Jabuuroolu 60:12 - Mandinka Bible

¹² Niŋ ite Alla be m̀ fee, m̀ be nooroo ke la le. Ite le be ǹ jawoolu dori la duuma.

Jabuuroolu 60:12 ပူးပေါင်းရင်းမြစ်များ

Jabuuroolu 44:5

Ite le ye m̀ maakoyi ka ǹ jawoolu ñori duuma, ka bo niŋ i semboo la ǹ ka m̀ boyinkannaalu dori le.

Yosuwa 1:9

Kana ñina ŋa yaamaroo meŋ dii i la, ka fatiyaa, aniŋ ka bambaŋ. Kana sila, i kana jikilateyi, kaatu nte Yaawe i la Alla le be tara la i fee, i taata daa-wo-daa.”

Yesaya 63:3

“N na kamfaa kono, ŋa n jawoolu dori le, komeŋ ì ka wayini yiridiŋolu dori ì bitidulaa ñaameŋ. Nte dammaa le ye wo dookuwo ke, moo maŋ bo banku to meŋ si m maakoyi. Ŋa n tuu n jawoolu kaŋ ne, n na jusuboo waatoo kono. Ì yele noo le be n na dendikoo bala.

Lankenemoo 19:15

Hawusari* daa diimaa fintita naŋ a daa kono, a be duniyaa nasiyoŋolu sepu la meŋ na. A be ì mara la niŋ needokoo le la, aduŋ a be ì dori la wo yiridiŋ bitidulaa kono le, meŋ mu Alla Mansa Tallaa la kamfaa jawu baa ti.

Malaki 4:3

Luŋo meŋ na m be maamaŋ na, wo luŋ ali si moo kuruŋolu dori, ì ye ke ali siŋolu koto ko buutoo. Nte Yaawe Alihawaa Maariyo le ye a fo.

1 Taarika 19:13

Ǹ si bambaŋ! Ŋà fatiyaa ka keloo ke ǹ na moolu la kuwo kamma la, aniŋ ǹ na Alla la saatewolu la kuwo kamma la. Meŋ benta Yaawe fee, a be wo le ke la.”

Jakariya 10:5

Ì be ke la le ko kelejawaroolu, mennu ka ì jawoolu dori potoo kono mbeedoolu kaŋ. Ì si keloo ke kendeke, kaatu nte Yaawe be ì fee le. Ì si ì jawoolu malundi, hani mennu be suwoolu kaŋ.

Yesaya 10:6

Ŋa a kii banku le kaŋ, meŋ ye a koo dii n na. Ŋa a kii moolu le kaŋ, mennu ka n kamfandi, ka i tuu ì kaŋ ko potoo meŋ be mbeedoolu kaŋ, ka ì ñapinkaŋ ka ì la feŋolu taa.

Jabuuroolu 144:1

Tentoo be Yaawe* ye, n na semberaŋ beroo, ate le ye n nindi keloo la, fo m buloo koyita lewu.

Jabuuroolu 118:16

A bulubaa buloo le ye nooroo saabu m̀ ma, Yaawe semboo warata le.”

2 Samuweli 10:12

I si bambaŋ, ŋà fatiyaa, ka keloo ke ǹ na moolu la kuwo kamma la, aniŋ ǹ na Alla la saatewolu la kuwo kamma. Meŋ benta Yaawe* fee, a be wo le ke la.”

Yosuwa 14:12

Saayiŋ ñiŋ konkotundoo* dii n na, Yaawe ye n laahidi meŋ na wo luŋo la. Ite faŋo ye a moyi le ko, Anaki koomalankoolu be jee le, ì la saatewolu warata le, aduŋ ì ye ì tata le fanaa. Niŋ Yaawe la deemaaroo laata n kaŋ, m be ì bee bayi la le, ko a ye a fo ñaameŋ.”

Jabuuroolu 44:10

I ye a tinna le ǹ ka bori ǹ jawoolu la, aduŋ mennu ye ǹ koŋ ka ǹ na feŋolu ke ñapinkantaa le ti.