Esekiyeli 30:3 - Mandinka Bible

³ Yaawe la luŋo sutiyaata naŋ ne. A luŋo siita naŋ ne, a be ke la tooroo luŋo le ti. A be ke la diboo waatoo le ti. Wo le be ke la duniyaa bankoolu la kasaaroo luŋo ti.

Esekiyeli 30:3 ပူးပေါင်းရင်းမြစ်များ

Obadiya 1:15

“Luŋo sutiyaata naŋ ne, nte Yaawe be bankoolu bee kiitindi la meŋ na. Ali ye juloo meŋ duŋ, wo le be joo la ali to. Ali la baara kuwolu be kupi la ali faŋolu kuŋo le kaŋ.

Esekiyeli 34:12

Ko kantarilaa ka a la saajii filiriŋolu ñini ñaameŋ, niŋ a la saajii doolu janjanta ka taa kara doo la, m be taa n na saajiyolu ñini la wo le ñaama. M be ì bondi la naŋ dulaalu bee to le ì be janjandiŋ daamennu to, kasaaroo luŋo la, minaayoo niŋ dibi feŋ baa luŋo la.

Esekiyeli 30:18

Wo luŋo be ke la luŋ dibiriŋ ne ti Tapanesi saatewo kono, niŋ ŋa Misirankoolu la kaŋo niŋ ì semboo bee tiñaa ì bulu, ì ye mennu soto bankoo doolu kunto. I si a je, ì la faŋ waroo meŋ ye a tinna ì ka kibiri, si daŋ. A be ke la diboo waatoo le ti Misira bankoo kaŋ, aniŋ a wo moo toomaalu ye taa mutoo kono.

Esekiyeli 7:12

Waatoo siita le, luŋo siita le. Feŋ sannaa kana seewoo, waraŋ waafirilaa si woosii. Kaatu yankankatoo be laa la moo bee le kaŋ.

Esekiyeli 7:7

Kasaaroo naata ali kaŋ ne, alitolu mennu be siiriŋ bankoo kaŋ. Waatoo naata le. Luŋo sutiyaata naŋ ne. Kijafara luŋo le mu, seewoo te ke la konkoolu kaŋ.

Sefaniya 1:14

Yaawe la ñiŋ luŋ baa be sutiyaa kaŋ naŋ ne, a ka naa le, a be sutiyaa kaŋ naŋ ne famfaŋ. Yaawe la ñiŋ luŋo la, kumboo kaŋo be moyi la le, a niikuyaa be wara la baake. Hani kelejawaroolu, ì be lemba la le.

Sefaniya 1:7

Ali i deyi Maarii Yaawe ñaatiliŋo la. Yaawe la luŋo sutiyaata naŋ ne. A be pareeriŋ ne ka a la moolu kanateyi ko beeyaŋ sadaa*, aduŋ a ye ì jawoolu le buuñaatoo kumandi a sadaa domoo to.

Yoweli 1:15

Kooroo luŋ, luŋ koleŋ baa! Yaawe la luŋo sutiyaata naŋ ne, luŋo meŋ Alla Tallaa be kasaaroo naati la naŋ.

Esekiyeli 32:7

Niŋ ŋa i fintindi naŋ banta, m be saŋ fatoo bee muuri la le, looloolu bee ye dibi, ŋa tiloo muuri niŋ minaayoolu la, aduŋ karoo te mala la.

Lankenemoo 6:17

Ì la kamfaa luŋ baa naata le, jumaa le si loo noo a ñaato?”

Yankuba 5:9

Baadiŋolu, ali kana ñoo la kuwo ŋunuŋunu, fo ali kana kiitindi. A juubee, kiitiikuntulaa be looriŋ daa to le fokabaŋ.

Filipinkoolu 4:5

Ali sooneeyaa moolu bee ye kendeke, fo ì bee si ali la sooneeyaa loŋ. Maariyo sutiyaata naŋ ne!

Matiyu 24:33

Wo to niŋ ali ye ñiŋ kuwolu bee je, ali si a loŋ fanaa ko, Moo Dinkewo la naa sutiyaata naŋ ne.

Esekiyeli 29:12

M be Misira bankoo kenseŋyandi la ñaameŋ, a te ñoŋ soto la bankoolu bee kono mennu kenseŋyaata, aniŋ a saatewolu te ñoŋ soto la saatewolu bee kono mennu nene tumbunta, fo sanji taŋ naani. M be a moolu janjandi la duniyaa bankoolu bee kaŋ ne, ì ye tara janjandiŋ bankoolu kaŋ taariŋ.”

Esekiyeli 7:19

“Ì la kodiforoo te ì nafaa la feŋ na, ì be a fayi la mbeedoolu kaŋ ne, ì la sanoo be ke la ì ye le ko feŋ ñewundiŋo. Nte Yaawe la yankankatoo luŋo la, ì la kodiforoo niŋ sanoo te ì tankandi noo la. Ì la wo fankoo te konkoo bo la ì la waraŋ ka ì konoolu fandi, kaatu ì la wo fankoo le ye ì duŋ junube kewo to.

Yesaya 19:1

Kiilaariyaa kumoo fele Misira la kuwo to. A juubee, Yaawe* tariyaatoo le ka naa Misira, a ka naa niŋ saŋ tawaloo le la. Misira jalaŋolu be jarajara la a ñaatiliŋo la le, Misirankoolu kijoo ye teyi.

Jabuuroolu 110:6

A be kiitiyo taamandi la banku koteŋolu kaŋ ne, ka ì fandi moo furewolu la. A be maralilaalu kasaara la duniyaa karoo bee le la.

Jabuuroolu 37:13

Bari Maariyo ka jele moo jawoo la le, kaatu a ye a je le ko, sambii a la luŋo be sii la.

2 Musa 14:24

Suutoo duutalaa Yaawe ye juubeeroo ke Misirankoolu la kelediŋolu la, ka bo niŋ dimbaa samasimmaa la aniŋ minaayoo, aduŋ a ye ì kijoo teyi.

2 Musa 14:20

Misirankoolu la kelediŋ kafoo niŋ Banisirayilankoolu la kelediŋ kafoo teema. Minaayoo ye a dibindi Misirankoolu ye, bari a ye maloo dii Banisirayilankoolu la, fo ì kana kata ñoo bala suutoo muumee.

Yesaya 13:6

Ali wuuri, kaatu Yaawe la luŋo sutiyaata naŋ ne, a luŋo niŋ kasaaroo le be naa kaŋ ka bo ate Alla Tallaa bulu.

Esekiyeli 13:5

Wo annabiyomoolu maŋ Banisirayila tata sansaŋo dulaa laamaariŋolu wulindi, waraŋ ka a tatoo faroo suki, fo moolu si tanka noo keloo kono Yaawe la luŋo la.

Yesaya 13:9

A juubee, Yaawe la luŋo ka naa le, luŋ koleŋ baa, jusukandoo aniŋ kamfaa koleŋo naa luŋo, ka duniyaa kenseŋyandi, ka junubelaalu kasaara jee.

Yeremiya 25:31

Maakaŋo be i danku la duniyaa tonkoŋolu to le, kaatu nte Yaawe be kuluuroo le naati la duniyaa moolu kaŋ. N niŋ moo bee le be taa kiitiyo la, aduŋ m be moo kuruŋolu bee le faa la hawusaroo la.” Yaawe le ye a fo.

Esekiyeli 7:10

“Luŋo fele, a siita. A naata le. Kasaaroo naata Banisirayila kaŋ ne. Tilimbaliyaa dinta le, ka siyaa, faŋ waroo ka yiriwaa laalaa naŋ ne.