Habakuki 2:8 - Mandinka Bible

⁸ Ali ye banku jamaa le ñapinkaŋ, ì niŋ ì la feŋolu. Wo to moolu mennu kanata wo bankoolu moolu kono, fanaa be ali ñapinkaŋ na le. Kaatu ali ye hadamadiŋolu le yeloo boŋ, ali ye bankoolu kasaara, saatewolu, ì niŋ ì moolu bee.”

Habakuki 2:8 ပူးပေါင်းရင်းမြစ်များ

Yesaya 33:1

Kooroo be boyi la ite kasaaralilaa kaŋ ne, moo maŋ ite meŋ kasaara. Kooroo be boyi la ite jamfaalaa kaŋ ne, moo maŋ ite meŋ jamfaa. Niŋ i ye i foño kasaaraloo la, hani wo, i be kasaara la le. Niŋ i ye i foño jamfaamooyaa la, wo to le jamfaa kuwo be naa ke la i la.

Habakuki 2:17

Ali ye Libanooni yiroolu kuntu, ali ye a daafeŋolu kasaara. Ali ye hadamadiŋolu yeloo boŋ, ali ñapita bankoolu kaŋ, saatewolu, ì niŋ ì moolu bee. Wo kamma la, saayiŋ toora kuwo le be boyi la ali fanaa kaŋ.”

Yeremiya 27:7

Banku koteŋolu bee le be a batu la, ka taa hani a dinkewo niŋ a mamarinkewo fanaa, fo a fanaa la bankoo boyindi waatoo ye sii. Wo to le banku baalu niŋ mansakee baalu si naa a la bankoo ke ì la marataa ti.

Lankenemoo 6:10

Ì sarita niŋ sari baa la ko: “M̀ Maarii Mansa Tallaa! Ite meŋ jankuta, ite meŋ mu tooñaa ti, fo i la kiitiyo be mee la le hani saayiŋ? Waati jumaa le i be moolu joo la, mennu ye ntolu faa?”

Jakariya 14:12

Ñiŋ ne be ke la alibalaa kuuraŋo ti, Yaawe be meŋ laa la bankoolu bee kaŋ, mennu ye keloo boyi Yerusalaamu kaŋ: Ì si tara looriŋ ì siŋo la, ì balajaatoo ye toli, ì ñaakesoo ye toli ì ñaa hubomboo kono, ì neŋo ye toli ì daa kono.

Jakariya 1:15

M be kamfaariŋ bankoolu kamma le kendeke, mennu be siikuuriŋ tankoo kono. Kaatu ŋa ì taa le ka n na moolu jarabi n na kamfaa kaŋ, bari itolu ye ì mantoora jawuke le fo a tambita.

Habakuki 2:10

Ali la feeroolu sitoo ka moo jamaa kasaara, wo be ali la dimbaayaalu duŋ na maloo le kono, alitolu faŋolu ye foo ali niyolu la.

Yeremiya 51:48

Bituŋ saŋo niŋ bankoo, aniŋ ì kono feŋolu bee si seewoo, ka wuuri Babiloni kunna, kaatu tiñaarilaalu le be naa a kamma, ka bo naŋ maraa kara maafaŋo la.” Yaawe le ye a fo.

Yeremiya 51:44

M be Babiloni jalaŋ Beli busa la le, a ye buusi feŋolu foonoo, a ye mennu kunuŋ. Duniyaa moolu te kuru la naŋ a nooma kotenke. Babiloni tata sansaŋolu be boyi la le.

Yeremiya 51:24

“Ali faŋolu be a je la ali ñaa la le, m be juloo meŋ joo la Babiloni niŋ a banku moolu to, ì ye kuu jawoolu mennu ke Siyoni la.

Yeremiya 51:13

Yaawe ko, “Ite Babiloni saatewo meŋ be siiriŋ jii jamaalu daala, i la naafuloo be siyaariŋ, i labaŋo le siita, i la baluwo juloo kuntuta le.

Yeremiya 51:8

Waati kiliŋ, Babiloni boyita ka teyiŋ-teyiŋ. Ali kumboo a ye! Ali booroo naati a la baramoo ye, tumandoo a be kendeyaa la le.”

Yeremiya 50:37

Hawusaroo be naa a suwoolu kamma le, aniŋ a keleraŋ sareetoolu, aniŋ a la banku koteŋ kelediŋolu bee kamma, fo ì si lamfu ko musoolu! Hawusaroo be naa a naafuloolu bee kamma le, fo ì si ke ñapinkaŋ feŋolu ti!

Yeremiya 50:28

Ali i lamoyi moolu wuurikaŋo la, mennu borita keloo la, ì kanata, ì naata Yaawe, ǹ na Alla la julujoo dantee Siyoni, a la julujoo Babiloninkoolu to, ì ye meŋ ke a la Batudulaa Buŋo* la.

Yeremiya 30:16

“Bari silaŋ, mennu ye i baluu ali la, ì fanaa be ke la baluutaa ti le, aduŋ ali konnantewolu kiliŋ-wo-kiliŋ be taa mutoo kono le. Mennu ye ali ke ñapinkaŋ feŋo ti, ì be ke la ñapinkaŋ feŋo ti le. Mennu ye ali ke buusi feŋo ti, ì be ke la buusi feŋo ti le.

Yesaya 47:6

Kabiriŋ n kamfaata n na moolu kamma, m maŋ ì ke m faŋo taa ti kotenke, ŋa ì duŋ i bulu le, bari i maŋ balafaa soto ì ye. I ye duni kuliŋ baa laa keebaa kotoolu faŋo kaŋ ne.

Yesaya 33:4

Niŋ wo keta, ì si ñapi jawoolu la feŋolu kaŋ komeŋ kuntiŋ ñatoolu. Feŋ-wo-feŋ keta ì taa ti, ì si a bee buusi ì bulu.

Jabuuroolu 137:8

Ite Babiloni kasaaratoo diŋ, seewoo be moo le ye meŋ be i joo la kuwo la i ye meŋ ke ntolu la.

Yeremiya 50:14

“Alitolu kalafayilaalu bee, ali tembe keledaalu to Babiloni kamma, ka a murubeŋ. Ali a buŋ, ali kana hani kalabeñe kiliŋ tu fayibali, kaatu a ye junuboo le ke nte Yaawe la.

Esekiyeli 28:16

I niŋ banku jamaa niŋ moo jamaa le ka julayaa ke. I la jawuyaa naata lafaa-lafaa laalaa. I ka tu junube kewo doroŋ ne la. Wo kamma la, ŋa i bayi le ka bo Alla la konko senuŋo* kaŋ, ka i malundi. Ite meŋ keta wo kantarilaa malaayikoo ti nuŋ, ŋa i bayi wo bere dimbaamaalu kono le.

Esekiyeli 39:10

I si a je, ì te suula la ka taa loo ñinoo la wuloo kono, waraŋ ka yiroolu kuntu sutoo kono, kaatu ñiŋ kelejooraŋolu le be ke la ì ye loo ti. Ì be ñapi la wo ñapinkannaalu kaŋ ne ka wo ñapinkaŋ feŋolu taa ì bulu, mennu ye ì la feŋolu buusi ì la nuŋ.” Maarii Yaawe le ye a fo.

Amosi 3:10

Ì ye feŋolu le kafu ñoo ma suuñaaroo niŋ fitinoo kono, ka ì maabo ì la buŋolu kono. Ì maŋ a loŋ kuu tilindiŋo ka ke ñaameŋ.” Yaawe le ye a fo.

Obadiya 1:15

“Luŋo sutiyaata naŋ ne, nte Yaawe be bankoolu bee kiitindi la meŋ na. Ali ye juloo meŋ duŋ, wo le be joo la ali to. Ali la baara kuwolu be kupi la ali faŋolu kuŋo le kaŋ.

Kuma Kotoomaalu 22:23

kaatu Yaawe le be loo la ì ye, aduŋ moo-wo-moo ye ì la feŋolu taa, a be i niyo taa la le.