Yeremiya 50:15 - Mandinka Bible

¹⁵ Ali wuuroo kumandi a ma karoo bee la, Babiloni ye a faŋ seyi le, a tatoolu boyita, ì ye a tata sansaŋolu boyi le. Nte Yaawe le la julujoo mu ñiŋ ti ko: Ali si juloo joo a to, a ye meŋ ke, ka wo ñoŋ ke a la.

Yeremiya 50:15 ပူးပေါင်းရင်းမြစ်များ

Yeremiya 51:58

Yaawe Alihawaa Maariyo ye ñiŋ ne fo ko: “Babiloni tata sansaŋo niŋ a la bambaŋo, a be boyi la le fo a niŋ bankoo ye tembe. Dimbaa le be duŋ na a la, moolu la dookuwo be ke la kenseŋ ne ti, bankoolu la dookuwo be ke la dimbaa le taa ti.”

Lankenemoo 18:6

Ali a joo ko a ye a ke ñaameŋ, jooroo dii a la siiñaa fula a la kebaara jawoolu to. Ali a ñaami a ye ko siiñaa fula mindaŋo kono, ali ye a naati a ye, ko a ye a ke ñaameŋ.

Yeremiya 51:6

Yaawe ko a la moolu ye ko: “Ali bori ka finti Babiloni, moo-wo-moo ye a faŋo niyo tankandi, fo ali kana kasaara ñoo la a kuluu tumoo, kaatu ñiŋ mu nte Yaawe la julujoo waatoo le ti, m be a joo la meŋ na.

Yeremiya 46:10

Bari luŋo ñiŋ mu nte Yaawe Alihawaa Maariyo* la luŋo le ti, julujoo luŋo, ka n joo n jawoolu to. Hawusaroo* be faaroo ke la le fo a ye tiiña, a ye i miŋ ì yeloo la fo a ye ñeeli. Kaatu nte Yaawe Alihawaa Maariyo be faari sadaaboo le ke la, maraa kara bankoo kaŋ, Yufurati Boloŋo daala.

Niikuyaa Suukuwolu 5:6

Ŋà m̀ buloo laa Misira le ye, aniŋ Asiriya, ka domoroo soto.

Yeremiya 51:44

M be Babiloni jalaŋ Beli busa la le, a ye buusi feŋolu foonoo, a ye mennu kunuŋ. Duniyaa moolu te kuru la naŋ a nooma kotenke. Babiloni tata sansaŋolu be boyi la le.

Yeremiya 51:14

Nte Yaawe Alihawaa Maariyo kalita m faŋo la le ko: M be kelediŋolu juruma la i kono le, mennu be siyaariŋ ko kuntiŋolu, ì be wuuri la i kunna ka ì la nooroo yitandi.”

Yeremiya 51:11

Yaawe ye Mediya mansoolu le suusundi ka Babiloni kele, kaatu a ye a nata le ka a kasaara. Wo le mu Yaawe la julujoo ti, a la julujoo ì to, ì ye meŋ ke a Batudulaa Buŋo* la. Ì ko, “Ali ali la kalabeñoolu melundi, ali ye ali la koteeroolu* ñafu!

2 Taarika 30:8

Ali kuŋo kana jaa ko ali mumuñolu keta ñaameŋ. Ali soŋ Yaawe ma ka naa a Batudulaa Buŋo to, a ye meŋ seneyandi fo abadaa. Ali Yaawe, ali la Alla batu, fo a la kamfaa baa si bo ali kaŋ.

1 Taarika 29:24

Ñaatonkoolu niŋ kelejawaroolu bee niŋ Dawuda diŋ koteŋolu ye ì faŋo seyi Mansa Sulemani ma.

Lankenemoo 19:2

A la kiitiyolu mu tooñaa niŋ tiliŋo le ti, a ye wo cakamusu baa kiitindi le, meŋ ye duniyaa kosondi a la laañooyaa tuluŋo la. A ye Alla la dookuulaalu mennu yeloo boŋ, Alla ye wolu la juloo joo a ñaama le.”

Lankenemoo 16:6

Moolu mennu ye i la moo senuŋolu yeloo boŋ, a niŋ annabiyomoolu yeloo, ite naata ì mindi niŋ yeloo le la. Ì jarita kuluuroo meŋ na, ì naata a soto le.”

Yankuba 2:13

Kiitiyo le ka naa, meŋ buka balafaa soto moo ye, meŋ maŋ balafaa yitandi. Bari hani wo, balafaa le ye semboo soto kiitiyo ti.

2 Tesalonikankoolu 1:8

Ì be naa la dimbaa mala baa kataŋo kono ka moolu joo yankankatoo la, mennu maŋ Alla loŋ, aniŋ ì maŋ m̀ Maarii Yeesu la kibaari betoo muta.

Roomankoolu 12:19

N kanuntewolu, ali kana ì joo ali faŋ ye, bari wo noo to, ali Alla seyi jee, kaatu a be safeeriŋ ne ko: “Maariyo ko, ‘Julujoo mu nte le taa ti, m be n joo la le.’ ”

Roomankoolu 3:5

Bari niŋ ǹ na tilimbaliyaa ye Alla la tiliŋo yitandi seneyaarinke, wo to m̀ be muŋ ne fo la? Fo ǹ si a fo noo niŋ hadamadiŋolu la diyaamuñaa la ko, Alla maŋ tiliŋ, niŋ a kamfaata ǹ na kuwo la?

Luka 21:22

kaatu ñiŋ luŋolu mu kuluuroo waatoo le ti ka kuwolu bee timmandi, mennu be safeeriŋ.

Matiyu 7:2

Kaatu ali ye moo koteŋolu kiitindi ñaameŋ, ali fanaa be kiitindi la wo le ñaama, aduŋ ali ye a ke moolu ye ñaameŋ, a be ke la ali fanaa ye wo le ñaama.

Nahumu 1:2

Yaawe* Alla kiiliyaata le, aduŋ a ka juloo joo le, a ka juloo joo, aduŋ a ka kamfaa le famfaŋ, a ka juloo joo balannaalu to le, aduŋ a jusoo ka kandi a jawoolu kamma le.

Esekiyeli 21:22

Taamanseeroo be a yitandi la le ko a ñanta taa la bulubaa karoo le la ka taa Yerusalaamu. Wo kamma la a be kaŋo dii la le ka ì boyinkaŋ, a niŋ wuuroo ka moolu faa-faa laalaa, ka sansaŋ boyiraŋ doko baalu tiliŋ saatee dundaŋ daalu dandaŋo bee la, ka seleraŋolu fanaa loo saatee tata sansaŋo bala, aniŋ ka seleraŋ sapoolu* loo ko kelediŋolu ka a ke ñaameŋ niŋ ì ye saatewo suki.

Esekiyeli 17:18

A jututa kaloo le la ka kambeŋo tiñaa. Bayiri a sonta wo kambeŋo la le, a naata ñiŋ kuu siifaa ke, a te kana la muumeeke.”

Yeremiya 51:64

Bituŋ i si naa a fo ko, ‘Babiloni be tuuneŋ na teŋ ne, a te wuli la kotenke, ñiŋ kamma la Yaawe be kasaaroolu mennu boyi la a kaŋ. A niŋ a moolu be boyi la le.’ ” Yeremiya la kiilaariyaa kumoolu kumfaata jaŋ ne.

Yeremiya 51:36

Wo kamma la Yaawe ye ñiŋ ne fo ko: “A juubee, m be loo la ali la kuwo la le, ŋa juloo joo ali ye. M be Babiloni baajiyolu jandi la le, ŋa ì woyoolu jandi.

Yeremiya 51:25

“A juubee, m be looriŋ i kamma le, ite kasaaralilaa meŋ ye buŋ ko konkoo, ka kasaaroo ke duniyaa bee kono taariŋ. M be m buloo teeka la le, a ye laa i kaŋ, ŋa i birimintindi ka bo i turu jaŋo to naŋ, ŋa i jani fo i ye keremu.” Yaawe le ye a fo.

Yeremiya 50:14

“Alitolu kalafayilaalu bee, ali tembe keledaalu to Babiloni kamma, ka a murubeŋ. Ali a buŋ, ali kana hani kalabeñe kiliŋ tu fayibali, kaatu a ye junuboo le ke nte Yaawe la.

Yesaya 63:4

Kaatu ŋa ñiŋ soto n sondomoo kono le ko, luŋo meŋ na m be juloo joo la n jawoolu to, siita le, aniŋ m be kumakaaroo ke la saŋo meŋ na.

Yesaya 61:2

Yaawe ye n kii le ka a kankulaa ko a la maakoyiroo saŋo siita le, aniŋ a be juloo joo la a jawoolu to luŋo meŋ na. A ye n kii naŋ ne ka woosiilaalu sabarindi,

Yesaya 59:17

A ye tiliŋo kele dendikamaa le duŋ, a ye kiisoo kele naafamaa duŋ. A ye makatibayoo dendikamaa le duŋ, kamfaa be fudiriŋ a kono ko duŋ feŋo.

Jabuuroolu 149:7

Ì si wo ke ka julujoo taamandi bantalankoolu kaŋ, ka wo moolu jarabi,

Jabuuroolu 94:1

Hee Yaawe* Alla, ite le mu julujoolaa ti, ite Alla le mu julujoolaa ti. I semboo yitandi baŋ!

1 Samuweli 15:33

Bari Samuweli ko, “Ko i la hawusaroo ye musoolu ke dintaŋo ti ñaameŋ, saayiŋ i fanaa baamaa be ke la dintaŋo ti wo le ñaama musoolu kono.” Wo to le Samuweli ye Akaki kuntuŋ-kuntuŋ Yaawe ñaatiliŋo la Kilikali.

Yosuwa 6:20

Piriisoolu ye binoo fee. Kabiriŋ moolu ye binoo kumakaŋo moyi doroŋ, ì wuurita santo. Kabiriŋ ì sarita santo, saatewo tata sansaŋolu bee boyita. Bituŋ kataba kiliŋ, ì bee dunta saatewo kono, ì ye a muta.

Yosuwa 6:5

Niŋ ali ye bina feekaŋo moyi, meŋ loo jamfata, moolu bee si wuuri ñoo la santo. Saatewo tata sansaŋolu bee be boyi la le, bituŋ moolu si duŋ.

5 Musa 32:43

Hee, duniyaa moolu, ali Yaawe la moolu jayi. A be a la dookuulaalu yeloo bonnaalu joo la le, a be i joo la a jawoolu to le, a be a la moolu la bankoo seneyandi la le, junuboo ye meŋ kosondi.

5 Musa 32:41

M be n na hawusaroo daa diyaa la le, fo a ye malamala, ŋa sii n na kiitiisiiraŋo kaŋ. M be n joo la n jawoolu to le, ŋa moolu jarabi, mennu ye n koŋ.

5 Musa 32:35

Julujoo mu Yaawe le taa ti, a be ì joo la a ñaama le, ì be boyi la a waatoo la le, a te mee la, mantooroo be jii la ì kaŋ, maasiiboo be ì moonee la le.

Yeremiya 50:25

Nte Yaawe ye n na jooraŋ buŋo le daa yele, ŋa n na kamfaa jooraŋolu bondi naŋ, kaatu nte Yaawe Alihawaa Maariyo ka naa dookuwo le ke Babiloni bankoo kaŋ.

Yeremiya 50:44

Ko niŋ jatoo bota naŋ ñunkoo kono, Yoridani sutoo kono, ka naa boyinkaŋo la, kantari kene kendoolu to, m be a moolu bayi la bankoo kaŋ wo ñaama le, kataba kiliŋ. Ŋa moo-wo-moo tomboŋ, wo le be a mara la. Jumaa le niŋ nte si tembe noo, ka i loo m fee? Ñaatonka jumaa le si loo noo n ñaato?

Yeremiya 51:24

“Ali faŋolu be a je la ali ñaa la le, m be juloo meŋ joo la Babiloni niŋ a banku moolu to, ì ye kuu jawoolu mennu ke Siyoni la.

Yeremiya 51:30

Babiloni kelejawaroolu ye keloo bula le, ì tuta ì la tatoolu kono, ì jikilateyita le, ì lamfuta ko musoolu. Ì ye a saatee dundaŋ daalu kati, ì ye dimbaa duŋ buŋolu la.

Yesaya 59:18

Ì ye kuu jawoolu ke ñaameŋ, a be ì joo la wo le ñaama: A be a la kamfaa juloo joo la a jawoolu to le, yankankatoo, a sookilaalu ye, a be banku jamfariŋolu joo la ì ñaama le.