Yeremiya 31:7 - Mandinka Bible

⁷ Yaawe ye ñiŋ ne fo ko: “Ali seewooriŋo ye suukuwo laa Yaakuba ye, ali wuuri banku koteŋolu bee ñaatonkoo Banisirayila ye. Ali a kankulaa, ali ye jayiroo ke, ka a fo ko, ‘Hee Yaawe, i ye i la moolu kiisa le, Banisirayila toomaalu.’

Yeremiya 31:7 ပူးပေါင်းရင်းမြစ်များ

Yesaya 37:31

Yahuuda moo toomaalu mennu tuta baluuriŋ, be ke la le komeŋ yiroo, ka suloo duŋ bankoo duuma, ì ye diŋ santo.

Jabuuroolu 28:9

Yaawe, i la tomboŋ moolu tankandi, aduŋ i si neema ì ma. I si ke ì kantalaa ti, i ye ì topatoo.

Jabuuroolu 14:7

M be ñaaniriŋ ne fo kiisoo si bo Banisirayila ye naŋ Siyoni*. Niŋ Yaawe ye a la moolu murundi firiŋo kono, Yaakuba koomalankoolu si seewoo, Banisirayilankoolu bee si jusulaa.

Yeremiya 23:3

“Nte faŋo le be n na moo toomaalu bondi la naŋ bankoolu kaŋ, ŋa ì bayi ka taa daamennu to. M be ì murundi la naŋ ì taradulaa to le, aduŋ ì be jiidi la le ka siyaa.

Roomankoolu 11:5

Wo ñaa kiliŋo la, hani m̀ be temboo meŋ to teŋ, too doo tuta jee le, Alla ye mennu tomboŋ hiinoo kamma la.

Roomankoolu 9:27

Annabilayi Yesaya sarita Banisirayila la kuwo to le ko: “Hani Banisirayilankoolu siyaata ñaa-wo-ñaa ko bankumunkoo, dantaŋ ne be kiisa la,

Sefaniya 2:9

Wo kamma la nte Yaawe Alihawaa Maariyo*, Banisirayila la Alla ye ñiŋ ne fo ko: A be koyiriŋ ñaameŋ ko nte be baluuriŋ ne, Mowabi be ke la le ko Sodomu, Ammoninkoolu ye ke ko Komora. Jeelu si ke ñaamoolu falindulaa ti, aniŋ koo lewo, jeelu ye kenseŋyaa fo fawu. N na moolu mennu tuta baluuriŋ, wolu le be ì ñapinkaŋ na, n na moolu mennu tuta baluwo to, wolu le be ì la bankoo keetaa la.”

Mika 7:18

Alla koteŋ ne be keriŋ baŋ ko ite? Ite le ka junuboolu kafari i la moolu ye, mennu tuta baluuriŋ, ite le ka yamfa ì la sookiri kuwolu la. I la kamfaa buka tu fo abadaa, i ka lafi le ka tara hiinanteeyaariŋ doroŋ.

Mika 2:12

Yaawe ye ñiŋ ne fo ko, “Alitolu Yaakuba koomalankoolu, a be koyiriŋ ne ko, m be ali bee kafu la ñoo ma le. M be Banisirayila moo toomaalu bee kafu la ñoo ma le. M be ali ñaatonkayaa la, ko niŋ ì be saajiyolu kenkeŋ kaŋ ì la buŋo kono, ko niŋ ì be beeyaŋ koorewo kenkeŋ kaŋ daañini dulaa to. Hadamadiŋolu maakaŋo doroŋ ne be moyi la ñiŋ dulaa to ì la siyaa kamma.”

Amosi 5:15

Ali kuu kuruŋo koŋ, ali ye kuu kendoo kanu. Ali ye tooñaa sabatindi kiitiidulaalu to. A si ke noo Yaawe Alihawaa Maariyo ye naa hiinoo soto Yusufa koomalanka toomaalu ye.

Yoweli 2:32

Bari moo-wo-moo, meŋ ye Yaawe too kumandi, wo be kiisa la le. Siyoni Konkoo niŋ Yerusalaamu, moolu be soto la jee le, mennu be kana la, aniŋ moo toomaalu fanaa, Yaawe ye mennu tomboŋ, ko Yaawe ye a laahidi ñaameŋ.”

Hoseya 1:7

Bari m be balafaa soto la Yahuuda ye le, m be ì tanka la le ka bo niŋ nte Yaawe faŋo la, ì la Alla. N na a tankandoo te bo la niŋ kalabeñoo la, hawusaroo*, keloo, suwoolu waraŋ suu borindilaalu.”

Esekiyeli 6:8

“Mennu kanata keloo to, m be doolu tu la jee le, ì ye baluu, bari m be ì janjandi la bantala bankoolu* le kaŋ taariŋ.

Yesaya 61:9

Ì koomalankoolu te ke la moo maaboriŋ ti, bankoolu kaŋ, aduŋ mennu bota ì bala, be daraja la moolu kono le. Moo-wo-moo ye ì je, be soŋ na le ko, ñinnu mu moolu le ti, nte Yaawe neemata mennu ma.”

Yesaya 44:23

Hee saŋ fatoolu, ali suukuwo laa, kaatu Yaawe le ye ñiŋ ke. Hee duniyaa daŋo, sari santo. Alitolu konkoolu ali wutu suukuwo ti, aniŋ alitolu sutoolu niŋ ali la yiroolu bee, kaatu Yaawe ye Yaakuba kumakaa le, a ye a la semboo niŋ waroo yitandi Banisirayila.

Yesaya 37:4

Asiriya mansa ye a la kelediŋ kuntiyo kii le ka Alla baluuriŋo sooki. A si ke noo Yaawe, i la Alla, ye a la kumakaŋolu moyi le, a si a yankankati a kaŋ. Wo to duwaa moo toomaalu ye, mennu tuta jee.”

Yesaya 11:11

Wo luŋo la, Maariyo be a bulu sembemaa taa la le kotenke, ka moo toomaalu kaniŋ mennu tuta a la moolu kono, ka bo Asiriya, ka taa fo Misira bankoo bulubaa niŋ maraa la, ka bo Kusi*, Elamu, Babiloni, Hamati, aniŋ ka taa fo Baa Baa* borindoo la.

Yesaya 1:9

Niŋ Yaawe Alihawaa Maariyo* maŋ doolu tu ǹ ye jee nuŋ, ì ye baluu, m̀ be ke la le ko Sodomu niŋ Komora saatewolu.

Jabuuroolu 106:47

Hee Yaawe ǹ na Alla, m̀ bondi mutoo kono, ǹ seyindi ka bo banku koteŋolu kaŋ, fo ǹ si i tentu i too la kuliyaa kaŋ, aduŋ ǹ si jusulaa ka i jayi.

Jabuuroolu 69:35

Alla be Siyoni* kiisa la le, aduŋ a be Yahuuda saatewolu seyinkaŋ loo la le. A la moolu be sii la jee le, a ye ke ì taa ti.

Jabuuroolu 67:1

Alla, hiina ǹ ye, i ye neema m̀ ma, i ye i ñaa diyaa m̀ fee, S

5 Musa 32:43

Hee, duniyaa moolu, ali Yaawe la moolu jayi. A be a la dookuulaalu yeloo bonnaalu joo la le, a be i joo la a jawoolu to le, a be a la moolu la bankoo seneyandi la le, junuboo ye meŋ kosondi.

5 Musa 28:13

Yaawe be ali ke la kuŋo le ti, ali te ke la feñoo ti, ali la kuwo be sele la santo le, ali te jii la duuma muk, niŋ ali ye Yaawe ali la Alla la yaamaroolu muta kendeke, m be mennu dii kaŋ ali la bii.

Yeremiya 3:23

Tooñaa-tooñaa, jalambatoo maakaŋo konkoolu kaŋ taariŋ, wo mu ǹ ye neeneeroo le ti. Tooñaa-tooñaa, Yaawe ǹ na Alla le mu Banisirayila la kiisoo ti.

Yeremiya 20:13

Ali suukuwo laa Yaawe ye, ali ye a jayi! Kaatu a ye moo toorariŋolu niyo tankandi kuu jawu kelaalu bulu le.

Yeremiya 31:12

Ì be naa le ì seewootoo niŋ suukuwo ye wuuri Siyoni Konkoo kaŋ, aduŋ nte Yaawe ye beteyaa meŋ yitandi ì la, wo be ì faramansandi la le, i la fiifeŋolu la karoo la, siimaŋo, wayini* yiridiŋ jiyo, aniŋ olifu* tuloo, ka taa saajiyolu niŋ ninsoolu la jiidoo. Ì la baluwo be ke la le ko naakoo meŋ jiibonta kendeke, aduŋ ì niyo te toora la kotenke.

Niikuyaa Suukuwolu 1:1

Ayiwaalii, ñiŋ saatewo le kiideeriŋo be siiriŋ teŋ, meŋ be faariŋ nuŋ moolu la tep! A naata ke furuyaamusoo ti teŋ, meŋ na kuwo warata nuŋ bankoolu kono! Ate meŋ keta saatewolu kono musumansoo* ti, a naata ke jommusoo ti.

Jabuuroolu 126:2

Ǹ tuta jele la le, ǹ seewooriŋ baa ye suukuwolu laa. Bituŋ banku koteŋolu moolu ko ñoo ye ko, “Hee, Yaawe ye kuu baalu le ke ì ye.”

Yesaya 52:8

Ali i lamoyi! Fo ali maŋ ali la kantarilaalu kaŋo moyi baŋ? Ì ye ì kaŋo sikandi santo le, ì ye suukuwo laa ñoo la seewoo kono, ì be a je la ì faŋo ñaakesoo le la, Yaawe be muruŋ kaŋ Siyoni.