Yeremiya 43:12 - Mandinka Bible

¹² A be dimbaa mala la Misira bankoo jalaŋ batudulaalu kono le. Nebukanesa si naa ì la jalaŋ doolu jani, a ye doolu taa ka ì samba ñoo la. A be Misira bankoo seneyandi la le, ko kantarilaa ka karankoolu seneyandi a la duŋ feŋolu bala ñaameŋ, aduŋ a be bo la jee le a ye taa kayira kono.

Yeremiya 43:12 ပူးပေါင်းရင်းမြစ်များ

Esekiyeli 30:13

Maarii Yaawe ye ñiŋ ne fo ko: “M be ì la jalaŋolu kasaara la le, aduŋ m be daŋ ke la ì la baturoolu la le ì ka mennu ke Memfisi saatewo to. Mansariŋ nene te soto la Misira bankoo kaŋ kotenke. Wo kamma la, m be silaŋo le duŋ na Misirankoolu bee la.

Yesaya 49:18

I dandaŋolu juubee, i ye a je, meŋ be ke kaŋ. I diŋolu bee benta le ka seyi i yaa.” Yaawe kalita ñiŋ ne la ko: “A be koyiriŋ ñaameŋ ko nte be baluuriŋ ne, i be kibiri la i diŋolu la kuwo la le, ko maañoo ka kibiri a la ñaroolu la ñaameŋ.

Yesaya 19:1

Kiilaariyaa kumoo fele Misira la kuwo to. A juubee, Yaawe* tariyaatoo le ka naa Misira, a ka naa niŋ saŋ tawaloo le la. Misira jalaŋolu be jarajara la a ñaatiliŋo la le, Misirankoolu kijoo ye teyi.

Yeremiya 48:7

Bayiri ali jikita ali la katoolu niŋ ali la naafuloolu le la, wo to ì be ali fanaa muta la le ka ali samba. Ì be ali la jalaŋo Kemosi samba la mutoo kono le, ka taa a la piriisoolu* niŋ a batubaalu.

Yeremiya 46:25

Yaawe Alihawaa Maariyo, Banisirayila la Alla ye ñiŋ ne fo ko: “A juubee, m be Misirankoolu la jalaŋo Amoni kuluu la le, meŋ be Tebesi saatewo to, aniŋ ñinnu bee: Misira bankoo niŋ a jalaŋolu bee, aniŋ a maralilaalu, ka taa Firawoona, aniŋ mennu bee be jikiriŋ a la.

Jabuuroolu 104:2

I ye i faŋ murubeŋ niŋ mala baa le la. Ite le ye saŋ fatoolu wanka ko tiriliisoo*.

Yuuba 40:10

Waroo niŋ kuliyaa dii i faŋ na, semboo niŋ horomoo dendikoo duŋ i faŋ na.

Esita 6:9

Bituŋ dendikoo niŋ suwoo si dii moo kiliŋ na mansa la maralilaa kummaalu kono. Ì si dendikoo duŋ moo la, mansa lafita ka meŋ buuñaa. Aduŋ a si wo selendi suwoo kaŋ, a ye yaayi a fee saatee sila fanuriŋolu to, a ye a la kuwo kankulaa ko, ‘Ali a juubee, mansa ka moo joo ñaameŋ, a lafita ka meŋ buuñaa.’ ”

2 Samuweli 5:21

Kabiriŋ Filisitinkoolu borita, ì ye ì la jalaŋolu tu kooma le, bituŋ Dawuda niŋ a la kewolu ye ì samba.

2 Musa 12:12

“M be tambi la Misira bankoo kaŋ wo suutoo le, aduŋ m be konoñaa foloolu bee faa la le, mennu be Misira bankoo kaŋ, hadamadiŋolu niŋ daafeŋolu bee. M be Misirankoolu la alloolu bee kiitindi la le. Nte le mu Yaawe ti.

Kolosankoolu 3:14

Wo feŋolu bee kunto, ali kanoo duŋ, meŋ ye feŋolu bee siti ñoo bala kambeŋ timmariŋo kono.

Kolosankoolu 3:12

Wo to, alitolu mennu mu Alla la tomboŋ moo senuŋolu niŋ kanuntewolu ti, ali ali la daajika kutoo duŋ, meŋ mu balafaa ti, mooyaa, fammajiyo, sooneeyaa aniŋ muñoo.

Efesusinkoolu 6:11

Ali kelejooraŋolu bee taa, Alla ye mennu dii ali la, fo ali si balaŋ noo Ibiliisa la feere jawoolu ma.

Efesusinkoolu 4:24

ali ye daajika kutoo duŋ, meŋ daata Alla sawuroo la ka tiliŋ tooñaa niŋ seneyaa soto.

Roomankoolu 13:12

Suukuuta, fani keta. Wo to, ali ŋà diboo la baara kuwolu landi jana, ŋà maloo la jooraŋolu duŋ.

Sefaniya 2:11

Yaawe be ì jaakalindi la le famfaŋ, a ye duniyaakono alloolu bee kasaara, ì ye mennu muta Alla ti. Bituŋ bankoolu moolu bee si naa sujudi ate doroŋ ye, moo-wo-moo a si a ke a faŋo la bankoo kaŋ.

Yeremiya 51:44

M be Babiloni jalaŋ Beli busa la le, a ye buusi feŋolu foonoo, a ye mennu kunuŋ. Duniyaa moolu te kuru la naŋ a nooma kotenke. Babiloni tata sansaŋolu be boyi la le.

Yeremiya 50:2

“Kiilaariyaa kumoo bankee bankoolu kaŋ ka a kankulaa, bandeeroo wulindi, i ye a kankulaa. Kana a ke kulloo ti, a fo ko, ì be Babiloni muta la keloo to le! Jalaŋ Beli be bula la maloo kono le, wo jalaŋ Merodaki be jikilateyi la le! Babiloni batufeŋolu be bula la maloo kono le, a jalaŋ ñewundiŋolu ye jikilateyi!

Yesaya 61:10

Yaawe la kuwo seewoo tambita n kunna le, n niyo laata n na Alla la karoo la le. Kaatu a ye kiisoo dendikamaa le duŋ n na, a ye tiliŋo warambamaa duŋ n na, ko maañootiyo ka i paree ñaameŋ, aniŋ ko maañoo ka a faŋo ñiiñandi a la ñaroolu la ñaameŋ.

Yesaya 61:5

Tumarankewolu le be ali la koorewolu kanta la, ka ali la kunkoolu aniŋ ali la wayini* yiri kankaŋolu dookuu ali ye.

Yesaya 59:17

A ye tiliŋo kele dendikamaa le duŋ, a ye kiisoo kele naafamaa duŋ. A ye makatibayoo dendikamaa le duŋ, kamfaa be fudiriŋ a kono ko duŋ feŋo.

Yesaya 52:1

Wuli, wuli! Hee Siyoni*, i ye i semboo taa! Yerusalaamu saatee senuŋo, i la dendika kendoo duŋ. Sunnabaloolu aniŋ moo kosoriŋolu te duŋ na i kono kotenke.

Yesaya 46:1

Beli niŋ Nebo, Babiloni jalaŋolu jimita le, ì maluriŋo boyita. Ì tarata laariŋ beeyaŋolu le kaŋ, ka ì samba. A keta ì ye duni baa le ti meŋ ye ì batandi.

Yesaya 21:9

Saayiŋ, a fele! Keleraŋ sareetoo niŋ a borindilaa fula be naa kaŋ!” Kiilaa ye a kankulaa le ko, “A boyita le! A boyita le! Babiloni boyita le! A jalaŋolu bee be teleŋ-telendiŋ ne, ì be fayiriŋ bankoo to.”

Jabuuroolu 132:18

A jawoolu wo, m be maloo dendikamaa le tu la dundiŋ ì la. Bari ate la mansanaafoo be tu la malamala la a kuŋo to le.”

Jabuuroolu 132:16

M be kiisoo dendikamaa le duŋ na a la piriisoolu la, aduŋ a la moo tilindiŋolu be tu la wuuroo niŋ seewoo le la.

Yesaya 46:2

Jalaŋolu jimita le, ì yuukuta ñoo la, ì maŋ ì faŋolu tankandi noo, ì ye ì samba mutoo kono.

Yeremiya 43:13

A be jalaŋ samasiŋolu boyi la le, ì ye mennu loo tiloo batudulaa buŋo to Misira bankoo kaŋ, aniŋ ka dimbaa duŋ Misira jalaŋolu batudulaalu la, ka ì jani.”

Yeremiya 49:27

“M be dimbaa duŋ na Damasiku tata sansaŋo la le, a ye Beni-Hadadi la tatoolu domo.”

Esekiyeli 29:11

Aduŋ hadamadiŋ nene te tambi la jee la, sako beeyaŋo si tambi niŋ jee la. Moo te tara la jee fo sanji taŋ naani.

Daniyeli 11:8

Wo koolaa a be ì la jalaŋolu muluŋolu samba la Misira le, a ye mennu taa keloo kono, aniŋ ì ye kodiforo jooraŋolu niŋ sani jooraŋolu mennu londi ì batoo kamma. A be sanji dantaŋ sii la le, a te Aramu mansa boyinkaŋ na.

Yeremiya 10:11

Yaawe ko: “Yeremiya, a fo ì ye ko: Wo alloolu mennu maŋ saŋo niŋ bankoo daa, ì be kasaara la le ka bo bankoo kaŋ, aniŋ ka bo saŋ fatoo koto.”

Yeremiya 10:15

Feŋ fuuriŋolu le mu, jelefeŋyaa feŋolu. Niŋ ì jarabi waatoo siita, ì be kasaara la wo le fee.

Yeremiya 25:19

Doo fanaa keta Firawoona, Misira mansakewo le ti, a la mansakundaa dookuulaalu, a la maralilaalu, ka taa a la moolu bee,

Esekiyeli 29:19

Maarii Yaawe ye ñiŋ fo ko: “Saayiŋ m be Misira bankoo duŋ na Babiloni mansakewo Nebukanesa bulu le. Aduŋ a be Misira fankoo bee taa la le ka ke ñapinkaŋ feŋo ti a ye. Wo le be ke la a niŋ a la kelediŋ kafoo la joo ti.