Yeremiya 49:28 - Mandinka Bible

²⁸ Ñiŋ kiilaariyaa kumoo le fota Kedari aniŋ Hasori mansamarali bankoolu ma, Babiloni mansakewo Nebukanesa ye mennu kele: Yaawe ye ñiŋ ne fo ko: “Wuli, i ye taa Kedari kele! Wo tilibo maafankoolu kasaara!

Yeremiya 49:28 ပူးပေါင်းရင်းမြစ်များ

Yesaya 11:14

Ì be Filisitinkoolu boyinkaŋ na ñoo la tilijii karoo la le, ì ye tilibolankoolu fanaa ñapinkaŋ. Ì si ì buloo laa Edomu niŋ Mowabi kaŋ, Ammoninkoolu ye soŋ ì ma.

Kiitindirilaalu 6:3

Niŋ Banisirayilankoolu ye fiiroo ke doroŋ, Midiyaninkoolu, Amalekinkoolu aniŋ tilibo banku koteŋo moolu si naa ka ì boyinkaŋ.

1 Musa 25:13

Isimayila dinkewolu toolu ka bo meŋ foloo wuluuta ka taa fo labaŋo: Nebayoti, Kedari, Adibeeli, Mibusamu,

Esekiyeli 27:21

“Araabuduunkoolu aniŋ ñaatonkoolu mennu bee be Kedari mu i la kiliyaanoolu le ti mennu ka saajiiriŋolu, saakotoŋolu, niŋ baalu saŋ, i niŋ ì ka ñinnu waafi ñoo ma le.

Yeremiya 49:14

Ŋa Yaawe la kiilaariyaa kumoo moyi le, kiilaa kiita bankoolu kaŋ ko: “Ali kafu ñoo ma ka taa Edomu kele, ali ye wuli a kamma keloo la!”

Yeremiya 2:10

Niŋ i teyita ka taa Kitimu baajooyoo to, waraŋ i ye moo kii Kedari bankoo kaŋ ka koroosiroo ke kendeke, i be a je la le fo ñiŋ kuu siifaa nene ka ke le.

Yeremiya 49:33

“Hasori be ke la kunkuwuloolu la daakaa le ti, ka kenseŋyaa fo fawu. Moo te sabati la jee, moo te sii la jee fereŋ.”

Yesaya 42:11

Mennu be sabatiriŋ keñewuloo* kono, ye sari santo, Kedari koomalankoolu ye seewoo ì la saateeriŋolu to. Selankoolu ye suukuwo laa kontaanoo kono, ì sari kaŋo ye bo naŋ konkoolu kaŋ.

Yesaya 21:13

Kiilaariyaa kumoo fele Araabuduu la kuwo to. Alitolu Dedaninkoolu, ali la juloolu la taama kafoo be jiyaa la yiri ñunkoo le kono, Araabuduu.

Suukuwo 1:5

Alitolu Yerusalaamu dimmusuriŋolu! M balafatoo finta le, bari n ñiiñaata, m be findiŋ ne ko Kedari tiriliisoo*, m be ñiiñaariŋ ko Sulemani la ridoo.

Yuuba 1:3

A ye saajii wuli woorowula le soto, ñonkome wuli saba, ninsi senelaa wuli kiliŋ, falimusu keme luulu, aniŋ dookuulaa jamaa. Ate le keta wo tilibo maafaŋo moolu bee la fankamaa baa ti.

1 Taarika 1:29

Ñinnu le mu ì koomalankoolu ti. Isimayila la karoo la: Nebayoti le mu dinkee foloo ti, Kedari be a nooma, Adibeeli, Mibusamu,

1 Musa 25:6

Bari a la kaŋ foroyandi musoolu* dinkewolu, a ye soorifeŋolu doroŋ ne dii wolu la, kabiriŋ a faŋo be baluuriŋ waatoo meŋ na. Bituŋ a ye ì bondi a dinkewo Isiyaaka bala ka taa bankoo kaŋ, meŋ be tilibo kara maafaŋo la.

Jabuuroolu 120:5

Kooroo boyita n kaŋ ne, a ka munta le m be siiriŋ Meseki moolu le kono, waraŋ Kedari moolu.

Yeremiya 25:23

Dedani, Tema, aniŋ Busi bankoolu fanaa, ka taa wo moolu mennu bee ka ì kuntiñoo dandaŋolu mesu,

Yeremiya 25:24

Araabuduu mansoolu bee fanaa, ka taa sii ñaamiriŋolu la mansoolu bee, mennu be siiriŋ keñewuloo* kono,