ko: Alitolu mu Yaawe* ali la Alla la dindiŋolu le ti, wo to niŋ ali be saŋakumboo la, ali kana ali faŋ nama waraŋ ka ali fondaalu lii.

4 Musa 32:38

ka taa hani fo Nebo aniŋ Baali-Mewoni mennu toolu falinta, aniŋ Sibuma. Ì ye toolu dii ì la saatewolu la le ì ye mennu lookuu.

4 Musa 32:3

“Ñiŋ tundoo, Banisirayilankoolu ye meŋ taa Yaawe* la deemaaroo kaŋ, Ataroti saatewo be daameŋ, Diboni saatewo, Yaseri saatewo, Nimura saatewo, Hesiboni saatewo, Eleyale saatewo, Sebamu saatewo, Nebo saatewo aniŋ Beyoni saatewo, baluudulaa kende baalu le mu beeyaŋolu ye, aduŋ beeyaŋo be siyaariŋ ntolu bulu le.

3 Musa 13:40

Niŋ kewo foota kuntiñoo la, a keta kuŋ lawulawoo le ti, bari a seneyaata le.

4 Musa 21:28

Dimbaa fintita naŋ Hesiboni kono, dimbaa neŋo bota naŋ Sihoni la saatewo to, a ye Ari saatewo kasaara Mowabi, aniŋ maralilaalu mennu be siiriŋ konkoolu kaŋ Arinoni Boloŋ daala.

2 Samuweli 10:4

Wo to le Hanuni ye Dawuda la kiilaalu taa, a ye ì booraa kara kiliŋo lii, a ye ì la dendikoolu kuntu ì tewolu to ka ì kenseŋo londi, a ye ì bula ì seyita.

Yeremiya 3:21

Wuurikaŋo bota naŋ konkoolu kaŋ, Banisirayilankoolu le kumboo kaŋo mu, aniŋ ì woosiikaŋo, kaatu ì ye kuruŋyaa le ke ì taaraŋ siloo ti, ì ñinata Yaawe ì la Alla la.

Yeremiya 47:2

Yaawe ye ñiŋ ne fo ko: “A juubee baajiyo ka wuli maraa la naŋ ñaameŋ, ì be naa ke la waamoo ti ka woyi. Ì be bankoo niŋ a feŋo bee kunuŋ na le, saatewolu niŋ mennu be sabatiriŋ ì kono. Moolu be wuuri la le, moo-wo-moo be siiriŋ bankoo kaŋ be lemba la le,

Yeremiya 48:35

M be moolu baŋ na Mowabi bankoo kaŋ ne, moo-wo-moo ka sadaalu* bondi batudulaa tintiŋolu* to, ka cuuraayoo siisindi a la jalaŋo ye.” Yaawe le ye a fo.

Esekiyeli 27:31

Ì ye ì kuŋolu nunku, ì ye booto funtoolu duŋ, i la kuwo kamma. Ì kumboota i kunna baake le niŋ niikuyaa baa la.

Esekiyeli 30:2

“Hadamadiŋo, kiilaariyaa kumoo fo Misirankoolu ma. I si a fo ì ye, nte Yaawe, i Maariyo ye ñiŋ ne fo ko: Ali si kumboo fo ali ka lemba.

Amosi 8:10

N si ali la diina juuraloolu yelemandi ali ye saŋawoosiyo ti, ŋa ali la denkiloo yelemandi kumboo ti. N si a saabu ali ye booto funtoolu duŋ, ali ye ali kuŋolu lii niikuyaa kamma la. N si ñiŋ waatoo ke waati ti ali ye, komeŋ niŋ moo be woosii la a dinkee kiliŋo la faa la. Ñiŋ luŋo bee be ke la niikuyaa le ti ali ye.”

1 Taarika 19:4

Wo to le Hanuni ye Dawuda la kiilaalu taa, a ye ì booraa lii, a ye ì la dendikoolu kuntu ì tewolu to ka ì kenseŋo londi, a ye ì bula, ì seyita.

Yeremiya 49:3

“Ite Hesiboni saatewo, wuuri, kaatu Ayi keta tumbuŋo le ti! Alitolu Raba musoolu, ali kumboo! Ali booto funtoolu duŋ ka ali la niikuyaa yitandi, ali ye saŋakumboo ke ka boriŋ-boriŋ, ka i maabo fitoolu koto, kaatu ali la jalaŋo Moleki be taa mutoo kono le, a niŋ a la piriisoolu* niŋ a batubaalu.