Jabuuroolu 112:10 - Mandinka Bible

¹⁰ Moo kuruŋolu si wo je, ì ye kamfaa. Ì si i ñimmakiŋ, aduŋ ì niŋ wo le ka faa. Moo kuruŋo hame kuwo ka naa ke kuu kenseŋo le ti.

Jabuuroolu 112:10 ပူးပေါင်းရင်းမြစ်များ

Luka 13:28

“Jee le to, ali be kumboo la, ali ye nimisa, niŋ ali ye Iburayima, Isiyaaka niŋ Yaakuba je Alla la mansabaayaa kono, ì niŋ annabiyomoolu bee, bari ali faŋolu be fayi la banta le.

Kuma Kotoomaalu 11:7

Niŋ moo kuruŋo faata, a la jikoo ka tiñaa le, aduŋ a hame kuwo ka ke a ye kenseŋo le ti.

Kuma Kotoomaalu 10:28

Moo tilindiŋolu la jikoo ka labaŋ ì ye seewoo le la, bari moo kuruŋolu la jikoo ka ke ì ye kenseŋo le ti.

Jabuuroolu 86:17

Yaawe, i la konotodiyaa taamanseeroo yitandi n na, fo mennu ye n koŋ ì si malu, niŋ ì ye wo je, i la m maakoyoo niŋ n jusulandoo kamma la.

Jabuuroolu 37:12

Moo jawoo ka feeroo siti moo tilindiŋo kamma le, fo a ka i ñimmakiŋ a kamma.

Yuuba 8:13

Moolu mennu bee ka ñina Alla la, la siniŋ saamoo ka ke teŋ ne. Moo kuruŋo niŋ jiki buka faa.

Matiyu 22:13

Wo to le mansakewo ko a la dookuulaalu ye ko, ‘Ali a siŋolu niŋ a buloolu siti, ali ye a fayi banta diboo kono, kumboo niŋ nimisoo be daameŋ.’

Matiyu 8:12

Bari moolu mennu ñanta tara la Alla la mansabaayaa kono, wolu be fayi la banta le diboo kono, kumboo niŋ nimisoo be daameŋ.”

Nehemiya 2:10

Samballati Horoninkoo, aniŋ Tobiya Ammoninkoo meŋ ka dookuwo ke mansakundaa ye, kabiriŋ ì ye ñiŋ moyi, ì niyo kuyaata baake le, kaatu moo le naata ka Banisirayilankoolu la kuwo topatoo.

Yuuba 20:7

ì si halaki fo fawu ko ì faŋolu la kenetotaa, meŋ nene ka ì je nuŋ, si ñininkaaroo ke, ì be daameŋ.