3 Musa 7:18 - Mandinka Bible

¹⁸ Niŋ kayira sabatindiraŋ beeyaŋo suboo domota tili sabanjaŋo la, a sadaa te muta la. A te muta la a maarii ye, kaatu a konta le. Moo-wo-moo ye a suboo domo, a dunoo be laa la a kaŋ ne.

3 Musa 7:18 ပူးပေါင်းရင်းမြစ်များ

4 Musa 18:27

Ali la jakoo be ke la ali ye le ko sadaa meŋ ka bo siimaŋ kuta toñonkari dulaa, waraŋ meŋ ka bo wayini yiridiŋ bitidulaa.

3 Musa 22:25

Ali maŋ ñaŋ na soŋ na ñiŋ na, ka wo beeyaŋ siifaalu soto banku koteŋ moolu bulu, ka ì bondi nte ali la Alla ye domori sadaa ti. Ì sadaa te muta la ali ye, kaatu ì seeneeta le, ì ye sootaaroo soto.

3 Musa 11:41

Daafeŋolu, mennu keta kuruntu feŋolu ti, aniŋ daafeŋ meseŋolu bankoo kaŋ taariŋ, ì konjawuta le. Ì maŋ ñaŋ na domo la.

1 Pita 2:24

Kiristu faŋo le ye ǹ na junuboolu dunoo taa, ka bo niŋ a baloo la, a ye ì samba yiribantambiloo kaŋ, fo ǹ si faa junuboo la karoo la, aduŋ ǹ si baluu tiliŋo ye. Ka bo niŋ a la baramoolu le la, ali kendeyaata.

Hiburunkoolu 9:28

Wo ñaa kiliŋo la, Kiristu fanaa keta sadaa ti siiñaa kiliŋ ne, ka moo jamaa la junuboolu bondi. A be naa fulanjanke le, bari wo te ke la junuboo la kuwo ti, bari ka moolu kiisa, mennu be i yillaariŋ baake ate ma.

Roomankoolu 4:11

Iburayima naata sunnoo soto taamanseeroo niŋ suuteeraŋo ti, meŋ ye a la tiliŋo yitandi, a ye meŋ soto ka bo niŋ a la lannoo la, janniŋ a be sunna la. Wo kamma la, Iburayima keta lannamoolu bee le faamaa ti, Alla ye mennu muta moo tilindiŋo ti, hani ì maŋ sunna.

Luka 16:15

Wo to le Yeesu ko ì ye ko, “Alitolu le mu wo moolu ti, mennu ka ì faŋolu tilindi moolu ñaa la, bari Alla ye ali sondomoolu kono loŋ ne. Kaatu feŋo meŋ kummaayaata moolu fee, a mu feŋ jawoo le ti, Alla ye meŋ koŋ.

Malaki 1:13

Ali kumata ko, ‘Ñiŋ bataa juubee.’ Ali maŋ nte Yaawe Alihawaa Maariyo kuliyaa. Ali ye suuñaari beeyaŋolu samba naŋ ne, beeyaŋ lanjuurutoolu, beeyaŋ kuurantoolu, ali ye ñinnu le samba naŋ sadaa ti. Fo nte Yaawe ñanta ñinnu muta la ali ye le baŋ?

Malaki 1:10

Yaawe Alihawaa Maariyo ye ñiŋ ne fo ko, “A be beteyaa la m fee le, niŋ ali kono moo doo ye n na buŋo daalu soroŋ, i si a je ali te tara la dimbaa kenseŋ maloo la n na sadaajanidulaa kaŋ. M maŋ kontaani ali la kuwo la, aduŋ n te sadaa muta la meŋ be bo la ali bulu.

Amosi 5:22

Hani niŋ ali ye jani sadaalu* le bo n ye, aniŋ siimaŋ sadaalu, n te ì muta la. Niŋ ali ye kayira sabatindiraŋ sadaalu bo n ye, n te ì juubee la faŋ, hani niŋ ali ye ì bondi ali la beeyaŋ betoolu le kono.

Hoseya 8:13

Ì ka beeyaŋ sadaa* le bo, ì ka ì konoolu fandi a suboo la, ì ko, ì ka ì bondi nte le ye. Ì la wo sadaalu maŋ nte Yaawe seewondi. N te ñina la ì la junuboo la, m be ì yankankati la le, ŋa ì murundi Misira.

Esekiyeli 18:20

“Moo meŋ ye junuboo ke, wo le be faa la. Diŋo te a faa la junuboo dunoo taa la, waraŋ faa ye a diŋo la junuboo dunoo taa. Moo tilindiŋo la tiliŋo, m be a joo la wo le la, aduŋ moo kuruŋo la kuruŋyaa, m be a fanaa joo la wo kuruŋyaa le la.

Yeremiya 14:12

Hani ì si suŋ ka woosii n ye, n te ì lamoyi la. Hani ì si jani sadaalu* niŋ siimaŋ sadaalu bondi n ye, n te ì muta la ì ye. Bari m be meŋ ke la, wo le mu ka ì kasaara niŋ hawusaroo* la, konkoo, aniŋ alibalaa kuuraŋo.”

Yeremiya 14:10

Yaawe ye ñiŋ ne fo Yahuuda moolu ma ko: “Ñiŋ moolu ye ñiŋ ne kanu baake, ka jenke ka bo siloo kaŋ, ì buka ì siŋo sabatindi. Wo le ye a tinna nte Yaawe maŋ ì la kuwo muta kotenke. Silaŋ n hakiloo be muru la ì la kuu jawoolu kaŋ ne, ŋa ì kuluu ì la junuboolu la.”

Yesaya 66:3

Bari doolu be jee le mennu ka bula ì fansuŋ siloo nooma, aniŋ ka kontaanoo soto kuu haraamuriŋolu to. Niŋ ì ye tuuraa bondi sadaa* ti, a konta nte fee le ko, niŋ ì ye hadamadiŋo le bondi sadaa ti. Niŋ ì ye saajiyo bondi sadaa ti, a ka munta le ko, niŋ ì ye wuloo le kaŋo kati. Niŋ ì ye siimaŋ sadaa le bondi, wo ka munta m fee le ko, niŋ ì ye seewu yeloo le bondi. Niŋ ì ye cuuraayoo siisindi sadaa ti, wo ka munta le ko, niŋ ì ye jalaŋo le batu.

Yesaya 65:4

Ì ka tara siiriŋ kaburoolu le to, ì ye suutoo laa dulaa denderiŋolu to. Ì ka seewu suboo domo le, aduŋ daa jiyo meŋ be ì la kaleeroo kono, bota daafeŋ kondiŋolu suboo le bala.

3 Musa 22:23

I si ninsoo waraŋ saajiyo bondi noo fankadaŋ sadaa ti le, meŋ jaatoo daañaa ye helloo soto, waraŋ dasoo. Bari ka a ke sadaa ti, ka i la laahidoo timmandi, wo te muta la.

3 Musa 22:16

ka moo koteŋ bula a ye sadaa senuŋo domo, ka junuboo soto meŋ dunoo be laa la a maarii kaŋ. Nte le mu Yaawe ti, meŋ ka ì seneyandi.

3 Musa 20:19

Kana i naandiŋ waraŋ i binki laañooyaa, kaatu wo mu ñiŋ ne ti ka malu kuwo laa i faŋo kaŋ. Wo dunoo be laa la ali moo fuloo bee le kaŋ.

3 Musa 20:17

Niŋ kewo ye a baarimmusoo futuu, a niŋ a kafuta, fo a niŋ a denta faa le la baŋ, waraŋ baa, wo mu malu kuwo le ti. Ì ñanta le ka ì bondi ì la moolu kono fereŋ. A ye malu kuwo le laa a baarimmusoo kaŋ, aduŋ a dunoo be laa la a kaŋ ne.

3 Musa 17:16

Niŋ a maarii maŋ a la duŋ feŋolu kuu, a faŋo ye i kuu, wo dunoo be tara la a kaŋ ne.

3 Musa 10:19

Bituŋ Haaruna ye Musa jaabi a dinkewolu la kuwo to ko, “A juubee, bii le mu n dinkewolu ye ì la junube kafarilaŋ sadaalu niŋ ì la jani sadaalu bondi Yaawe ye. Bari a juubee maasiiba kuwo meŋ keta nte la. Niŋ a ye a tara ŋa junube kafarilaŋ sadaa suboo domo bii, fo wo be diyaa la Yaawe ye le baŋ?”

3 Musa 10:17

“Muŋ ne ye a tinna ali maŋ junube kafarilaŋ beeyaŋo suboo ñiŋ domo Bendulaa Tiriliisi Senuŋo daala? A mu feŋ senuŋ baa le ti, aduŋ Yaawe ye a dii ali la le ka jamaa la junuboo dunoo bondi, ka junube kafaroo saabu ì ye a ñaatiliŋo la.

3 Musa 5:17

Niŋ moo-wo-moo ye junuboo ke, ka kuu ke, nte Yaawe ko meŋ maŋ ñaŋ na ke la n na yaamaroolu kono, hani niŋ a maarii maŋ a loŋ, a dunoo be laa la a kaŋ ne. Niŋ a maarii naata a kalamuta,

3 Musa 7:19

Suboo meŋ maata kosoo la, a maŋ ñaŋ na domo la. A ñanta jani la le. Moo-wo-moo be seneyaariŋ, wo si subu koteŋ domo noo le.

Kuma Kotoomaalu 15:8

Moo jawoo la sadaa* mu Yaawe tanoo le ti, bari a ka seewoo le, ka moo tilindiŋo la duwaa muta.

3 Musa 19:5

Niŋ ali be beeyaŋo faa la kayira sabatindiraŋ sadaa* ti nte Yaawe ye, ali ñanta a ke la a ñaama le, ñiŋ kamma a si muta ali ye.