Esita 4:8 - Mandinka Bible

⁸ Aduŋ a ye ì kasaaralaŋ kankulaari kayitoo dii a la le meŋ be janjandiŋ Susa ka a yitandi Esita la aniŋ ka kuwo keñaa bee fo a ye. A ko a ye le, a ye a yaamari fo a si taa mansa ñaatiliŋo la, ka balafaa ñini aniŋ ka daaniroo ke a la moolu la kuwo la.

Esita 4:8 ပူးပေါင်းရင်းမြစ်များ

Kawandilaa 10:4

Niŋ maralilaa kamfaata i kamma, tu i be daameŋ. Niŋ i tuta tenkundiŋ, wo le be kuwolu sumayandi la.

Yuuba 9:15

M be tooñaa kaŋ ñaa-wo-ñaa, n te m faŋ kanandi noo la. Nte si meŋ ke noo, wo le mu, ŋa balafaa ñini a bulu, ate meŋ mu kiitiikuntulaa ti.

Esita 2:20

Bari Esita ye a la bankudiŋyaa maabo le, aniŋ a la moolu la kuwo, ko Moridekayi ye a fo a ye ñaameŋ. A tententa le ka Moridekayi la yaamaroo muta, ko a ye a ke nuŋ ñaameŋ, kabiriŋ a dindiŋ.

1 Timoti 6:17

Moolu mennu fankata ñiŋ duniyaa kono, wolu dandalaa fo ì kana ì faŋ wara, waraŋ ka ì jikoo loo naafuloolu kaŋ, jiki te mennu la kuwo to. Wo noo to, ì si ì jikoo loo Alla kaŋ, meŋ ye ǹ na suuloolu bee topatoo siyaarinke ǹ na seewoo ye.

1 Timoti 6:13

M be i yaamari la bambandinke Alla ñaatiliŋo la, baluwo bee ka bo meŋ bulu, aniŋ Kiristu Yeesu ñaatiliŋo la, meŋ ye seedeyaa betoo ke Pontiyus Payileti ñaatiliŋo la,

Kiilaalu 12:20

Mansa Herodi kamfaata baake Tirenkoolu niŋ Sidoninkoolu kamma. Bituŋ wolu naata deŋ kaŋ kiliŋ na, ì naata a kaŋ. Balastus meŋ be marariŋ dookuwolu la, mansakewo la koridaa kono, ì ye wo ke ì teerimaa ti. Ì ye kayiroo daani, kaatu ì la domori sotoo be dendiŋ Herodi la bankoo le la.

Kuma Kotoomaalu 21:1

Mansa sondomoo la kuwo be Yaawe* le bulu, a ka a taamandi le ko jiiboroo, daa-wo-daa diyaata a ye, a ka a tilindi jee le to.

Esita 8:6

Fo m be ñiŋ muña noo la le ka a je, maasiiboo ye boyi n na moolu kaŋ? M be ñiŋ muña noo la ñaadii le, ka a je m baadiŋolu ye kasaara?”

Esita 4:9

Hataki muruta, a taata a fo Esita ye Moridekayi ye meŋ fo.

Jabuuroolu 122:6

Ali duwaa Yerusalaamu la kayiroo la, ka a fo ko, “Allamaa moolu firiŋ na, mennu ye i kanu.