Sofonii 3:14 - Mbeti ti Nzapa - Tënë so amu fini

¹⁴ Mo gbata ti *Sion, mo dekongo na ngia! Ala azo ti Israel, ala pika maboko ti ala na ngia. Mo gbata ti Jérusalem, mo duti na ngia na be ti mo kue!

Sofonii 3:14 ပူးပေါင်းရင်းမြစ်များ

Néhémie 12:43

Na lango ni so, azo amu gba ti *sandaga na Nzapa, ala sara ngia mingi. Biani, Nzapa asara si be ti azo ti lo asi singo na kota ngia. Na Jérusalem, awali na amolenge asara nga ngia mingi si a ma ngia ni na mbeni ndo yongoro.

Abia (Psaumes) 14:7

Tongana songo benda ti azo ti Israel alondo fade na hoto ti *Sion si aga, ka ayeke nzoni mingi! Na ngoi so KOTA GBIA ayeke zi azo ti lo ti kiri na ala, azo ti lo so a gbu ala a gue na ala na kodro wande so, fade *ahale ti Jacob ayeke dodo na ngia si azo ti Israel ayeke duti na ngia!

Abia (Psaumes) 149:2

Ayeke nzoni azo ti Israel aduti na ngia ndali ti lo so lo sara ala! Ayeke nzoni azo ti *Sion adodo na ngia ndali lo, lo yeke gbia ti ala!

Abia (Psaumes) 97:8

Azo ti *Sion ama tënë ni si ala duti na ngia. Agbata ti Juda ayeke dodo na ngia ndali ti fango ngbanga ti mo KOTA GBIA.

Ésaïe 12:6

Ala, azo so alango na *Sion, ala dekongo na ngia, ala dodo na ngia, ngbanga ti so Nzapa ti Israel so ayeke na popo ti ala, lo yeke kota, lo yeke nde si lo yeke nzoni kue.

Ésaïe 29:19

Azo so ayeke sara tere ti ala kete ayeke wara ngia so ayeke gue guengo na nduzu ndali ti *KOTA GBIA; azo so yere ti ala ahon ndoni ayeke dodo na ngia ndali ti Nzapa ti Israel so ayeke nde si ayeke nzoni kue.

Ésaïe 35:2

Ayeke nzoni akongo ni amu ndö ti sese ni. Ayeke nzoni sese ni ahuru na ngia, lo dodo na ngia si lo dekongo na ngia! *KOTA GBIA amu na lo pendere ti hoto ti Liban awe, zango ti hoto ti Karmel na ti lando ti Saron. Tongaso, azo ayeke baa gonda ti KOTA GBIA, ala yeke baa nga zango ti Nzapa ti e.

Ésaïe 37:22

Baa, tënë so KOTA GBIA atene na tere ti lo ayeke so: Pendere maseka-wali, gbata ti *Sion abaa mo tongana mbumbuse zo, lo yeke he mo na ngia. Pendere maseka-wali, gbata ti Jérusalem ayeke yingi li ti lo si ayeke he mo na peko ti mo.

Ésaïe 40:1

Nzapa ti ala atene: Ala de be ti azo ti mbi, ala de be ti azo ni.

Ésaïe 40:9

Mo gbata ti *Sion, mo so mo yeke ga na nzoni tënë, mo ma na li ti kota hoto. Mo Jérusalem, mo so mo yeke ga na nzoni tënë, mo yo go ti mo na nduzu na ngangu ti mo kue. Mo yo go ti mo na nduzu, sara mbeto pepe. Tene na agbata ti Juda: “Baa, Nzapa ti ala laa!

Ésaïe 51:11

Azo so KOTA GBIA azi ala, fade ala yeke kiri; ala yeke dekongo na ngia si ala yeke linda na ni na *Sion. Ngia so angba lakue lakue ayeke za na ndö ti le ti ala, nzerengo tere so asi singo ayeke duti na ala, pasi na demango tere ayeke kpe ti hon.

Ésaïe 52:9

Ando ti Jérusalem so abuba so, ala dekongo na ngia! KOTA GBIA ayeke de be ti azo ti lo, lo yeke zi Jérusalem na gbe ti ngbaa.

Ésaïe 54:1

Jérusalem, mo wali ti dungo ni pepe, dekongo na ngia! Mo so mo hinga lani songo ti dungo ni pepe, he bia na ngia, mo duti na ngia. Biani *KOTA GBIA atene na mo: “Mo wali so koli ado mo azia, fadeso, mo yeke na amolenge gbani ahon wali so angba na da ti koli.

Jérémie 30:19

Na popo ti ala, fade a yeke ma go ti azo so ayeke he bia ti mungo singila si ala yeke dekongo na ngia. Ala *ahale ti Jacob, fade mbi yeke sara si ala kiri awu mingi, wungo ti ala ayeke kiri na peko pepe; mbi yeke sara si azo ane ala, zo ayeke kiri ti baa ala tongana abuba zo pepe.

Jérémie 31:13

Tongaso, fade amaseka-wali ayeke dodo na ngia, amaseka-koli na ambakoro ayeke sara legeoko tongaso. Mbi yeke sara si mawa ti ala aga ngia, mbi yeke de be ti ala. Na peko ti vundu ti ala, mbi yeke sara si ala duti na ngia.

Jérémie 33:11

bia ti azo so tere ti ala anzere, bia ti azo so ayeke na ngia, bia ti akoli na awali so amu tere fini ni. A yeke ma nga bia ti azo so ayeke ga na *sandaga ti mungo singila na ya ti kota da ti KOTA GBIA, atene: ‘Ala mu singila na KOTA GBIA so ayeke na ndö ti dunia kue, ngbanga ti so lo yeke nzoni, nzoni be ti lo angba kpu na kpu!’ Biani, fade mbi yeke sara titene kodro so akiri na kozo ndo ti lo”; tënë so KOTA GBIA atene laa.

Joël 2:23

Ala azo so ayeke lango na *Sion, ala dodo na ngia, ala duti na ngia ndali ti KOTA GBIA, Nzapa ti ala. Na peko ti buru, lo yeke tokua na ala ngu-Nzapa ti zi ala na ya ti kpale, lo yeke tokua na ala ngu-Nzapa alingbi na angoi ni tongana ti kozoni.

Mishe 4:8

Mo, hoto ti Sion, mo so mo yeke baa ndo na ndö ti azo tongana mbeni wabatango-taba so aluti na nduzu, fade mo yeke kiri ti wara komandema ti mo ti kozo. Jérusalem ayeke kiri ti ga kota gbata ti kodro ni.”

Matthieu 21:9

Azo so ayeke tambula na dawa ti Jésus na ala so ayeke tambula na peko ti lo ayeke dekongo, atene: “E gonda Molenge ti David! Ayeke nzoni Nzapa asara tufa na ndö ti lo so aga na iri ti Kota Gbia! E gonda Nzapa so ayeke na yayu kâ na ndö ti aye kue!”