Tite 3:14 - Mbeti ti Nzapa - Tënë so amu fini

¹⁴ Alingbi azo ti e nga amanda lege ti mu tere ti ala kue ti sara anzoni ye. Tongaso, tongana mbeni ye atia, ala lingbi ti mu maboko ndali ni, ala duti gi senge pepe.

Tite 3:14 ပူးပေါင်းရင်းမြစ်များ

Ésaïe 61:3

Ala yeke na mua ndali ti *Sion, me Nzapa atokua mbi ti zia na li ti ala ye ti pendere na plase ti mburu ti wâ; ti kpaka na tere ti ala mafuta so afa ngia ti ala, me afa mua pepe; ti yu na ala bongo ti matanga na plase ti be so awoko. Tongaso, a yeke haka ala na akeke so afa mbirimbiri ti Nzapa, a yeke haka ala na yaka so afa gonda ti KOTA GBIA.

Matthieu 21:19

Lo baa mbeni keke ti fige na tere ti lege si lo gue nduru na ni, me lo wara gi akugbe ni. Lo tene na keke ni: “Mo yeke kiri ti le oko pepe!” Gi hio tongaso, keke ti fige ni ahole.

Matthieu 7:19

Keke so kue ale nzoni pepe, fade a yeke de ni si a tuku ni na le ti wâ.

Jean 15:16

Ala laa asoro mbi pepe, me mbi laa mbi soro ala; mbi zia ala titene ala gue ti le mingi si lengo ti ala angba lakue. Tongaso, fade Babâ ayeke mu na ala ye so kue ala hunda na lo na iri ti mbi.

Jean 15:8

Fade Babâ ti mbi ayeke wara gonda na lege so: tongana ala le mingi, so afa atene, ala yeke adisiple ti mbi.

Awatokua 18:3

si lo ngba na ndo ti ala, ngbanga ti so kua ti lo na kua ti ala ayeke legeoko: ala yeke azo ti sarango ada ti bongo.

Awatokua 20:35

Lakue, mbi fa na ala ti sara kua si fade ala lingbi ti mu maboko na azo ti mawa. Ala dabe ti ala na atënë so *Kota Gbia Jésus wani atene: ‘Mungo ye anzere ahon warango ye!’ ”

Rome 12:13

Ala mu maboko na azo ti Nzapa so ye atia ala, ala yamba agene nzoni.

Rome 15:28

Tongana mbi sara ye so kue awe si na le ti azo kue, mbi mu na ala nginza so azo abongbi so awe, fade mbi yeke gue na Espanye. Na hongo ni, fade mbi yeke si na ala kâ.

Efeze 4:28

Zo so lani ayeke zo ti nzi, lo kiri lo nzi pepe; me ayeke nzoni lo mu tere ti lo ti sara kua na maboko ti lo wani na legeni si lo wara ye ti mu maboko na azo ti mawa.

Filipe 1:11

Fade sarango ye ti mbirimbiri so alondo na Jésus Christ ayeke si singo na ya ti fini ti ala; na lege so laa ala yeke gonda Nzapa si ala yeke sepela lo.

Filipe 4:16

So mbi yeke na Tesalonike, ala laa atokua na mbi ye so atia mbi; ala sara ni gi fani oko pepe.

Filipe 4:17

Mbi yeke tumba peko ti ye ti azo pepe; me ye so mbi yeke gi ayeke titene azo ni awara nzoni mingi na lege ti kua so ala yeke sara.

Kolose 1:10

Tongaso, fade dutingo ti ala ayeke lingbi na ti so be ti *Kota Gbia aye si ala sara ye so anzere na be ti lo. Ye ti peko ni ayeke so ala yeke sara mara ti anzoni ye nde nde si hingango so ala hinga na Nzapa ayeke gue lakue na nduzu.

1 Tesalonike 2:9

A-ita, ala dabe ti ala na akua so lani e sara nga na ngangu so ahunzi na e. Na ndembe so e fa Nzoni Tënë na ala, e sara kua bi na lâ titene e ga kungba na ndö ti mbeni zo na popo ti ala pepe.

2 Tesalonike 3:8

Kobe so e te, e hunda ni na mbeni zo pepe ti mu na e senge senge. Me bi na lâ, e sara kua ngangu, na gbiki ti li ti e si e ga kungba na ndö ti mbeni zo oko na popo ti ala pepe.

Tite 2:8

Mo tene gi tënë so ayeke na legeni si zo alingbi ti kasa ni pepe, tongaso si wato agi tënë ti bi na li ti e gbaa si kamene agbu lo.

Tite 3:8

Tënë so ayeke taa-tënë. Mbi ye mo tene tënë na ndö ni ngangu si azo so ama na be na Nzapa azia be ti ala na sarango anzoni ye. So laa ayeke nzoni si azo alingbi ti wara ye daa.

2 Pierre 1:8

So ayeke anzoni ye so ala lingbi ti duti na ni laa. Tongana ala yeke na ni gbani gbani, fade ayeke sara si ala duti senge senge pepe si hingango so ala hinga na *Kota Gbia ti e Jésus Christ ayeke gue lakue gi na nduzu.