Zakarii 11:7 - Mbeti ti Nzapa - Tënë so amu fini

⁷ Tongaso mbi ga wabatango-taba ti ataba so azo ti kango ala asoro ala ti gue na ala na ndo ti fango ala. Mbi mu anduru keke use ti awabatango-taba. Mbi di iri ti mbeni keke ni “Nzoni be”, mbi di iri ti mbeni “Beoko”. Na pekoni, mbi gue ti bata ataba ni.

Zakarii 11:7 ပူးပေါင်းရင်းမြစ်များ

Abia (Psaumes) 23:4

Ataa mbi hon na popo-hoto so avuko pitipiti, mbeto ti sioni ye oko asara mbi pepe, ngbanga ti so mo KOTA GBIA, mo yeke na mbi. Na keke ti mo ti wabatango-taba, mo yeke fa lege na mbi, mo yeke bata mbi; ye so ayeke mu ngangu na be ti mbi laa!

Abia (Psaumes) 27:4

Mbi hunda gi ye oko na KOTA GBIA, ye so be ti mbi aye mingi ayeke so: mbi ye ti duti na ya ti kota da ti lo, mbi ye ti duti kâ na lango ti fini ti mbi kue ti ngba ti baa pendere ti lo lakue. Kâ, mbi yeke ku titene lo kiri tënë na mbi.

Abia (Psaumes) 90:17

Kota Gbia, Nzapa ti e, sara si nzoni be ti mo aduti na ndö ti e! Sara si peko ti kua ti maboko ti e aga nzoni. Biani, sara si peko ti kua ti maboko ti e aga nzoni.

Ésaïe 11:4

Me azo so ye atia ala, lo yeke fâ ngbanga ti ala mbirimbiri; awayere so ayeke na ya ti kodro, lo yeke leke tënë ti ala na legeni. Tënë ti yanga ti lo ayeke pika kodro ni tongana keke so ayeke pika ye, pupu ti yanga ti lo ayeke fâ azo ti sioni.

Ésaïe 40:11

Tongana wabatango-taba, lo yeke gue na ataba ti lo na ndo ti tengo pere, lo yeke sara maboko ti lo ti bongbi ala; lo yeke yo akete taba ni na ya ti maboko ti lo, lo yeke gue yeke-yeke na ataba so ayeke mu me na amolenge ti ala.”

Ésaïe 61:1

Yingo ti Kota Gbia NZAPA ayeke na ndö ti mbi. Biani, *KOTA GBIA atuku mafuta na li ti mbi, lo tokua mbi ti fa nzoni tënë na awayere, ti kanga ka ti be ti azo so be ti ala afâ, ti tene na azo so a gbu ala na ngbaa atene, a zi ala awe, ti tene na azo ti kanga atene, ala yeke sigigi na ya ti kanga!

Jérémie 39:10

Me lo zia na ya ti kodro ti Juda ambeni wayere kete so ye ti ala oko ayeke daa pepe; lo mu na ala ayaka ti vinye na ayaka.

Awayango-sandaga 27:32

Âdu ti abagara, ataba na angasa, fade a yeke zia nzoroko na tere ti nyama oko na popo ti anyama baleoko si a yeke zia oko ni nde ndali ti KOTA GBIA.

Mishe 7:14

KOTA GBIA, na keke ti mo, mo fa lege na azo ti mo tongana ti so wabatango-taba ayeke fa lege na ataba ti lo. Azo ni aga ye ti mo awe. Fadeso ala yeke duti gi ala oko na ya ti ngonda, me anzoni sese so akeke ayeke sigigi daa pendere angoro tere ni kue. Gue na azo ti mo na nzoni sese ti Bashan na ti Galaad, tongana ti so mo sara ando.

Sofonii 3:12

Fade mbi yeke zia asenge zo na azo ti mawa angba na popo ti ala. Ala yeke kpe na mbi *KOTA GBIA titene mbi bata ala.

Zakarii 11:14

Na pekoni, mbi fâ ya ti use keke ti mbi so iri ni Beoko titene mbi kangbi songo so ayeke na popo ti azo ti Juda na azo ti Israel.

Zakarii 11:4

Mbeni lâ, tënë so *KOTA GBIA, Nzapa ti mbi atene ayeke so: “Ga wabatango-taba ti ataba so a soro ala ti gue na ala na ndo ti fango ala.

Matthieu 11:5

awaziba akiri abaa ndo, azo so gere ti ala abuba akiri atambula nzoni, tere ti azo ti buruma aga nzoni, azo so mê ti ala akanga akiri ama ndo, azo azingo na kuâ, a fa Nzoni Tënë na azo ti mawa.

Marc 12:37

So David wani ayeke iri lo ‘Kota Gbia’ so, Mesii ni akiri ti duti molenge ti David tongana nyen?” Gba ti azo ayeke ma Jésus na ngia na be ti ala.

Jean 10:16

Ambeni taba ti mbi ayeke na ya ti gbagba ti ataba so pepe. Alingbi mbi fa na ala lege; fade ala yeke ma go ti mbi si ala kue aga bongbi oko ti ataba na wabatango-taba oko.

Jacques 2:5

A-ita ti mbi so mbi ye ala mingi, ala ma mbi si: Nzapa asoro azo so azo ti dunia so abaa ala tongana awayere titene ala ga azo ti mosoro na lege ti mabe si *Kodro-gbia so Nzapa amu zendo ni aga ti ala. Biani, lo mu zendo ni na azo so aye lo!

1 Samuel 17:40

Lo mu keke ti lo na maboko ti lo, lo gue na yanga ti ngu si lo soro atêne oku so akpaka tere ni nzoni. Lo zia atêne ni na ya ti bozo ti lo ti zo ti batango anyama. Lo mu *mvingi si lo gue na mbage ti zo ti Filistii ni.

1 Samuel 17:43

Zo ti Filistii so atene na David: “Mbi yeke mbo si mo mu keke ti ga ti tiri na mbi so? Na pekoni, zo ti Filistii so adeba David na iri ti anzapa ti lo.”