Sofonii 3:20 - Mbeti ti Nzapa - Tënë so amu fini

²⁰ Na ngoi ni so, mbi yeke kiri na ala; gi na ngoi ni so, mbi yeke bongbi ala na ndo oko. Gi na le ti ala wani, mbi yeke sara titene gigi ti ala akiri aga nzoni. Mbi yeke sara titene azo ane ala si iri ti ala awu, amu ndo na popo ti azo ti sese kue.” Tënë so KOTA GBIA atene laa.

Sofonii 3:20 ပူးပေါင်းရင်းမြစ်များ

Abia (Psaumes) 35:6

Na ndembe so ange ti KOTA GBIA ayeke tumba peko ti ala, ayeke nzoni lege ti ala avuko si aga dongo dongo.

Ésaïe 56:5

fade mbi yeke mu na ala mbeni ndo na ya ti kota da ti mbi, mbi yeke zia mbeni têne na tere ti dere ti da ni titene ala su iri ti ala na ndö ni; so ayeke duti nzoni ahon amolenge-koli na amolenge-wali. Iri so mbi yeke mu na ala ayeke ngba lakue lakue, mbeni ye ayeke zi ni oko pepe.”

Ésaïe 56:8

Kota Gbia NZAPA so abongbi azo ti Israel so a gbu ala ando a gue na ala na kodro wande, tënë so lo tene ayeke so: “Mbi bongbi azo na tere ti ala awe, mbi yeke kiri ti bongbi ambeni zo na tere ti ala.”

Ésaïe 60:15

Azo ado mo lani azia, azo ake mo, zo oko ahon na ndo ti mo pepe. Me fadeso mbi yeke sara titene mo ga gbata so azo ayeke pika kate ti ala ndali ni kpu na kpu, gbata so azo ti angoi kue ayeke duti na ngia ndali ni.

Ésaïe 61:9

Na popo ti amara nde, azo ayeke hinga *ahale ti ala. Na ndo kue, azo ayeke hinga amolenge ti amolenge ti ala. Azo so kue ayeke baa ala, ayeke hinga ala na lege ti ye so: ala yeke amara so KOTA GBIA asara tufa na ndö ti ala.

Ésaïe 62:12

Fade a yeke iri ala: “Azo so ayeke nde si ayeke nzoni kue, azo so KOTA GBIA azi ala awe”. Ti mo Jérusalem, azo ayeke kiri ti iri mo pepe, atene: “Gbata so azo ado azia”, me ala yeke iri mo, atene: “Gbata so be ti Nzapa aye”.

Ésaïe 62:7

Ala zia nga lo ti wu tere ti lo pepe, ngbii lo kiri lo leke Jérusalem si, ngbii lo sara titene Jérusalem aga ye ti gonda na ndö ti sese kue.”

Ésaïe 66:22

Biani, legeoko tongana fini yayu na fini sese so mbi sara ayeke ngba ti luti ngangu na dawa ti mbi, fade iri ti *ahale ti ala na ti ala wani ayeke ngba ti luti ngangu na dawa ti mbi; so tënë ti yanga ti KOTA GBIA laa.

Jérémie 23:3

“Na pekoni, mbi wani, mbi yeke bongbi tanga ti ataba ti mbi na ya ti akodro so kue mbi kangbi ando ala daa. Fade mbi yeke kiri na ala na ndo ti tengo pere ti ala. Kâ, ala yeke kiri ti du mingi si ala ga gbani gbani.

Jérémie 29:14

fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 30:3

So tënë ti yanga ti KOTA GBIA laa: Mbeni lango ayeke ga so mbi yeke sara titene azo ti Israel na azo ti Juda so ayeke azo ti mbi akiri na kozo ndo ti ala. Fade mbi yeke kiri na ala na ya ti kodro so mbi mu ando na akotara ti ala; ala yeke kiri ti mu ni titene aga ye ti ala; mbi KOTA GBIA laa, mbi tene.”

Jérémie 33:9

Tongaso, fade ye ni ayeke sara si be ti mbi anzere, ayeke sara si azo agonda mbi si aga ye ti pendere ti mbi na le ti amara kue ti sese. Tongana amara ni ama tënë ti anzoni ye so kue mbi yeke sara ndali ti gbata ni, fade ala yeke do na mbeto si tere ti ala ayeke do ndali ti gba ti nzoni ye na siriri so mbi yeke mu na gbata ni.”

Ezekiel 16:53

Mbi yeke sara si dutingo ti agbata so akiri aga nzoni tongana ti kozo: Sodome na agbata so ayeke na tere ni, Samarii na agbata so ayeke na tere ni. Ti mo Jérusalem, mbi yeke sara nga si dutingo ti mo aga nzoni tongana ti ala.

Ezekiel 28:25

“Tënë so mbi Kota Gbia NZAPA, mbi tene ayeke so: Lani, mbi sara si azo ti Israel akangbi na popo ti amara; fade mbi yeke mu ala na popo ti amara ni, ti bongbi ala na ndo oko. Na lege ti azo ti Israel, mbi yeke fa na le ti amara nde so mbi yeke Nzapa so mbi yeke nde si mbi yeke nzoni kue. Fade azo ti Israel ayeke duti na sese ti ala, sese so mbi mu ando na Jacob, zo ti kua ti mbi.

Ezekiel 34:16

Taba so agirisa, fade mbi yeke gi lo; lo so agirisa lege, mbi yeke kiri na lo na ndö ti lege; lo so awara ka, mbi yeke kanga ka ni; lo so ayeke na kobela, mbi yeke sara titene lo wara ngangu. Me taba so akono konongo, lo so ayeke na ngangu, mbi yeke fâ lo. Mbi yeke gi kobe ndali ti ataba ti mbi na legeni.”

Ezekiel 37:12

Ndani laa, tene peko ti tënë ti yanga ti mbi, mo tene na ala: Tënë so Kota Gbia NZAPA atene ayeke so: Mbi yeke zi yanga ti adu ti kuâ ti ala, mbi yeke sara titene ala sigigi na ya ti adu ti kuâ ni, ala azo ti mbi. Mbi yeke kiri na ala na sese ti Israel.

Ezekiel 37:21

Na pekoni, mo tene na ala: Tënë so Kota Gbia NZAPA atene ayeke so: Ala azo ti Israel, mbi yeke zi ala na popo ti amara nde so ala gue na ndo ti ala nga na ando nde nde, mbi yeke bongbi ala si mbi yeke kiri na ala na sese ti ala.

Ezekiel 39:13

Azo ti kodro kue laa ayeke lu akuâ ni; lungo akuâ ni ayeke ga ye ti pikango kate ti ala na lango so mbi yeke fa gonda ti mbi. So tënë ti yanga ti Kota Gbia NZAPA laa.

Ezekiel 39:28

Tongaso, fade azo ti Israel ayeke hinga nga atene, mbi yeke KOTA GBIA, Nzapa ti ala, ngbanga ti so, na peko ti so mbi sara si a gbu ala, a gue na ala na kodro wande, mbi kiri mbi bongbi ala na ndö ti sese ti ala. Mbi yeke kiri ti zia zo oko ti ngba kâ pepe.

Joël 3:1

*KOTA GBIA atene: “Na pekoni, fade mbi yeke sara titene Yingo ti mbi aga na ndö ti azo kue. Fade amolenge ti ala ti koli na ti wali ayeke tene peko ti tënë ti yanga ti mbi, ambakoro ti ala ayeke baa li ti ala, amaseka ti ala ti koli ayeke baa aye na ya ti mbeni ye tongana bango-li.

Amos 9:14

Fade mbi yeke sara si gigi ti azo ti Israel, azo ti mbi, akiri aga nzoni, ala yeke kiri ti leke agbata so abuba so, ala yeke lango na ya ti agbata ni, ala yeke fâ ayaka ti vinye, ala yeke nyon vin ni; ala yeke fâ ayaka si ala yeke te akobe ni.

Mishe 2:12

“*KOTA GBIA atene: ala *ahale ti Jacob, fade mbi yeke bongbi ala kue na ndo oko, mbi yeke bongbi nga tanga ti azo ti Israel so angba na fini so. Mbi yeke zia ala na ndo oko tongana ti so a yeke bongbi ataba na ya ti gbagba ti ala, tongana gba ti anyama so ayeke na ndo ti tengo pere ti ala. Fade go ti ala ayeke wu tongana go ti gba ti azo.

Mishe 4:7

Ala so gere ti ala abuba, mbi yeke sara titene ala ga tanga ti azo so angba na fini; ala so a gue na ala na yongoro ndo, mbi yeke sara titene ala ga mbeni ngangu mara. Na ndö ti hoto ti Sion, fade KOTA GBIA ayeke duti gbia ti ala fadeso kpu na kpu.

Sofonii 2:7

Tanga ti azo ti Juda so angba na fini, fade sese ni ayeke ga ti ala; ala yeke gue na anyama ti ala ti te pere na ando ni so; na bi, ala yeke lango na ya ti ada ti Askalon. Biani, KOTA GBIA, Nzapa ti ala ayeke ga ti sara nzoni na ala, lo yeke sara si gigi ti ala akiri aga nzoni.

Sofonii 3:19

Na ngoi ni so, fade mbi yeke sara sioni na azo so kue asara ngangu na ala. Azo so awara ka, fade mbi yeke kanga le ti ka ti ala; azo so a gbu ala, a gue na ala na kodro wande, mbi yeke kiri ti bongbi ala na ndo oko. Fade mbi yeke sara titene azo ane ala si iri ti ala awu, amu ya ti akodro so kue a zia lani kamene na le ti ala daa.

Zakarii 8:13

Ala, akodro-gbia ti Juda na ti Israel, na popo ti amara kue, ala yeke lani tapande ti mbeni mara so a deba lo. Me fadeso, mbi soo ala, ala yeke ga tapande ti mbeni mara so a sara tufa na ndö ti lo. Ala sara mbeto pepe, ala gbu ngangu!”

Zakarii 8:8

Fade mbi yeke kiri na ala si ala yeke duti na Jérusalem. Ala yeke duti azo ti mbi si mbi yeke duti Nzapa ti ala. Mbi yeke sara komandema na ndö ti ala na lege ti batango tënë ti yanga ti mbi na fango ngbanga ti mbirimbiri.”

Malashii 3:12

Fade amara kue ayeke tene na ala: Ti ala nzoni, ngbanga ti so kodro ti ala ayeke ga kodro so aye ti nzoni mingi ayeke daa. Tënë so KOTA GBIA so ayeke na ndö ti dunia kue atene laa.”

Ndia ti fani use ni 26:18

Laso KOTA GBIA asara si ala mu zendo so, atene: fade ala yeke duti azo ti lo wani, ala yeke sara ye alingbi na atënë ti ndia ti lo kue.

Ndia ti fani use ni 26:19

Biani, KOTA GBIA Nzapa ti ala aye ti mu iri ti ala na nduzu, ti ne ala, ti sara titene ala wara gonda ahon tanga ti amara so kue lo sara ala. Lo ye titene ala ga azo ti lo wani so ayeke nde si ayeke nzoni kue, tongana ti so lo tene na ala.