Esira 5:12 - Mandinka Bible

¹² Bari m̀ mumuñolu ye Arijana Maarii kamfandi le, wo le ye a tinna a ye ì duŋ Kalideyankoo Nebukanesa bulu, Babiloni mansakewo. A ye ñiŋ buŋo tiñaa le, aniŋ fanaa a ye moolu muta le ka ì samba Babiloni.

Esira 5:12 ပူးပေါင်းရင်းမြစ်များ

Daniyeli 9:5

Ŋà junuboo ke le, ŋà kuu kuruŋo ke, ŋà hakoo soto baake le, aduŋ m̀ balanta i ma le, ŋà ǹ koo dii i la yaamaroolu la, aniŋ i la karandiroolu.

2 Mansoolu 24:2

Bituŋ Yaawe* ye boyinkannaalu kii ka naa Yahuuda bankoo kasaara, ko a ye a fo nuŋ ñaameŋ ka bo niŋ a la dookuulaalu la, annabiyomoolu. Wo boyinkannaalu le mu Babiloninkoolu ti, Aramunkoolu, Mowabinkoolu, aniŋ Ammoninkoolu.

Yeremiya 5:29

Fo m maŋ ñaŋ na ì jarabi la ñiŋ na baŋ? Fo m maŋ ñaŋ na juloo joo la ñiŋ banku siifaa to baŋ?” Yaawe le ye a fo.

Jabuuroolu 106:40

Bituŋ Yaawe kamfaabaata a la moolu kamma, aduŋ a ñewunta ì la le, itolu mennu mu a la tomboŋ moolu ti.

2 Mansoolu 25:1

Wo tumoo Sedekiya tarata a la mansayaa sanji konontonjaŋo le kono, meŋ keta saŋo kari tanjaŋo tili tanjaŋo ti. Wo waatoo le mu Babiloni mansa Nebukanesa faŋo niŋ a la kelediŋolu bee wulita naŋ Yerusalaamu kamma. A niŋ a la kelediŋolu ye ì la daakaa loo ka jee muruŋ-muruŋ. Ì ye seleraŋolu loo saatewo bala.

Kiitindirilaalu 6:1

Banisirayilankoolu ye kuu jawoo ke Yaawe* ñaa koto kotenke. Bituŋ a naata ì duŋ Midiyaninkoolu bulu fo sanji woorowula.

Kiitindirilaalu 4:2

Bituŋ Yaawe ye ì duŋ Yabini buloo kono, Kanaani mansa, meŋ be maraloo la Hasori saatewo to. A la kelediŋ kafu kuntiyo mu Sisera le ti, meŋ bota Haroseti-Hakoyimu.

Kiitindirilaalu 2:14

Yaawe naata kamfaa Banisirayilankoolu kamma baake. A ye ì duŋ boyinkannaalu bulu ka ì la feŋolu taa. A ye ì jawoolu marandi ì la karoo bee la. Ì maŋ naa i loo noo ì fee kotenke.

5 Musa 32:30

Moo kiliŋo, wo si moo wuli kiliŋ bayi noo ñaadii le, moo fula ye wuliwuloolu borindi, fo niŋ Yaawe, ì la semberaŋ beroo bota ì koto, a ye ì duŋ ì jawoolu bulu?

5 Musa 31:17

Wo luŋo la, m be kamfaajawu la ì kamma le. M be n koo dii la ì la le, ŋa maabo ì ma, ì ye kasaara. Toora kuu jamaa si laa ì kaŋ, aniŋ kuu jawu jamaa. Wo luŋo le mu ì be a fo la ko, ‘Ñiŋ kuu jawoolu bee laata ǹ kaŋ, kaatu ǹ na Alla maŋ tara m̀ fee.’

Yeremiya 52:12

Wo saŋo kari luulunjaŋo tili tanjaŋo la, a ye a tara Babiloni mansa Nebukanesa be a la mansayaa sanji taŋ niŋ konontonjaŋo le kono. Wo saŋo le mu Babiloni mansa kantalaa kelediŋolu la kuntiyo, Nebusaradani naata Yerusalaamu.

2 Taarika 36:20

Mennu kanata hawusaroo ma, a ye wolu samba mutoo kono Babiloni, aduŋ ì keta a niŋ a koomalankoolu la joŋolu ti, fo janniŋ Perisiya mansamarali bankoo be maraloo ke la.

Yesaya 47:6

Kabiriŋ n kamfaata n na moolu kamma, m maŋ ì ke m faŋo taa ti kotenke, ŋa ì duŋ i bulu le, bari i maŋ balafaa soto ì ye. I ye duni kuliŋ baa laa keebaa kotoolu faŋo kaŋ ne.

Yeremiya 51:59

Ñiŋ ne keta kiilaariyaa kumoo ti, nte Yeremiya ye Seraya yaamari ka meŋ samba Babiloni, biriŋ Yahuuda mansakewo Sedekiya niŋ Seraya be taa kaŋ ñoo la jee. Wo waatoo Sedekiya be a la mansayaa sanji naaninjaŋo le kono. Seraya mu Neriya dinkewo le ti, Maseya mamariŋo. Ate le ka mansa la domoroo niŋ buŋ kuwo topatoo taama dulaa to.