Sefaniya 1:11 - Mandinka Bible

¹¹ Ali kumboo alitolu mennu be Saatewo Duumoo to, kaatu ali la safaarilaalu bee le be faa la, kodiforo peesalaalu bee ye kasaara.

Sefaniya 1:11 ပူးပေါင်းရင်းမြစ်များ

Yankuba 5:1

Alitolu fankamaalu, ali i lamoyi! Ali ye woosii niŋ kumboo baa la maasiiboolu kamma la, mennu ka naa laa ali kaŋ.

Esekiyeli 21:12

“Wo to, ite hadamadiŋo, kumboo fo i ye lemba, kaatu ñiŋ mantooroo meŋ ka naa teŋ, a be laa la n na moolu le kaŋ. Banisirayila maralilaalu niŋ moo toomaalu bee be faa la keloo le to. Wo kamma la, kumboo fo i ka sikisiki, niikuyaa kamma la.

Yeremiya 25:34

Alitolu kantarilaalu, kooree ñaatonkoolu, ali wuuri ka kumboo, ali ye i bidibidi seebuutoo kono, kaatu ali kanateyi luŋo siita le, aduŋ ali be boyi la le ka janjaŋ ko daandiŋ kekuuriŋo.

Yohana 2:16

Bituŋ a ko wo moolu ye, mennu be puraalu waafi kaŋ, “Ali ñiŋ feŋolu bondi jaŋ, ali kana m Faamaa la buŋo ke marisewo ti.”

Yoweli 1:13

Alitolu piriisoolu, ali booto funtoo duŋ, ali ye woosii, ali kumboo, alitolu Alla la sadaabolaalu. Alitolu, n na Alla la dookuulaalu, ali naa, ali ye suutoo bee ke booto funtoo kono. Siimaŋ sadaa niŋ miŋ feŋ sadaa danta ali la Alla Batudulaa Buŋo to.

Yoweli 1:5

Ali wuli, alitolu siiratoolu, ali ye kumboo, alitolu wayini* minnaalu bee, ali wayini timiyaariŋo woosii, kaatu ali la a miŋo kuntuta le.

Hoseya 9:6

Hani niŋ ali kanata kasaaroo ma, Misira si ali kumbeŋ ñoo kaŋ, ali ye baadee Memfisi saatewo to. Ñaamoo le be ali la kodiforoo kunuŋ na, ŋaniŋolu ye ali la tiriliisoolu* taa.

Yeremiya 4:8

Wo kamma la ali booto funtoolu duŋ niikuyaa kamma, ali ye kumboo ka wuuri, kaatu Yaawe la kamfaa baa maŋ bo ǹ kaŋ.

Yuuba 27:16

Moo kuruŋo si kodiforo buutoo soto, aniŋ duŋ feŋ jamaa, ka tambi a la suuloo la,

Yuuba 27:17

bari moo kendoolu le be naa wo feŋolu duŋ na, aduŋ moo tilindiŋolu le fanaa be naa wo kodiforoolu talaa la ñoo teema.

Sefaniya 2:5

Kooroo be alitolu Filisitinkoolu ye, alitolu mennu be siiriŋ baa daala Kanaani bankoo kaŋ. Yaawe la kumakaŋo ye alitolu le maa ko, “M be ali bee le kasaara la, hani moo te tu la.”

Jakariya 14:21

Kaleera-wo-kaleera meŋ be Yerusalaamu aniŋ Yahuuda bankoo bee kaŋ, be kerekere la Yaawe ye le, Alihawaa Maariyo. I si a je, moolu mennu naata sadaaboo la, si ì taa noo ka ì la beeyaŋ sadaa* suboo tabi ì kono. Wo luŋo la, a te jari la waafirilaalu ye tara kotenke Yaawe Batudulaa Buŋo kono, Alihawaa Maariyo.