Zakarii 8:9 - Mbeti ti Nzapa - Tënë so amu fini

⁹ Tënë so KOTA GBIA so ayeke na ndö ti dunia kue atene ayeke so: “Ala gbu ngangu! Ala ma fadeso atënë so awayanga-Nzapa atene na ngoi so a yeke zia agere ti kota da ti KOTA GBIA titene akiri asara da ni.

Zakarii 8:9 ပူးပေါင်းရင်းမြစ်များ

1 Mbai 22:13

Tongana mo sara ye na lege ti aye so ndia afa nga na lege ti ambela ti KOTA GBIA so lo mu na Moïse ndali ti azo ti Israel, fade aye ti mo kue ayeke ga nzoni. Gbu ngangu, mo sara ye ti koli, zia mbeto asara mo pepe, zia mbeto ahon ndö ti mo pepe.

1 Mbai 28:20

Na pekoni, David atene na molenge ti lo Salomon: “Gbu ngangu, sara ye ti koli, mo sara ye! Zia mbeto asara mo pepe, zia mbeto ahon ndö ti mo pepe! Fade KOTA GBIA, Nzapa ti mbi ayeke na mo, lo yeke girisa mo pepe, lo yeke zia mo pepe, ngbii kua ti kota da ti KOTA GBIA ahunzi.

2 Mbai 15:7

Me ti ala fadeso, azo ti Israel, ala gbu ngangu, be ti ala awoko pepe. Fade ala yeke wara futa ti kua ti ala.”

Esdras 6:14

*Akangba ti azuife angba ti sara kota da ni si akua ni ayeke tambula nzoni, alingbi na atënë ti mungo ngangu na be so wayanga-Nzapa Aggée na Zakarii, molenge ti Ido atene na ala. Ala hunzi ti sara da ni, alingbi na yanga so Nzapa ti Israel amu nga alingbi na ambela ti agbia ti Perse so ayeke Sirus, Darius na Artakzerses.

Ésaïe 35:3

Ala sara si maboko so awoko, akiri awara ngangu; ala sara si alikunu so awoko, akiri akpengba.

Ésaïe 35:4

Ala tene na azo so be ti ala awoko so, atene: “Ala gbu ngangu, ala sara mbeto pepe! Baa, Nzapa ti ala laa. Lo ga ti kiri peko ti sioni na azo so asara sioni, ti futa awato ti ala ndali ti sioni so awato ni asara na ala. Lo wani, lo ga ti soo ala.”

Aggée 1:1

Na ngu use ni so Darius ayeke gbia, na lango oko ti nze omene ni, tënë ti *KOTA GBIA asi na wayanga-Nzapa Aggée titene lo tene peko ni na Zorobabel, govoronere ti sese ti Juda, molenge ti Shealtiel. Lo tene nga peko ti tënë ni na kota wayango-sandaga Yeshua, molenge ti Yosadak.

Aggée 1:12

Tongaso Zorobabel, molenge ti Shealtiel, na Yeshua, kota wayango-sandaga, molenge ti Yosadak na tanga ti azo ti kodro ni kue ama atënë ti KOTA GBIA, Nzapa ti ala, atënë so lo zia na yanga ti wayanga-Nzapa Aggée titene lo tene peko ni na ala si azo ni akpe mbeto ti KOTA GBIA.

Aggée 2:18

Ala gbu li ti ala nzoni na aye so ayeke si, ti londo laso ti gue na ni. Laso, na lango baleuse na osio ti nze gumbaya ni si a zia gere ti kota da ti KOTA GBIA; be ti ala agirisa na ni pepe.

Aggée 2:21

“Tene na Zorobabel, govoronere ti sese ti Juda, mo tene: ‘Fade mbi yeke yingi nduzu na sese.

Zakarii 8:13

Ala, akodro-gbia ti Juda na ti Israel, na popo ti amara kue, ala yeke lani tapande ti mbeni mara so a deba lo. Me fadeso, mbi soo ala, ala yeke ga tapande ti mbeni mara so a sara tufa na ndö ti lo. Ala sara mbeto pepe, ala gbu ngangu!”

Zakarii 8:18

Tënë ti *KOTA GBIA so ayeke na ndö ti dunia kue asi na mbi, atene:

Efeze 6:10

Ti hunzi na ni, ala kpengba na lege ti kota ngangu ti *Kota Gbia, ngbanga ti so ala ga oko na lo.

2 Timothée 2:1

Ti mo, molenge ti mbi, mo kpengba na ya ti nzoni be so Nzapa asara na e na lege so e ga oko na Jésus Christ.

Josué 1:6

Gbu ngangu, mo sara ye ti koli, ngbanga ti so mo laa mo yeke sara ande titene kodro so mbi deba yanga ti mbi ti mu na akotara ti ala, aga ye ti ala.

Josué 1:8

Ayeke nzoni atënë ti ya ti mbeti ti Ndia so angba lakue na yanga ti mo; mo gbu li ti mo daa bi na lâ, mo gi nga lege ti sara aye so kue alingbi na tënë so a su na ya ti mbeti ni. Tongaso si aye so kue mo leke na be ti mo ti sarango ni, mo yeke sara ni na legeni si aga nzoni.