Sofonii 3:19 - Mbeti ti Nzapa - Tënë so amu fini

¹⁹ Na ngoi ni so, fade mbi yeke sara sioni na azo so kue asara ngangu na ala. Azo so awara ka, fade mbi yeke kanga le ti ka ti ala; azo so a gbu ala, a gue na ala na kodro wande, mbi yeke kiri ti bongbi ala na ndo oko. Fade mbi yeke sara titene azo ane ala si iri ti ala awu, amu ya ti akodro so kue a zia lani kamene na le ti ala daa.

Sofonii 3:19 ပူးပေါင်းရင်းမြစ်များ

Ésaïe 26:11

KOTA GBIA, mo yo maboko ti mo na nduzu ti pika ala, me ala baa ni pepe. Fade ala yeke baa so mo yeke na nzara mingi ti sara na azo ti mo, tongaso kamene ayeke gbu le ti ala. Wâ so a leke ndali ti awato ti mo ayeke gbi azo ni.

Ésaïe 33:1

Mawa na mo, mo so mo yeke buba ye si ade a buba mo pepe so! Mawa na mo, mo so mo yeke ka azo si ade ti ka mo pepe so! Tongana mo buba aye kue awe, fade a yeke buba nga mo. Tongana mo ka azo kue awe, fade a yeke ka nga mo.

Ésaïe 60:14

Amolenge ti azo so lani asara ngangu na mo, fade ala yeke ba li ti ala na sese si ala yeke ga na mbage ti mo; azo so lani abaa mo tongana mbumbuse zo, ala yeke ga ti kuku na gbe ti mo. Ala yeke iri mo: “Gbata ti KOTA GBIA”, “*Sion, gbata ti Nzapa ti Israel so ayeke nde si ayeke nzoni kue.”

Ésaïe 60:18

Fade azo ayeke kiri ti ma tënë ti sarango ngangu na zo na ya ti kodro ti mo pepe; azo ayeke kiri ti ma tënë ti bubango ye wala tënë ti kungbingo da na ya ti sese ti mo pepe. Me fade mo yeke di iri ti gbagba ti mo ti bira “Songo zo na kuâ”, mo yeke di iri ti ayanga ti gbagba ti mo “Sepelango Nzapa”.

Ésaïe 61:7

KOTA GBIA atene: “Na plase ti kamene so lani ahon ndö ti ala, fade ala yeke wara sese ti azo ni akono fani use. Na plase ti zongango ndo so azo azonga ala, ala yeke dodo na ngia, ngia ni ayeke ngba lakue lakue.

Ésaïe 62:7

Ala zia nga lo ti wu tere ti lo pepe, ngbii lo kiri lo leke Jérusalem si, ngbii lo sara titene Jérusalem aga ye ti gonda na ndö ti sese kue.”

Jérémie 30:16

Me azo so kue ate mo, fade a yeke te ala; azo so kue be ti ala ake mo, fade a yeke gbu ala ti gue na ala na kodro wande; azo so anzi aye ti mo, fade a yeke nzi aye ti ala; azo so kue agbu aye ti mo, fade a yeke gbu aye ti ala.

Jérémie 30:19

Na popo ti ala, fade a yeke ma go ti azo so ayeke he bia ti mungo singila si ala yeke dekongo na ngia. Ala *ahale ti Jacob, fade mbi yeke sara si ala kiri awu mingi, wungo ti ala ayeke kiri na peko pepe; mbi yeke sara si azo ane ala, zo ayeke kiri ti baa ala tongana abuba zo pepe.

Jérémie 31:8

Mbi yeke mu ala na kodro ti mbage ti Banga ti kiri na ala; mbi yeke sara titene ala londo na nda ti sese kue ti bongbi na ndo oko. Na popo ti ala, awaziba ayeke daa, azo ti bubango gere, awali so ayeke na ngo na ala so ya ti ala ayeke so ti du. Gba ti azo laa ayeke kiri na ndo so.

Jérémie 33:9

Tongaso, fade ye ni ayeke sara si be ti mbi anzere, ayeke sara si azo agonda mbi si aga ye ti pendere ti mbi na le ti amara kue ti sese. Tongana amara ni ama tënë ti anzoni ye so kue mbi yeke sara ndali ti gbata ni, fade ala yeke do na mbeto si tere ti ala ayeke do ndali ti gba ti nzoni ye na siriri so mbi yeke mu na gbata ni.”

Jérémie 46:28

Mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Biani, mbi yeke na mo. Amara so kue mbi kangbi mo lani na popo ti ala, mbi yeke fâ ala kue ti hunzi ala; me ti mo, mbi yeke hunzi mara ti mo pepe. Biani, mbi pika mo, me na legeni; mbi lingbi fade ti zia mo senge tongaso pepe!”

Ezekiel 16:27

Tongaso mbi yoro maboko ti mbi ti pika mo: mbi gbanzi mo na kobe, mbi zia mo na maboko ti awato ti mo, agbata ti Filistii so kamene asara ala ndali ti sioni sarango ye ti mo.

Ezekiel 16:57

Lani, sioni ti mo ade ti sigigi polele na le ti azo pepe. Fadeso, asigigi awe si azo ti agbata ti Edom na agbata so ayeke na tere ni ayeke he mo; azo ti agbata ti Filistii mbage na mbage kue abaa mo tongana mbumbuse ye.

Ezekiel 34:16

Taba so agirisa, fade mbi yeke gi lo; lo so agirisa lege, mbi yeke kiri na lo na ndö ti lege; lo so awara ka, mbi yeke kanga ka ni; lo so ayeke na kobela, mbi yeke sara titene lo wara ngangu. Me taba so akono konongo, lo so ayeke na ngangu, mbi yeke fâ lo. Mbi yeke gi kobe ndali ti ataba ti mbi na legeni.”

Ezekiel 39:13

Azo ti kodro kue laa ayeke lu akuâ ni; lungo akuâ ni ayeke ga ye ti pikango kate ti ala na lango so mbi yeke fa gonda ti mbi. So tënë ti yanga ti Kota Gbia NZAPA laa.

Ezekiel 39:26

Tongaso, fade be ti ala ayeke girisa na gba ti kamene ti ala nga na asioni ye so kue ala sara ti ke mbi. Ala yeke kiri ti duti na siriri na ndö ti sese ti ala; zo oko ti sara titene tere ti ala ado na mbeto ayeke daa pepe.

Mishe 7:10

Fade wato ti mbi ayeke baa ye ni na le ti lo si kamene ayeke gbu le ti lo; wato ti mbi so ayeke hunda lani mbi, atene: “KOTA GBIA, Nzapa ti mo ni ayeke na ndo wa?” Fade mbi yeke baa lo na le na ndembe so a yeke do lo na gere, tongana ti so a yeke do potopoto na lege.

Sofonii 3:15

Ngbanga so *KOTA GBIA aye ti fâ na li ti ala so, lo zia ni awe; lo tumba awato ti ala yongoro awe. KOTA GBIA, gbia ti Israel, ayeke na popo ti ala, mbeni ye ti sioni ayeke kiri ti zia mbeto na be ti ala pepe.

Zakarii 8:23

Tënë so KOTA GBIA so ayeke na ndö ti dunia kue atene ayeke so: na ngoi ni so, fade azo baleoko so ayeke tene ayanga ti kodro nde nde ayeke gbu mbeni zuife oko na yanga ti bongo ti lo si ayeke tene na lo: ‘E nga, e ye ti gue na ala, ngbanga ti so e ma a tene, Nzapa ayeke na ala.’ ”

Ndia ti fani use ni 26:19

Biani, KOTA GBIA Nzapa ti ala aye ti mu iri ti ala na nduzu, ti ne ala, ti sara titene ala wara gonda ahon tanga ti amara so kue lo sara ala. Lo ye titene ala ga azo ti lo wani so ayeke nde si ayeke nzoni kue, tongana ti so lo tene na ala.

Ahebro 12:13

Ala suru lege so ayeke mbirimbiri titene ala hon daa, tongaso si zo so gere ti lo abuba, abuba biani pepe, me tere ti lo aga nzoni.

Aye so Nzapa afa 20:9

Ala yeke mu ndö ti sese kue si ala yeke ngoro tere ti gbagba so azo ti Nzapa ayeke daa nga na gbata so Nzapa aye ni mingi so. Me mbeni wâ alondo na nduzu, ati si agbi ala kue.

Awafango-ngbanga 1:7

Adoni-Bezek atene: “Agbia balembarambara so mbi fâ akota li ti maboko ti ala na ti gere ti ala ayeke ro lani anduru mapa so ati na gbe ti meza ti mbi. Ye so mbi sara so laa Nzapa akiri peko ni na mbi so!” A mu Adoni-Bezek, ague na lo na Jérusalem si lo kui kâ.