Zakarii 7:14 - Mbeti ti Nzapa - Tënë so amu fini

¹⁴ Tongana ti so kota pupu amu aye ahon na ni kirikiri, mbi kangbi ala na popo ti amara nde nde so ala hinga ala kozoni pepe. Kodro ni abuba kue na peko ti ala, mbeni zo ti kiri ti fono na ya ti kodro ni ayeke daa pepe. Kodro so lani ayeke mbeni nzoni kodro, kodro ni akiri aga ngonda awe.”

Zakarii 7:14 ပူးပေါင်းရင်းမြစ်များ

2 Mbai 36:21

Tongaso tënë so KOTA GBIA atene na lege ti wayanga ti lo Jérémie aga taa-tënë: “Fade azo ayeke ngba na ya ti kodro ni pepe na ya ti ngu balembarambara ngbii ngoi ti wungo tere ti kodro ni alingbi. Ye ni ayeke mu plase ti ngoi ti wungo tere so lani ala sara ye alingbi na ni pepe so.”

Abia (Psaumes) 58:9

Ayeke nzoni ala ga tongana ngonzâ so akui si azia dongo ti tere ti lo na sese. Ayeke nzoni ala ga tongana akete molenge so a du ala na kuâ ni si ala baa lâ pepe.

Ésaïe 17:13

Wusuwusu ti amara nde ayeke tongana toto ti kota ngu. *KOTA GBIA asuku na ala, ala kpe yongoro, lo tumba ala tongana holengo pere so pupu ti li ti hoto ahon na ni, tongana fuku ti sese so kota pupu ahon na ni.

Ésaïe 21:1

Nengo tënë na ndö ti benyama so ayeke nduru na kota ngu-ingo. Tongana ti so kota pupu afâ ya ti sese ti mbage ti Mbongo, wato alondo na benyama si ayeke ga, lo londo na kodro so ayeke zia mbeto na be ti azo.

Ésaïe 60:15

Azo ado mo lani azia, azo ake mo, zo oko ahon na ndo ti mo pepe. Me fadeso mbi yeke sara titene mo ga gbata so azo ayeke pika kate ti ala ndali ni kpu na kpu, gbata so azo ti angoi kue ayeke duti na ngia ndali ni.

Ésaïe 66:15

Biani, KOTA GBIA ayeke ga na ya ti wâ, apusu ti mbarata ti lo ayeke tongana kota pupu. Lo yeke ga ti fa sioni ngonzo ti lo, ti suku na azo na lege ti menga ti wâ.

Jérémie 12:10

Awabatango-taba mingi abuba yaka ti *vinye ti mbi; ala do na gbe ti gere ti ala yaka ti mbi, ala sara si pendere yaka so aga benyama, aga ngonda.

Jérémie 23:19

Baa, ngangu pupu ti KOTA GBIA ayeke ga, sioni ngonzo ti lo alondo awe, sioni pupu ti ngu-Nzapa ayeke ya si ayeke turne wirrr ti ti na li ti azo ti sioni.

Jérémie 30:23

Baa ngangu pupu ti KOTA GBIA ayeke ga, sioni ngonzo ti lo alondo awe. Sioni pupu ti ngu-Nzapa ayeke ya si ayeke turne wirrr ti ti na li ti azo ti sioni.

Jérémie 36:19

Tongaso akota zo ti kodro atene na Baruk: “Gue, mo honde tere ti mo, mo na Jérémie. Alingbi zo oko ahinga pepe ndo so ala yeke daa.”

Jérémie 44:6

Nilaa mbi tuku ngonzo ti mbi nga na ngonzo ti mbi ti wâ si agbi agbata ti Juda na abalabala ti Jérusalem. Agbata ni na abalabala ni aga ndo ti gba ti atêne, aga ngonda tongana ti so a yeke baa ni laso so.’ ”

Jérémie 5:15

So tënë ti yanga ti KOTA GBIA laa: Ti ala azo ti Israel, mbi yeke tokua mbeni mara so alondo na yongoro ndo ti ga na tere ti ala; ayeke mara so ala lingbi ti kinda ni pepe, mara ni ayeke ando giriri; ala hinga yanga ti kodro ti azo ti mara ni pepe, ala ma ya ti atënë so ala yeke tene pepe.

Jérémie 52:30

na ngu baleuse na ota ni, Nebuzaradan, makonzi ti aturugu ti batango gbia agbu azo ti Juda 745 si ague na ala na kodro wande. Wungo ti azo ni kue ayeke 4 600.

Ezekiel 12:19

Na pekoni, mo yeke tene na azo ti sese ni kue, mo tene: ‘Tënë so Kota Gbia NZAPA atene na azo ti Jérusalem so angba na sese ti Israel ayeke so: Ala yeke te kobe ti ala na gingo be, ala yeke nyon ngu ti ala na ya ti kota mbeto. Biani, azo ayeke buba kodro ni, mbeni ye oko ayeke ngba daa pepe, ndali ti so azo so kue alango na ya ti kodro ni asara ngangu mingi na azo.

Ezekiel 22:15

Fade mbi yeke kangbi ala na popo ti amara nde, mbi yeke tokua ala na ndo kue na ya ti akodro wande; mbi yeke sara si asarango ye ti ala ti *sioni akai.

Ezekiel 5:10

Na ya ti gbata ni, fade babâ na mama ayeke te amolenge ti ala, amolenge ayeke te babâ na mama ti ala. Mbi yeke fâ ngbanga na li ti ala; ti tanga ti azo so ayeke ngba na fini, mbi yeke kangbi ala kirikiri na ndo kue.

Daniel 8:9

“Na ya ti oko ti adidi osio so, mbeni kete didi asigigi daa si aga kota mingi na mbage ti Mbongo, na mbage ti To nga na mbage ti pendere kodro.

Osée 9:17

Fade Nzapa ti mbi ayeke ke ala, ngbanga ti so ala ma lo pepe. Fade ala yeke tambula kirikiri na popo ti amara nde.

Joël 2:3

Na dawa ti ala, wâ ayeke gbi ye kue, na peko ti ala, menga ti wâ ayeke gbi ye kue. Kozoni si ala ga, sese ayeke tongana yaka ti Eden; na peko ti ala, sese ni aga tongana benyama, ndo so ye kue abuba daa; mbeni ye so ala zia angba ayeke daa pepe.

Awayango-sandaga 26:22

Mbi yeke tokua anyama ti ngonda na tere ti ala; anyama ni ayeke fâ amolenge ti ala, ala yeke hunzi anyama ti ala, anyama ti ngonda ni ayeke fâ ala kue si alege ti ala ayeke ga ngonda.

Awayango-sandaga 26:33

Ti ala, mbi yeke tokua bira na tere ti ala si mbi yeke sara titene ala kangbi na popo ti amara nde. Kodro ti ala ayeke ga ngonda si agbata ti ala ayeke buba kue.

Amos 1:14

Fade mbi yeke zia wâ na gbagba ti Raba si wâ ni ayeke gbi ayangbo ti gbata ni kue na lango ti bira, na popo ti dekongo ti bira, na ndembe so pupu ti ngu-Nzapa na ngangu pupu ayeke ya.

Nahum 1:3

KOTA GBIA ayeke sara ngonzo hio hio pepe, lo yeke ngangu mingi. Me zo so asara siokpari, lo yeke zia lo senge pepe. Lo yeke tambula na ya ti kota pupu so ayeke ya ngangu, lo yeke tambula nga na ya ti ngu-Nzapa so ayeke pika mingi mingi so. Ambinda ayeke tongana fuku ti sese, fuku ti sese so ayeke londo na peko ti gere ti lo.

Habakuk 3:14

Mo koro li ti amakonzi ti awato ni taa na ale ti kokora ti ala wani. Lani awato ni aga na loro tongana kota pupu ti ngu-Nzapa ti tumba e. Ala yeke dekongo na ngia, mo baa mo tene, ala gbu zo awe si ala yeke gue ti te lo na hondengo ni.

Sofonii 3:6

KOTA GBIA atene: “Mbi hunzi ambeni mara kue awe, mbi kungbi agbagba ti bira ti ala; mbi sara si ndö ti alege ti ala angba senge, zo oko akiri ahon daa pepe; mbi buba agbata ti ala kue awe, zo oko angba pepe, zo ti lango na ya ni ayeke daa pepe.

Zakarii 2:6

Mbi hunda lo, mbi tene: “Mo yeke gue na ndo wa?” Lo kiri tënë na mbi, lo tene: “Mbi yeke gue ti haka gbata ti Jérusalem, ti hinga yongoro ni na nduru ni.”

Zakarii 8:1

Tënë ti *KOTA GBIA so ayeke na ndö ti dunia kue asi na mbi, atene:

Zakarii 9:14

Fade KOTA GBIA ayeke sigigi ti duti na ndö ti azo ni. Ale ti kokora ti lo ayeke hon tongana wâ ti bekpa. Kota Gbia NZAPA ayeke huru tatalita, lo yeke ga na ya ti ngangu pupu ti Mbongo.

Ndia ti fani use ni 28:33

Mbeni mara so ala, azo ti Israel, ala hinga lo pepe, ayeke te akobe ti ayaka ti ala nga na aye so ala wara na lege ti kua ti ala. A yeke sara ngangu na ala lakue si a yeke nika ala.

Ndia ti fani use ni 28:49

KOTA GBIA ayeke tokua na ndö ti ala mbeni mara so alondo na yongoro ndo, na nda ti sese; mbeni mara so ayeke huru ti ti na ndö ti ala tongana *ngoalo, mara so ala ma yanga ti kodro ti lo pepe.

Ndia ti fani use ni 28:64

Fade KOTA GBIA ayeke kangbi ala na popo ti amara kue, ti londo na mbeni nda ti sese ti si na mbeni nda ni. Kâ, ala yeke voro ambeni nzapa so ala wani ahinga ala pepe, akotara ti ala nga ahinga ala pepe; a sara anzapa ni so na keke wala na têne.

Ndia ti fani use ni 4:27

Fade KOTA GBIA ayeke kangbi ala kirikiri na popo ti amara nde; wungo ti ala ayeke ngba gi kete na ya ti akodro so KOTA GBIA ayeke tumba ala daa.