3 Musa 7:30 - Mandinka Bible

³⁰ Ate faŋo si sadaa samba naŋ meŋ be bo la nte Yaawe ye niŋ dimbaa la. A si beeyaŋo ñiŋ keŋo samba naŋ, aniŋ a sisoo, a ye sisoo teeka, ka ke teekandiri sadaa ti nte Yaawe ye.

3 Musa 7:30 ပူးပေါင်းရင်းမြစ်များ

4 Musa 6:20

Bituŋ piriisoo ye ì teeka santo nte Yaawe ñaatiliŋo la ka ke teekandiri sadaa ti. Ñinnu seneyaata le, aduŋ piriisoo le taa ñanta ke la ì ti, aniŋ sisoo fanaa kafuriŋo a ma, meŋ teekandita, aniŋ wutoo. Niŋ wo bota a la, nasira moo si wayinoo miŋ noo le.

3 Musa 3:14

I si doo bondi jee ka a bo niŋ dimbaa la nte Yaawe ye sadaa ti, meŋ keta ñinnu ti: Keŋo meŋ be feeneeriŋ nuwolu kaŋ, aniŋ keŋo meŋ niŋ konokono feŋolu be ñoo bala,

3 Musa 3:9

I si doo bondi kayira sabatindiraŋ sadaa ñiŋ to, ka a bo dimbaa la nte Yaawe ye sadaa ti, meŋ keta ñinnu ti: A keŋo, feñetuŋo niŋ a keŋo muumewo, ka a kuntu koo bala, keŋo meŋ be feeneeriŋ nuwolu kaŋ, aniŋ meŋ niŋ konokono feŋolu be ñoo bala,

2 Korintinkoolu 8:12

Niŋ hamoo be jee ka diiroo ke, wo be muta la niŋ tenturoo la le, a te dendiŋ sotoo la, meŋ te ali bulu.

Yohana 10:18

Moo te a taa la m bulu, bari nte faŋo le ye a landi. Nte ye semboo soto le ka a laa, aniŋ ŋa semboo soto ka a taa kotenke. Ŋa ñiŋ yaamaroo soto ka bo m Faamaa le yaa.”

Jabuuroolu 110:3

Luŋo meŋ na keloo wulita, i la moolu be wakiili la le. Komeŋ soomandaa juuna komboo, i la fondinkewolu be naa i kaŋ ne faramansoo niŋ seneyaa kono.

3 Musa 9:21

Bari sisoolu aniŋ bulubaa wutoolu, a ye wolu teeka le, ka ke teekandiri sadaa ti Yaawe ñaatiliŋo la, komeŋ Musa ye a yaamari ñaameŋ.

3 Musa 8:27

A ye ñinnu bee duŋ Haaruna niŋ a dinkewolu bulu le, ì ye ì teeka, ka ke teekandiri sadaa ti Yaawe ñaatiliŋo la.

3 Musa 8:29

Musa ye sisoo fanaa taa, a ye a teeka ka ke teekandiri sadaa ti Yaawe ñaatiliŋo la. Musa niyo le mu wo ti toloori saajiyo to, komeŋ Yaawe ye a yaamari ñaameŋ.

3 Musa 10:14

Bari ali ye beeyaŋ sisoolu mennu teeka aniŋ wutoolu mennu diita, i niŋ i dinkewolu, aniŋ i dimmusoolu si wolu domo dulaa-wo-dulaa to le, daameŋ to seneyaata. Wolu diita le ka ke i niŋ i diŋolu niyo ti, ka bo Banisirayilankoolu la kayira sabatindiraŋ sadaalu to.

4 Musa 8:11

Haaruna ñanta Lewi lasiloo moolu yitandi la n ñaatiliŋo la le ka ke Banisirayilankoolu ye komeŋ teekandiri sadaa, fo ì si paree ka nte Yaawe la dookuwo ke.

3 Musa 9:20

Ì ye ì laa ninsituuraa niŋ saakotoŋo sisoolu kaŋ ne foloo, Haaruna naata keŋolu jani sadaajanidulaa kaŋ.

3 Musa 10:15

Wutoolu mennu diita, aniŋ ali ye sisoolu mennu teeka, Yaawe ñaatiliŋo la, wolu niŋ keŋo ñanta teeka la ñoo la le, mennu ka bo niŋ dimbaa la. Wo koolaa sadaalu si naa ke i niŋ i diŋolu niyo ti, aduŋ a be tu la wo le ñaama fo fawu, ko Yaawe ye a yaamari ñaameŋ.”

5 Musa 18:3

Niŋ ali ye ninsoo waraŋ saajiyo faa ka a bo sadaa ti, ali ñanta wo beeyaŋo daboo, a ŋaaŋaa aniŋ a konoo dii la piriisoolu le la, ì ye wolu taa.