3 Musa 24:2 - Mandinka Bible

² I si Banisirayilankoolu yaamari ka olifu* tulu kendoo samba naŋ. A si ke lampu malaraŋo ti, ñiŋ kamma la lampoo si tu malariŋ waati-wo-waati.

3 Musa 24:2 ပူးပေါင်းရင်းမြစ်များ

2 Korintinkoolu 4:6

Alla meŋ ko nuŋ ko, “Maloo ye mala diboo kono,” ate faŋo le ye a la maloo dii ǹ sondomoo kono fo ǹ si a la kallankeeyaa fahaamu. Ñiŋ mu Alla la kallankeeyaa le ti, meŋ ka mala Kiristu ñaadaa to.

Yohana 8:12

Yeesu diyaamuta moolu ye kotenke ko, “Nte le mu duniyaa la maloo ti. Moo meŋ ye nte nooma, wo maarii te taama la diboo kono, bari a be maloo le soto la meŋ ka baluwo dii.”

Kiilaalu 26:18

I si ì ñaalu yelendi fo ì si bo diboo kono ka naa maloo kono, ka bo Seetaanoo* la maraloo kono ka naa Alla kaŋ. Wo to le ì be junube yamfoo soto la, aniŋ niyo moolu kono, mennu naata seneyaa kaatu ì laata nte la.’

Yohana 5:35

Yaayaa mulunta le ko lampoo meŋ ka mala, aniŋ a ka dulaa fanundi. Ali la lafoo kaŋ, ali seewootoo tarata jee le fo waati dantaŋ.

Yohana 1:9

Mala tooñaa, meŋ ka maloo dii moolu bee sondomoo kono, a be naa kaŋ duniyaa kono le.

Yohana 1:4

Baluwo be ate le kono, aduŋ baluwo mu moolu la maloo le ti.

Luka 12:35

“Ali tewolu si tara sitiriŋ, aniŋ ali la lampoolu si tara malariŋ!

Luka 1:79

A be mala la moolu kaŋ ne, mennu be siiriŋ diboo niŋ saayaa niiniyo koto. A be ǹ siŋolu taamandi la kayira siloo le kaŋ.”

Matiyu 5:16

Wo ñaa kiliŋo la ali la maloo si mala moolu ñaatiliŋo la, fo ì si ali la kebaara kendoolu je, aniŋ ì si horomoo niŋ jayiroo dii ali Faamaa la, meŋ be Arijana.

Matiyu 4:16

Moolu mennu be siiriŋ diboo kono, ì naata mala baa je. Maloo malata moolu kaŋ ne, mennu be siiriŋ banku dibiriŋo kaŋ, saayaa niiniyo koto.”

Yesaya 11:2

Yaawe* la Nooroo be tara la a fee le, ñaameŋo niŋ fahaamuroo nooroo, yaamaroo niŋ semboo nooroo, londoo niŋ Yaawe ñaasilaŋo nooroo.

Yesaya 8:20

Ali Alla la luwaalu aniŋ a la yaamaroolu muta! Mennu maŋ ì muta, ì be tu la diboo le kono.

Kuma Kotoomaalu 6:23

Kaatu ñiŋ yaamaroolu mu lampoo le ti, karandiroo mu maloo ti, aduŋ yitandiroo kuluuroo to, le mu duniyaa sambaraŋo ti.

Jabuuroolu 119:130

I la kumoolu kotoo firiŋo ka maloo le dii, a ka moo kunimbaloo ñaamendi le.

Jabuuroolu 119:105

I la kumoo mu n ye lampoo le ti, meŋ ka n siŋolu loodulaa bitaa, aduŋ a mu maloo le ti n na siloo kaŋ.

2 Taarika 13:11

Soomandaa-wo-soomandaa aniŋ wulaara-wo-wulaara ì ka jani sadaa* bo, ì ka cuuraayi diimaa siisindi Yaawe ye. Ì ka mbuuroo fanaa parendi saniforo taabuloo kaŋ ne, aduŋ wulaara-wo-wulaara ì ka lampoolu mala le mennu be sani lampu looraŋo kaŋ. Ntolu be Yaawe, ǹ na Alla le la yaamaroolu nooma kaŋ, bari alitolu ye i bo Yaawe to le.

2 Musa 40:24

A ye lampu looraŋo londi tiriliisoo bulubaa karoo la, a niŋ taabuloo ñaa be tilindiŋ ñoo la,

2 Musa 39:37

saniforo lampu looraŋo, a lampoolu, a jooraŋolu bee, aniŋ tuloo lampoolu ye,

3 Musa 24:1

Yaawe* diyaamuta Musa ye ko:

3 Musa 24:3

Haaruna ñanta le ka lampoo tu malariŋ nte Yaawe ñaatiliŋo la Bendulaa Tiriliisi Senuŋo* kono, kabiriŋ wulaaroo fo soomandaa. A be tara la malariŋ ridoo ye banta maafaŋo le la. Wo ridoo le be kuntunteeriŋ Kambeŋ Kunewo* ñaato la. Ñiŋ mu kaŋ looriŋo le ti, jamaani naalaalu bee ye.