Zakarii 1:3 - Mbeti ti Nzapa - Tënë so amu fini

³ nilaa fade mo yeke tene na ala: Tënë so KOTA GBIA so ayeke na ndö ti dunia kue atene ayeke so: Ala kiri na mbage ti mbi – so tënë ti yanga ti KOTA GBIA so ayeke na ndö ti dunia kue laa – si fade mbi yeke kiri na mbage ti ala; tënë so KOTA GBIA so ayeke na ndö ti dunia kue atene laa.

Zakarii 1:3 ပူးပေါင်းရင်းမြစ်များ

2 Mbai 15:2

Lo gue, lo wara Asa si lo tene na lo: “Gbia Asa, mo na azo ti Juda nga na azo ti Benjamin kue, ala ma mbi si! *KOTA GBIA ayeke na ala, tongana ala yeke na lo. Tongana ala gi lo, fade lo yeke zi lege na ala ti wara lo; me tongana ala zia lo, fade lo nga lo yeke zia ala.

2 Mbai 15:4

Me lani, na ya ti ye ti ngangu so ala yeke daa, ala kiri na mbage ti KOTA GBIA, Nzapa ti Israel; ala kiri agi lo si lo zia lege na ala titene ala wara lo.

Néhémie 9:28

Me gi so ala wara lege ti duti na siriri awe, ala kiri ato nda ti sara siokpari so ake mo. Nilaa mo zia ala na maboko ti awato ti ala so asara komandema na ndö ti ala. Tongaso ala kiri atoto na mo si kâ na yayu, mo ma ala. Na lege ti kota nzoni be ti mo, mo zi ala fani mingi.

Mbeti ti Job 22:23

Tongana mo kiri na mbage ti lo so ngangu ti lo ahon angangu kue, fade lo yeke zia mo na ndo ti mo. Me ye ti sioni, mo zia yongoro na da ti mo.

Ésaïe 31:6

Ala azo ti Israel, ala ke lani KOTA GBIA mingi! Ala kiri fadeso na mbage ti lo ma!

Ésaïe 44:22

Asioni ti mo, mbi mbo ni tongana mbinda ti le ti nduzu; asiokpari ti mo, mbi zi ni tongana mbinda so ayeke hon hongo. Kiri na mbi, ngbanga ti so mbi soo mo awe.”

Jérémie 12:15

Me na peko ti so mbi gboto ala na ndö ti sese ni awe, mbi yeke kiri ti baa mawa ti azo ni si mbi yeke kiri na zo oko oko na ndö ti sese ti lo nga na ya ti kodro ti lo.

Jérémie 25:5

Lo tene na ala: ‘Ala zia ngbene lege ti sarango ye ti ala, ala zia asioni ti ala. Tongaso, fade ala yeke wara lege ti duti ngbene ye kpu na kpu, lakue lakue na ya ti kodro so mbi mu ando na ala nga na akotara ti ala.

Jérémie 3:1

*KOTA GBIA atene: Tongana koli atumba wali ti lo si wali ni ague, amu mbeni koli nde, fade kozo koli ni alingbi ti kiri na tere ti wali ni? Oko pepe! Kodro so azo ni ayeke sara mara ti aye tongaso ayeke ga sioni ahon ndoni pepe? Ti mo Israel, mo sara ye ti ndumba na gba ti andeko. Na pekoni mo tene, mo ye ti kiri na tere ti mbi? So tënë ti yanga ti KOTA GBIA laa.

Jérémie 3:22

Azo ti ngangu li, ala kiri maa! Kobela ti ngangu li ti ala so, fade mbi yeke kai ni!” “Baa e laa! E yeke kiri na mo, ngbanga ti so mo laa mo yeke KOTA GBIA, Nzapa ti e.

Jérémie 35:15

Mbi mu ngoi ti mbi kue ti tokua na ala azo ti kua ti mbi, awayanga-Nzapa ti tene na ala, azo ti Juda, atene: ‘Ayeke nzoni zo oko oko azia sioni lege ti sarango ye ti lo; ala sara si sarango ye ti ala akiri aga nzoni; ala mu peko ti anzapa nde pepe ti voro ala. Tongaso, fade ala yeke ngba ti duti na ya ti kodro so mbi mu na ala, ala na akotara ti ala.’ Me ala dingi mê ti ala kete pepe, ala ma mbi pepe.

Jérémie 4:1

So tënë ti yanga ti *KOTA GBIA laa: “Israel, tongana mo kiri, mbi laa, alingbi mo kiri na mbage ti mbi. Tongana mo zi afungo nzapa ti mo so na le ti mbi, mo yeke kpe ti hon kirikiri mbeni pepe.

Ezekiel 18:19

“Ala yeke hunda ndo, atene: ‘Asioni so babâ ni asara so, ndali ti nyen si molenge ni ayo ngbanga ni pepe?’ Ayeke ndali ti so molenge ni asara ye na lege ti ndia nga na lege ti ye ti mbirimbiri. Lo bata atënë ti andia ti mbi kue, lo sara ye alingbi na ni. Ndali ni, fade lo yeke ngba na fini.

Ezekiel 18:31

Ala bi asioni sarango ye ti ala yongoro, ala sara si be ti ala na yingo ti ala aga fini ni! Ala azo ti Israel, ala ye ti kui ngbanga ti nyen?

Ezekiel 18:32

Biani, be ti mbi anzere na kuâ ti mbeni zo pepe; so tënë ti yanga ti mbi, Kota Gbia NZAPA laa. Ala zia lege ti sioni si ala ngba na fini!”

Ezekiel 33:11

Tene na ala, mo tene: Fini ti mbi! So tënë ti yanga ti Kota Gbia NZAPA laa. Mbi yeke wara ngia ndali ti kuâ ti zo ti sioni? Ye so anzere na be ti mbi ayeke titene zo ti sioni azia sioni lege ti sarango ye ti lo si lo duti na fini. Ala azo ti Israel, ala zia sioni lege ti sarango ye ti ala, ala zia ni! Ala ye ti kui ngbanga ti nyen?

Osée 14:1

Fade azo ti Samarii ayeke wara ye ti peko ti sioni so ala sara, ngbanga ti so ala tomboka na tere ti Nzapa. Fade ala yeke kui na ya ti bira, a yeke nika amolenge ti ala so angba ti nyon me, a yeke suru ya ti amama ti ngo.”

Osée 14:4

Asirii alingbi ti soo e na kuâ pepe. Fade e yeke kiri ti ko na ndö ti mbarata ti bira pepe; ayanda so e sara na maboko ti e so, e yeke kiri ti iri ala ‘Nzapa ti e’ pepe. Gi mo Nzapa oko laa, mo yeke baa mawa ti nyindu.”

Osée 6:1

Nilaa ala yeke tene: “Ala ga, e kiri na mbage ti *KOTA GBIA. Lo laa lo zia ka na tere ti e, lo laa lo yeke sara si ka ni amu; lo laa lo pika e si e wara ka, lo laa lo yeke kanga le ti ka ni.

Joël 2:12

So tënë ti yanga ti *KOTA GBIA laa: “Fadeso, ngoi titene ala kiri na mbage ti mbi na be ti ala kue laa; ala ke kobe ti sambela, ala toto, ala dema tere ti ala na mbi!

Malashii 3:7

Tongana ti so akotara ti ala asara ando, ala nga, ala zia lege ti aye so mbi fa na ala; ala sara ye alingbi na ni pepe. Ala kiri na mbage ti mbi si fade mbi kiri na mbage ti ala. Tënë so KOTA GBIA so ayeke na ndö ti dunia kue atene laa. Ala hunda ndo, atene: ‘E yeke sara tongana nyen ti kiri na mbage ti mo?’