Yesaya 13:8 - Mandinka Bible

⁸ Silaŋ baa be duŋ na ì la le, dimiŋo niŋ niitooroo ye i miniŋ ì la. Ì be ŋuntaŋ na le ko, niŋ musoo be tiŋo to. Ì kija kuntutoo be ñoo juubee la le, ì ñaadaa ye yelema silaŋo kamma.

Yesaya 13:8 ပူးပေါင်းရင်းမြစ်များ

1 Tesalonikankoolu 5:3

Niŋ moolu ko, “Kayiroo niŋ tenkuŋo le be keriŋ,” bituŋ waati kiliŋ doroŋ, kasaaroo si boyi ì kaŋ ko tiŋo ka boyi musukonomaa kaŋ ñaameŋ, moo te kana noo la a ma.

Nahumu 2:10

Ninewe teyita, a kenseŋyaata, a kasaarata. A moolu kijoo teyita, fo ì kumbaliŋolu ka busa ñoo la. Ì semboo bee taata, ì niyo kuyaata fo ì ñaadaa yelemata.

Yesaya 26:17

Hee Yaawe, ko musukonomaa meŋ pareeta wuluu la, ka ŋaara ñaameŋ, ka dimoo kumboo, ntolu be wo le ñaama i ñaatiliŋo la.

Yohana 16:21

Niŋ musoo be tiŋo to, a ka bataa le, kaatu a la wuluu waatoo le siita. Bari niŋ deenaanoo wuluuta, a ka ñina a la bataa la le, kaatu a ka seewoo le ko, deenaanoo wuluuta duniyaa kono le.

Yoweli 2:6

Biriŋ ì coomanta, moo bee kijoo teyita, ñaadaalu bee yelemata.

Yeremiya 50:43

Yaawe ko: “Babiloni mansakewo ye ì kibaaroo moyi le, a buloolu tuta yondiŋ. Kijafaroo le ye a muta, aniŋ dimiŋo ko tiŋ ye musu maa.

Yeremiya 30:6

Ali ñininkaaroo ke, ali ye a juubee baŋ, muna kewo si deenaanoo wuluu noo? Wo to muŋ ne ye a tinna ŋa kee kanaŋ-wo-kee kanaŋ je, a buloo be a konoo to, ko tiŋ ye musu maa? Muŋ ne ye moo bee ñaadaa yelemandi, ko saata kuurantoo?

Yeremiya 4:31

Ŋa musu le kumboo kaŋo moyi tiŋo to, a ŋuntaŋ kaŋo ka munta meŋ be a diŋ foloo wuluu kaŋ. Wo mu Dimmusuriŋ* Siyoni le ŋuntaŋ kaŋo ti, ka i niijii. A ye a buloolu wulindi le, a ka a fo ko, “Ayiwaalii nte! M be ketu kaŋ ne. N siyo dunta moofaalaalu le bulu.”

2 Mansoolu 19:26

Tuma meŋ na wo saatewolu moolu semboo banta, ì jikilateyita, aduŋ ì maluta. Ì keta le komeŋ kunkukono fiifeŋolu, aniŋ ñaama soroŋ kutoo. Ì ka munta le komeŋ ñaamoo meŋ falinta buŋo santo, meŋ ka jaa janniŋ a be meŋ na.

Yeremiya 13:21

I be muŋ ne fo la, niŋ ì ye moolu marandi i kunna, ite faŋo ye mennu muta i teeroolu ti? Fo dimiŋo te duŋ na i la baŋ, ko dimiŋo ka musoo muta tiŋo to ñaameŋ?

Yeremiya 46:5

Ŋa muŋ ne je teŋ? Ì jikilateyita le, ì muruta ì koo la. Ì ye ì la kelejawaroolu noo le, ì borita tariyaake, ì buka hani kooma fele, kaatu maasiiboo le be karoo bee la.” Yaawe le ye a fo.

Yeremiya 48:41

Ì be saatewolu taa la le, ì ye tatoolu muta. Wo luŋo la, kijafaroo be Mowabi kelediŋ fatiŋolu muta la le, ko tiŋ ye musu maa.

Yeremiya 49:22

A juubee, jawoo le tariyaariŋo be tii la naŋ ko sontiŋo, a ye a dampaŋolu waree Bosira kamma. Wo luŋo la, Edomu kelediŋ fatiŋolu kijoo be ì fara la le, ko tiŋ ye musu maa.”

Yeremiya 49:24

Damasiku sembentaŋyaata le, a muruta a koo la ka bori, kijafaroo ye a muta, niikuyaa niŋ dimiŋo dunta a la, ko tiŋ ye musu maa.

Yeremiya 51:30

Babiloni kelejawaroolu ye keloo bula le, ì tuta ì la tatoolu kono, ì jikilateyita le, ì lamfuta ko musoolu. Ì ye a saatee dundaŋ daalu kati, ì ye dimbaa duŋ buŋolu la.

Esekiyeli 20:47

A fo sutukononkoolu ye ko, ì ye i lamoyi nte Yaawe la kumoo la. Nte Yaawe, ali Maariyo ye ñiŋ ne fo ko: ‘A fele m be dimbaa le duŋ na sutoo ñiŋ na, meŋ be yiri kitiŋolu niŋ yiri jaaroolu bee jani la, a te feŋ tu la jee. Aduŋ moo te a dimbaa dubeŋ noo la. A be janjaŋ na karoo bee le la. A be niilamaa feŋolu bee le jani la ka bo tonkoŋ ka taa fo tonkoŋ, a te feŋ kaari la.

Hoseya 13:13

Efurayimu ye siloo soto le ka baluu, bari ì maŋ kewuyaa. Ì be le ko deenaanoo, meŋ wuluu waatoo siita, a maŋ soŋ ka finti naŋ wuluuñaŋo kono.

Jabuuroolu 48:7

ì keta komeŋ niŋ turubaadi jawoo ye safaari kuluŋolu janjaŋ.