1 Korintinkoolu 15:33 - Mandinka Bible

³³ Ali ali hakiloo tu, moo kana ali neenee! Kafuñoo kuruŋo ka daajika betoolu le tiñaa.

1 Korintinkoolu 15:33 ပူးပေါင်းရင်းမြစ်များ

Kuma Kotoomaalu 13:20

Moo meŋ niŋ moo ñaamendiŋo ka taa, fanaa be ñaameŋo soto la le, bari toolewo taañooyaa mu bataa le ti.

Matiyu 24:4

Bituŋ Yeesu ye ì jaabi ko, “Ali ali hakiloo tu fo moo kana ali filindi.

1 Korintinkoolu 5:6

Ali la kibiroo maŋ beteyaa. Fo ali maŋ a loŋ ko, leweñindiŋ ne ka fariñoo bee selendi?

Kuma Kotoomaalu 9:6

Ali sooneeyaa baa tu jee, fo ali si baluu. Ali bula fahaamuroo la siloo nooma.

Efesusinkoolu 5:6

Ali kana soŋ, moo ye ali neenee niŋ kuma kenseŋolu la. Ñiŋ kuwolu le ye a tinna, Alla la kamfaa baa be naa la moolu kaŋ, mennu maŋ soŋ a ma.

Kalatiyankoolu 6:7

Ali ali hakiloo tu, moo kana ali filindi ka a miira ko, moo si Alla ke noo jelefeŋo ti le: Moo ye feŋ-wo-feŋ fii, a be wo le kati la.

1 Korintinkoolu 6:9

Fo ali maŋ a loŋ ko, moo tilimbaloolu te Alla la mansabaayaa keetaa la? Ali ali hakiloo tu, moo kana ali neenee! Laañooyaa tulunnaalu, jalambatulaalu, jeenelaalu, luutikankewolu,

Matiyu 24:24

Kaatu moolu be wuli la le, mennu be ì faŋ ke la Alimasiihu ti, waraŋ annabiyomoolu. Ì be taamanseeri baalu yitandi la le, aniŋ kaawakuwolu, ka hani Alla la tomboŋ moolu filindi, niŋ ì si a ke noo.

2 Pita 2:2

Baadiŋ jamaa be bula la ì la malubaliyaa kuwolu nooma le. Ì la wo karandiroo be a tinna le, moo koteŋolu be kuma jawoo fo la ñiŋ tooñaa siloo ma.

Hiburunkoolu 12:15

Ali ali hakiloo tu, fo moo kana foo Alla la hiinoo la ali kono, i si a je moo te duŋ na ali kono ko yirisulu kunaŋo meŋ si bataa baa saabu aniŋ ka jamaa nondi.

Matiyu 24:11

Faniyaa annabiyomu jamaa le be wuli la, aduŋ ì be moo jamaa le filindi la.

2 Tesalonikankoolu 2:10

Moolu bee mennu be kasaara la, a be ì neenee la niŋ neeneeri jawu siifaa bee le la, kaatu ì balanta le ka tooñaa kanu, meŋ si ì kiisa.

Lankenemoo 12:9

Bituŋ ninkinanka baa fayita naŋ duuma. Ate le mu wo saa kotoo ti, ì ka meŋ kumandi Ibiliisa niŋ Seetaanoo* la, duniyaa moolu bee neeneelaa. A fayita naŋ duuma duniyaa kono, a niŋ a la malaayikoolu.

Kuma Kotoomaalu 22:25

niŋ wo nte i be bula la a la kuwolu nooma le, a la kataa ye miniŋ i la.