Zakarii 10:10 - Mbeti ti Nzapa - Tënë so amu fini

¹⁰ Mbi yeke zi ala na kodro ti Ezipte nga na kodro ti Asirii ti sigigi na ala, mbi yeke bongbi ala na ndo oko; mbi yeke sara si ala kiri na sese ti Galaad nga na sese ti Liban. Ataa so kue, ndo ayeke lingbi ala pepe.

Zakarii 10:10 ပူးပေါင်းရင်းမြစ်များ

Ésaïe 60:22

Ataa sewa so ayeke kete, fade lo yeke du saki oko; ataa sewa so awu pepe, lo yeke ga kota mara. Mbi KOTA GBIA, mbi yeke sara ande ye ni hio tongana ngoi ni alingbi.

Jérémie 22:6

“Tënë so KOTA GBIA atene ndali ti yangbo ti gbia ti Juda ayeke so: Ataa na le ti mbi, mo pendere tongana gbako ti sese ti Galaad, wala tongana li ti hoto ti Liban, biani, fade mbi yeke sara si mo ga tongana benyama, wala mbeni gbata so azo alango daa pepe.

Jérémie 50:19

Me ti Israel, mbi yeke sara titene lo kiri na ndo ti tengo pere ti lo. Fade lo yeke wara kobe ti lo ti tengo ni na ndö ti hoto ti Karmel nga na ti Bashan; na sese ti ahoto ti Efraim nga na sese ti Galaad, lo yeke te ye, ya ti lo asi.

Osée 11:10

Azo so a gbu ala ague na ala na kodro wande, fade ala yeke tambula na peko ti KOTA GBIA. Fade lo yeke toto tongana bamara; tongana lo yeke toto, fade amolenge ti lo ayeke londo na mbage ti Do ti ga na dongo tere.

Osée 11:11

Ala yeke londo na Ezipte ti ga na dongo tere tongana akete ndeke; ala yeke londo na Asirii ti ga tongana ambipa. “Fade mbi yeke sara titene ala lango na ya ti kodro ti ala”; so tënë ti yanga ti KOTA GBIA laa.

Abdias 1:20

Azo ti Israel so a gbu ala na ngbaa ayeke ga tongana gba ti aturugu si ayeke mu sese so alondo na Kanaan ague ngbii asi na Sarepta. Azo ti Jérusalem so a gbu ala na ngbaa si a gue na ala na Sefarad ayeke mu agbata so ayeke na mbage ti Mbongo.

Mishe 7:14

KOTA GBIA, na keke ti mo, mo fa lege na azo ti mo tongana ti so wabatango-taba ayeke fa lege na ataba ti lo. Azo ni aga ye ti mo awe. Fadeso ala yeke duti gi ala oko na ya ti ngonda, me anzoni sese so akeke ayeke sigigi daa pendere angoro tere ni kue. Gue na azo ti mo na nzoni sese ti Bashan na ti Galaad, tongana ti so mo sara ando.

Zakarii 8:7

Tënë so KOTA GBIA so ayeke na ndö ti dunia kue atene ayeke so: Azo ti mbi so a gbu ala si a gue na ala na akodro ti mbage ti To nga na ti mbage ti Do, fade mbi yeke zi ala.

Zakarii 8:8

Fade mbi yeke kiri na ala si ala yeke duti na Jérusalem. Ala yeke duti azo ti mbi si mbi yeke duti Nzapa ti ala. Mbi yeke sara komandema na ndö ti ala na lege ti batango tënë ti yanga ti mbi na fango ngbanga ti mbirimbiri.”