Zakarii 9:12 - Mbeti ti Nzapa - Tënë so amu fini

¹² Ala azo ti kanga so azia be ti ala ti ku titene a zi ala so, ala kiri na ya ti gbata ti ala so ngangu gbagba ayeke na tere ni. Gi laso laso, mbi tene: fade mbi yeke mu na ala ye ti peko ti pasi ti ala fani use.

Zakarii 9:12 ပူးပေါင်းရင်းမြစ်များ

Mbeti ti Job 42:10

Na ngoi so Job ayeke sambela ndali ti amba ti lo, KOTA GBIA akiri na Job na kozo ndo ti lo. Aye so kue lo yeke na ni kozo, KOTA GBIA akiri amu na lo fani use.

Ésaïe 24:22

Fade a yeke bongbi ala tongana azo ti kanga ti zia ala na ya ti kota du. A yeke zia ala na da ti kanga. Lango mingi na pekoni, ala yeke fa peko ti ye so ala sara na le ti ngbanga.

Ésaïe 38:18

Na ndo ti akuâ, zo oko ti gondango mo ayeke daa pepe, akuâ alingbi ti sepela mo pepe. Azo so azu na du ti kuâ awe, ala lingbi ti zia be ti ala na ndö ti tënë ti yanga ti mo mbeni pepe.

Ésaïe 40:2

Ala tene tënë ti mu ngangu na be ti Jérusalem, ala dekongo na lo atene: “Kua ti lo ti ngbaa ahunzi awe, a zi sioni ti lo na li ti lo awe. Biani, asioni so lo sara, *KOTA GBIA asara si lo wara futa ni fani use.”

Ésaïe 49:9

Mbi tene na azo ti kanga: ‘Ala sigigi!’ Mbi tene na azo so aduti na ya ti vukongo ndo: ‘Ala sigigi, ala ga na ya ti lumiere!’ Ala yeke duti tongana ataba so ayeke te pere na tere ti lege, ala yeke wara kobe ti ala na ndö ti ahoto kue.

Ésaïe 52:2

Jérusalem, londo na ya ti fuku ti sese, mo yengere tere ti mo, kiri mo duti na ndo ti mo. Gbata ti Sion, zo ti kanga, zi kamba so a kanga na go ti mo!

Ésaïe 61:7

KOTA GBIA atene: “Na plase ti kamene so lani ahon ndö ti ala, fade ala yeke wara sese ti azo ni akono fani use. Na plase ti zongango ndo so azo azonga ala, ala yeke dodo na ngia, ngia ni ayeke ngba lakue lakue.

Jérémie 14:8

KOTA GBIA, mo laa Israel alingbi ti zia be ti lo na ndö ti mo, mo soo lo na ndembe ti ye ti ngangu. Ngbanga ti nyen si mo yeke sara ye tongana wande na ya ti kodro so? Ngbanga ti nyen si mo yeke sara ye tongana gene so alango gi bi oko si lo mu lege ti hon so?

Jérémie 16:19

*KOTA GBIA, mo yeke ngangu ti mbi, mo yeke tongana ngangu gbagba na tere ti mbi, mo yeke ndo so mbi kpe daa ti bata tere ti mbi na ngoi ti ye ti ngangu. Fade amara nde ayeke londo na nda ti sese kue ti ga na mbage ti mo. Ala yeke tene: “Ye so akotara ti e awara ti ga ye ti ala, ye ni ayeke gi ye ti mvene; mbeni senge buba ye so alingbi ti sara kua oko pepe.

Jérémie 17:13

*KOTA GBIA, mo laa azo ti Israel azia be ti ala ti ku mo. Azo so kue ado mo azia, ayeke nzoni kamene agbu le ti ala. Azo so azia lege ti mo, ala yeke tongana azo so a su iri ti ala na ya ti fuku ti sese. Biani, ala do mo azia mo awe, KOTA GBIA, mo so mo yeke li ti ngu so ayeke mu fini na zo.

Jérémie 31:17

Mo lingbi ti zia be ti mo ti ku anzoni ye ndali ti gigi ti mo ti gbanda; so tënë ti yanga ti KOTA GBIA laa: Fade amolenge ti mo ayeke kiri na sese ti ala.

Jérémie 31:6

Biani, mbeni lango ayeke ga so asanziri ayeke dekongo na li ti ahoto ti Efraim, atene: Ala londo! E gue na *Sion, e gue na mbage ti KOTA GBIA Nzapa ti e!’ ”

Jérémie 50:28

Ala ma si! Azo so akpe, ala so angba na fini na kodro ti Babilone, ala laa ayeke ga na asango na *Sion, atene: “KOTA GBIA Nzapa ti e akiri na azo ti Babilone peko ti sioni ti ala awe; lo kiri na ala peko ti sioni so ala sara na kota da ti lo.”

Jérémie 51:10

KOTA GBIA afa mbirimbiri ti e polele. E gue na *Sion, e fa peko ti ye so KOTA GBIA Nzapa ti e asara!”

Ezekiel 37:11

Na pekoni, KOTA GBIA atene na mbi: “Molenge ti zo, abio so ayeke limo ti azo ti Israel kue laa. Azo ti Israel atene: ‘E yeke tongana akuru bio, mbeni ye titene e zia be ti e ti ku ayeke daa pepe; ti e ahunzi awe!’

Osée 2:15

Mbi yeke ga ti kiri peko ti sioni na lo ndali ti ye so lo sara na ngoi so lo yeke zö dukani na anzapa *Baal, lo yeke yu bage na aye ti mê na aye ti go si lo yeke kpe na peko ti andeko ti lo ni; me ti mbi, be ti lo ayeke girisa na mbi. – So tënë ti yanga ti KOTA GBIA laa.

Mishe 4:8

Mo, hoto ti Sion, mo so mo yeke baa ndo na ndö ti azo tongana mbeni wabatango-taba so aluti na nduzu, fade mo yeke kiri ti wara komandema ti mo ti kozo. Jérusalem ayeke kiri ti ga kota gbata ti kodro ni.”

Nahum 1:7

KOTA GBIA ayeke nzoni; na ngoi ti ye ti ngangu, lo yeke ndo so zo akpe daa ti bata tere ti lo. Lo yeke bata azo so azia be ti ala na ndö ti lo

Ahebro 6:18

Dengo ba so Nzapa ade na zendo so lo mu so ayeke ngba lakue; tënë ti mvene ayeke na ya ti aye use so oko pepe. Aye use so ayeke kpengba e mingi, e so e zia be ti e ti ku ti wara ye so Nzapa aye ti mu na e.

Ahebro 6:19

Ti fini ti e ayeke nga tongaso: ye so e zia be ti e ti ku ayeke tongana nengo wen so a yeke bi na ya ti ngu, agbu mangboko si aluti mbirimbiri. Ye so e zia be ti e ti ku ayeke ye so aluti mbirimbiri, ye ni ahon na ya ti ridoo so a kanga na ya ti kota da ti Nzapa so ayeke na yayu, ague ngbii asi na ndo so ayeke nde si ayeke nzoni kue ahon atanga ni.