1 Taarika 20:1 - Mandinka Bible

¹ Tilikandoo kono, waatoo meŋ na mansoolu ka taa keloo la, Yowabu le ye kelediŋolu ñaatonkayaa keloo ñiŋ to. Ì ye Ammoni bankoo kasaara, ì ye ì la saatee baa Raba fanaa murubeŋ. Bari Dawuda faŋo tuta Yerusalaamu le. Yowabu ye Raba kele, a ye a kasaara.

1 Taarika 20:1 ပူးပေါင်းရင်းမြစ်များ

2 Samuweli 11:1

Tilikandoo kono, waatoo meŋ na mansoolu ka taa keloo la, Dawuda ye Yowabu niŋ a la kelediŋ kafoo la ñaatonkoolu kii, aniŋ Banisirayilankoolu la kelediŋolu. Ì ye Ammoninkoolu kasaara, aduŋ ì ye ì la saatee baa Raba fanaa murubeŋ. Bari Dawuda faŋo tuta Yerusalaamu le.

Amosi 1:14

M be dimbaa le duŋ na Raba saatewo tata sansaŋo la, aniŋ a buŋ ñiimaa baalu. Wo luŋo la, keloo niŋ wuuroo si duu Raba. Keloo ñiŋ si duu ì kaŋ rip, ko niŋ turubaadoo wulita.

5 Musa 3:11

Mansa Oki le keta moo labaŋo ti ka faa Rafa koomalankoolu kono. Ì ye a landi daameŋ, a la jamfoo kaañanta nonkonkatiñaa kononto le fee, a fanoo kaañanta nonkonkatiñaa naani fee. Hani bii, a la kaburoo be Ammoninkoolu la saatee baa to le, Raba.

Esekiyeli 25:5

M be ali la saatee baa Raba ke la ñonkomoolu ye daañini dulaa le ti. Ali la Ammoni bankoo bee si ke ì la beeyaŋ meseŋ koorewolu laadulaa ti. Niŋ wo keta ali be a loŋ na le ko, nte le mu Yaawe ti.”

Esekiyeli 21:20

Taamanseeroo ke siloo to meŋ ka taa Raba Ammoninkoolu la saatee baa to, aniŋ siloo to meŋ ka taa Yerusalaamu, Yahuuda moolu la saatee tatariŋo.

Yesaya 54:16

“A juubee, nte le ye neefiŋ numoo daa, meŋ ka keñemboo fee a ye mala, ka jooraŋo dadaa ka keloo ke. Aduŋ nte le ye tiñaarilaa daa, ka tiñaaroo ke.

Yesaya 6:11

Wo to le n kumata ko, “Hee Maariyo! Fo waati jumaa?” A ye n jaabi ko, “Fo niŋ saatewolu tumbunta, moo maŋ tara ì kono, fo niŋ buŋolu kenseŋyaata, kunkoolu ye tiñaa aniŋ ka kasaara,

2 Mansoolu 13:20

Wo le to Elisa naata bele, bituŋ ì ye a sutura. Tilikandoo kono, Mowabinka boyinkannaalu le ka duŋ Banisirayila bankoo kaŋ sanji foloo waatoo la saŋ-wo-saŋ.

1 Mansoolu 20:26

Sanji foloo waatoo la, Mansa Beni-Hadadi ye Aramunkoolu bendi, bituŋ ì taata Afeki ka Banisirayilankoolu kele.

1 Mansoolu 20:22

Ñiŋ kuwo koolaa, annabiyomoo ñiŋ naata Ahabu kaŋ, a ko a ye ko, “I si feeroolu dadaa kuuke, i ye i la kelediŋolu kafu ñoo ma ka ì bambandi. Kaatu sanji foloo waatoo Aramu mansa be wuli la le ka naa boyi i kaŋ kotenke.”

2 Samuweli 17:27

Kabiriŋ Dawuda futata Mahanayimu, Sobi Nahasi dinkewo le ye a benduŋ. A bota Raba le meŋ be Ammoni bankoo kaŋ, aduŋ Makiri Ammiyeli dinkewo meŋ bota Lo-Deba, aniŋ Baasillayi meŋ bota Rokelimu meŋ be Kileyadi.

1 Taarika 19:19

Kabiriŋ mansoolu mennu be Hadadesa kooma ye a je ko, Banisirayilankoolu ye ì noo le, ì niŋ Dawuda ye kayira kambeŋo siti, aduŋ ì ye ì faŋ seyi a ma. Bituŋ Aramunkoolu maŋ naa soŋ ka Ammoninkoolu maakoyi kotenke.