Sigingo 40:34 - Mbeti ti Nzapa - Tënë so amu fini

³⁴ Tongaso mbinda akanga ndö ti da ti bongo so Nzapa na azo ti lo ayeke wara tere daa si gonda ti KOTA GBIA asi singo na ya ni.

Sigingo 40:34 ပူးပေါင်းရင်းမြစ်များ

2 Samuel 7:6

Na lango so mbi sara si azo ti Israel asigigi na sese ti Ezipte ngbii asi laso, mbi de mbi lango na ya ti mbeni da pepe; me na ya ti tambula ti mbi, mbi yeke lango gi na gbe ti da ti bongo.

2 Mbai 5:13

Azo ti hurungo tatalita na azo ti hengo bia abongbi tere ti ala kue ti sepela na ti gonda KOTA GBIA. Na ndembe so toto ti tatalita, ti ngo na ti aye ti mozoko alondo, ala yeke sepela KOTA GBIA, atene: “E mu singila na KOTA GBIA, ngbanga ti so lo yeke nzoni; nzoni be ti lo angba kpu na kpu!” Tongaso, mbinda asi singo na ya ti kota da ni, da ti KOTA GBIA.

2 Mbai 7:2

Awayango-sandaga awara lege pepe ti li na ya ti kota da ti Nzapa, ngbanga ti so gonda ti KOTA GBIA asi singo na ya ti da ni.

Abia (Psaumes) 26:8

KOTA GBIA, mbi ye kota da ti mo so mo yeke duti na ya ni; mbi ye ndo ti mo so gonda ti mo ayeke na ya ni.

Sigingo 14:24

Na yanga ti ndaperere, KOTA GBIA so ayeke na ya ti ngbongboro wâ nga na ya ti ngbongboro mbinda abaa ndo na mbage ti aturugu ti Ezipte, lo sara si ye aga kirikiri na popo ti ala.

Sigingo 16:10

Na ndembe so Aaron ayeke tene tënë na bongbi ti azo ti Israel kue, ala zia le ti ala na mbage ti benyama, mo ye ti baa, ala baa gonda ti KOTA GBIA asigigi na ya ti mbinda.

Sigingo 25:8

Fade azo ti Israel ayeke sara mbeni da so ayeke nde si ayeke nzoni kue ndali ti mbi titene mbi duti na popo ti ala.

Sigingo 29:43

“Mbi yeke wara azo ti Israel na ndo so; gonda ti mbi ayeke sara si ndo ni ayeke duti nde si aduti nzoni kue.

Sigingo 33:9

Tongana Moïse ali na ya ti da ti bongo ni awe, ngbongboro mbinda ayeke ga ti luti na yanga ti da ni; KOTA GBIA ayeke tene tënë na Moïse.

Ésaïe 57:15

Nzapa so ayeke na nduzu mingi, yongoro kâ, lo so ndo ti lo ayeke kpu na kpu, lo so iri ti lo ayeke nde si ayeke nzoni kue, tënë so lo tene ayeke so: “Mbi Nzapa so mbi yeke nde si mbi yeke nzoni kue, mbi yeke na nduzu mingi. Me mbi yeke na azo so a nika ala awe nga na azo so asara tere ti ala kete. Mbi yeke mu ngangu na be ti azo so asara tere ti ala kete; mbi yeke kiri fini na azo so a nika ala awe.

Ésaïe 6:4

Dekongo ti ala ni asara si yanga ti da ayingi na kadere ni kue; ya ti kota da ti Nzapa asi singo na guru ti wâ.

Ezekiel 10:4

Gonda ti *KOTA GBIA alondo na ndö ti asheruben ni si ayeke gue na mbage ti yanga ti kota da ni. Tongaso mbinda asi ya ti kota da ni kue si zango ti gonda ti KOTA GBIA asi ya ti gbagba ni kue.

Awayango-sandaga 16:2

“Mo tene na ita ti mo Aaron, mo tene: Alingbi lo li na ngoi kue pepe na ndo so ayeke nde si ayeke nzoni kue ahon atanga ni si ayeke na peko ti ridoo so; ndo ni ayeke baa le na *ye ti kangango na yanga ti sanduku ti mbuki. Tongana lo li kâ, lo lingbi ti kui na ndembe so mbi yeke ga ande na ya ti mbinda na ndö ti ye ti kangango na yanga ti sanduku ti mbuki ni.

Aggée 2:7

Fade mbi yeke yingi amara kue si apendere ye ti ala ayeke ga ge gbani gbani. Fade mbi yeke sara titene gonda asi singo na ya ti kota da so; tënë so KOTA GBIA atene laa.

Aggée 2:9

Tongaso, fade gonda ti kota da so ayeke hon gonda ti kozo da ni. Na ndo so, mbi yeke sara titene siriri aduti daa; so tënë ti yanga ti KOTA GBIA so ayeke na ndö ti dunia kue laa.”

Wungo ti azo 7:89

Na ndembe so Moïse ali na ya ti da ti bongo so KOTA GBIA na azo ti lo ayeke wara tere daa, ti tene tënë na KOTA GBIA, Moïse ama mbeni go so ayeke tene tënë na lo. Go ni alondo na nduzu, na popo ti *asheruben use, na ndö ti *ye ti kangango na yanga ti sanduku ti mbuki. Asheruben ni ayeke na ndö ti sanduku so a zia na ya ni atêne so a su atënë ti mbuki na le ni. Tongaso lo yeke tene tënë na lo.

Rome 9:4

A-ita ti mbi ni ayeke azo ti Israel: Nzapa asara si ala ga amolenge ti lo, lo fa gonda ti lo na ala, lo leke *mbuki ndali ti ala, lo fa *Ndia ti lo na ala, lo fa lege ti vorongo lo na ala, lo mu azendo na ala,

Aye so Nzapa afa 15:8

Ya ti kota da ti Nzapa asi na guru ti wâ ndali ti gonda ti Nzapa na ngangu ti lo. Zo oko alingbi ti li na ya ti kota da ni pepe, ngbii aye ti sioni mbarambara so a-ange aga na ni so ahunzi si.

Aye so Nzapa afa 21:3

Mbi ma mbeni kota go so alondo na mbage ti mbata ti gbia ni, atene: “Fadeso, da so Nzapa aduti daa asi na popo ti azo awe! Lo yeke sara kodro na ala, ala yeke duti amara ti lo. Lo wani, lo yeke duti na ala, lo yeke duti Nzapa ti ala.