Yeremiya 46:14 - Mandinka Bible

¹⁴ “Ali a fo Misira bankoo kaŋ, ka a kankulaa Mikidoli saatewo kono jee, ka a kankulaa Memfisi, aniŋ Tapanesi. Ali a fo ko, ‘Misira, wuli i ye loo kuuke ka i paree keloo la, kaatu hawusaroo be kasaaroo naati la i kaŋ karoo bee le la.’

Yeremiya 46:14 ပူးပေါင်းရင်းမြစ်များ

Yeremiya 46:10

Bari luŋo ñiŋ mu nte Yaawe Alihawaa Maariyo* la luŋo le ti, julujoo luŋo, ka n joo n jawoolu to. Hawusaroo* be faaroo ke la le fo a ye tiiña, a ye i miŋ ì yeloo la fo a ye ñeeli. Kaatu nte Yaawe Alihawaa Maariyo be faari sadaaboo le ke la, maraa kara bankoo kaŋ, Yufurati Boloŋo daala.

Yeremiya 44:1

Yaawe* la kumoo naata nte Yeremiya kaŋ Yahuuda moolu bee la kuwo to mennu tarata siiriŋ Misira bankoo kaŋ. Ì tarata Mikidoli le, Tapanesi, aniŋ Memfisi saatewolu to, ka taa Patirosi tundoo kaŋ.

Nahumu 2:13

Yaawe Alihawaa Maariyo* ye ñiŋ kumakaŋo le fo Ninewe la kuwo to ko: “N niŋ i be janjuŋ na le! M be i la keleraŋ sareetoolu bee jani la le fo ì ye nunku lep. Hawusaroo le be i la kelediŋolu bee faa la. M be feŋolu bee buusi la ali la le, ali ye mennu ñapinkaŋ keloo kono. Wandi bankoolu nene te ali la kiilaa la kumakaŋo moyi la kotenke.”

Yeremiya 2:30

A ko: “Banisirayilankoolu, ŋa ali kuluu le, bari a maŋ nafaa soto. Ali maŋ soŋ tilindiroo la. Komeŋ jata konkoriŋo, ali ye ali la annabiyomoolu faa niŋ ali la hawusaroo* le la.

Yesaya 1:20

Bari niŋ ali maŋ soŋ, ali tuta balandiŋ, hawusaroo* le be ali faa la. Nte Yaawe faŋo le ye a fo.”

Yeremiya 12:12

Kasaaralilaalu naata niŋ keñewula tintiñaalu bee le la. Nte Yaawe ye keloo le naati niŋ hawusaroo* la, ka bankoo kasaara biriŋ tonkoŋ fo tonkoŋ. Moo te kayira soto la.

Yesaya 34:6

Yaawe la hawusaroo ñeelita yeloo la le, a fuumata keŋo la, saajiiriŋolu niŋ baalu keŋo, saakotoŋ kookiloolu keŋo. Yaawe be sadaa* le bo kaŋ Bosira, kanateyiri baa, Edomu bankoo kaŋ.

Yesaya 31:8

Hawusaroo* le be Asiriyankoolu faa la, meŋ te ke la hadamadiŋ hawusaroo ti, meŋ maŋ ke hadamadiŋ na teeka taa ti, wo le be ì kasaara la. Ì be a kata la ka bori ñiŋ hawusaroo la, bari ì la kelediŋolu be muta la le ka ke joŋolu ti.

2 Samuweli 2:26

Abuna ye Yowabu kumandi. A ko, “Fo m̀ be tu la keloo le la baŋ, ka ñoo faa, fo duniyaa ye kiri? Fo i maŋ a loŋ ko, a labaŋo be ke la niikuyaa le ti? Muŋ tuma le i be a fo la, i la kewolu ye i foño ì baadiŋolu bayindoo la?”

2 Musa 14:2

“A fo Banisirayilankoolu ye ko, ì ye muruŋ, ì ye taa daakaa Pi-Hahiroti maafaŋo la, Mikidoli niŋ baa teema. Ì ñanta daakaa la baa le daala, Baali-Sefoni ñaatiliŋo la.

5 Musa 32:42

N na kalabeñoolu be suuri la ì balajaatoo kono le, n na hawusaroo* ye i miŋ ì yeloo la, moo baramariŋolu niŋ mutamoolu yeloo, aniŋ jawu kuntiña jaŋolu.

Yesaya 19:13

Sowani maralilaalu keta toolewolu le ti, Memfisinkoolu la ñaatonkoolu ye ì faŋ neenee, siyolu la maralilaalu ye Misira filindi le.

Yeremiya 46:2

Foloo-foloo, Misira bankoo la kuwo to: Yahuuda mansakewo Yehoyakimu, Yosiya dinkewo la mansayaa sanji naaninjaŋo kono, ñiŋ ne keta kiilaariyaa kumoo ti Misira mansakewo Firawoona Neko la kelediŋolu ma. Babiloni mansakewo Nebukanesa ye itolu le noo keloo to Karikemisi, Yufurati Boloŋo daala. Yaawe ko:

Yeremiya 46:19

Ali ali la fudoolu parendi ka taa mutoo kono, alitolu Misirankoolu, kaatu Memfisi be kenseŋyandi la le, a ye tumbuŋ, moo te tara la siiriŋ jee.

Esekiyeli 21:28

Yaawe ko: “Ite hadamadiŋo, kiilaariyaa kumoo fo Ammoninkoolu ye. A fo ì ye, nte Yaawe Alla ye ñiŋ ne fo ì la kuwo to, aniŋ ì la nendiri kumoolu to ko: Ŋa hawusaroo le parendi ì kamma, ka ì faa. Ŋa a daa diyaa le, fo a ka ŋalasi ko saŋ ŋalasoo.

Esekiyeli 30:13

Maarii Yaawe ye ñiŋ ne fo ko: “M be ì la jalaŋolu kasaara la le, aduŋ m be daŋ ke la ì la baturoolu la le ì ka mennu ke Memfisi saatewo to. Mansariŋ nene te soto la Misira bankoo kaŋ kotenke. Wo kamma la, m be silaŋo le duŋ na Misirankoolu bee la.

Hoseya 9:6

Hani niŋ ali kanata kasaaroo ma, Misira si ali kumbeŋ ñoo kaŋ, ali ye baadee Memfisi saatewo to. Ñaamoo le be ali la kodiforoo kunuŋ na, ŋaniŋolu ye ali la tiriliisoolu* taa.

Yeremiya 2:16

Misirankoolu, mennu bota Memfisi, aniŋ Tapanesi saatewolu to, wolu ye ite Banisirayila kunkoloo teyi le.