Sigingo 34:13 - Mbeti ti Nzapa - Tënë so amu fini

¹³ Fade ala yeke kungbi na sese agbalaka ti azo ni, ala yeke kungbi angbongboro têne ti ala so ala leke si aluti na nduzu, ala yeke de na sese akeke so azo ni aleke aluti na nduzu si ala yeke voro ni so.

Sigingo 34:13 ပူးပေါင်းရင်းမြစ်များ

1 Agbia 14:15

KOTA GBIA ayeke pika azo ti Israel si ala yeke ga tongana sosongo so ayeke yingi na le ti ngu. KOTA GBIA ayeke zi ala na ndö ti nzoni sese so lo mu ando na akotara ti ala si lo yeke kangbi ala kirikiri na mbage ti ngu ti Efrate. Ye ni ayeke si ande na ala, ngbanga ti so ala zia ngonzo na be ti KOTA GBIA na lege so ala akeke aluti na nduzu ndali ti nzapa-wali *Ashera.

2 Agbia 10:27

Na pekoni, ala kungbi na sese ngbongboro têne so ala leke aluti na nduzu ndali ti Baal so, ala kungbi nga da ti nzapa Baal ni na sese. Ala sara si da ni aga mbeni kabinee ndali ti azo ti lege. Kabinee ni angba ngbii asi laso.

2 Agbia 18:4

Ando so azo aleke na ndö ti ahoto ti voro anzapa nde daa, Ezekias azi ni. Angbongboro têne so azo aleke ni aluti na nduzu, lo kungbi ni na sese; lo fâ na sese akeke so a leke si aluti na nduzu ndali ti nzapa-wali *Ashera; ngbo so Moïse amu bengba wen si aleke na ni, lo fâ ya ni. Biani, azo ti Israel angba ti zö dukani na dawa ti ngbo ni so ngbii asi na ngoi ni kâ. Ala di iri ti ngbo ni Nehushtan.

2 Agbia 23:14

Yosias afâ ya ti angbongboro têne so a leke si aluti na nduzu, lo de na sese akeke so a leke ndali ti Ashera. Lo mu abio ti akuâ, lo zia na ndö ni.

2 Mbai 14:3

Lo mu yanga na azo ti Juda ti gi KOTA GBIA, Nzapa ti akotara ti ala, ti sara ye alingbi na ndia ti lo nga na atënë ti ndia ti lo.

2 Mbai 15:16

Ataa mama ti lo Maaka, lo zi iri ti “Gbia-wali” so ayeke ndö ti lo, ngbanga ti so mama ti lo ni asara mbeni sioni yanda ndali ti nzapa-wali *Ashera. Asa amu yanga titene a kungbi yanda ni so na sese, a fâ ya ni nduru nduru si a gbi ni na ndo so ayeke na popo-hoto ti Sedron.

2 Mbai 17:6

Lo zia be ti lo kue ti sara na KOTA GBIA. Nilaa lo zi na ya ti kodro-gbia ti Juda ando so azo aleke na ndö ti ahoto si ala yeke voro anzapa nde daa; lo zi nga akeke so azo aleke aluti na nduzu ndali ti nzapa-wali *Ashera.

2 Mbai 24:18

Azo ti Israel azia kota da ti *KOTA GBIA, Nzapa ti akotara ti ala si ala voro akeke so a leke aluti na nduzu ndali ti nzapa-wali *Ashera, ala voro nga ayanda. Nilaa ngonzo ti Nzapa alondo na tere ti azo ti Juda na ti Jérusalem ndali ti sioni so ala sara so.

2 Mbai 31:1

So matanga ni ahunzi awe, azo ti Israel so kue ayeke kâ ague na ya ti agbata ti Juda, ala fâ ya ti angbongboro têne so a leke si aluti na nduzu, ala kungbi na sese akeke so a leke si aluti na nduzu ndali ti nzapa-wali *Ashera, ala buba ando so azo aleke na ndö ti ahoto ti voro anzapa nde daa, ala buba nga agbalaka ti ando ni. Ala sara gi oko ye so na sese ti Juda kue, ti Benjamin, ti Efraim na ti Manase. Na pekoni, azo ti Israel kue akiri na ya ti agbata ti ala, zo oko oko na ndo ti lo.

2 Mbai 33:19

Tënë ti sambela ti lo, lege so Nzapa azia ti sara ngonzo na tere ti lo, asiokpari ti lo nga na aye so lo sara ti ke Nzapa, a su tënë ni na ya ti mbeti ti Hozai. Na ya ti mbeti ni, a su nga iri ti ando so lo leke na ndö ti ahoto titene azo avoro anzapa nde daa, ando so lo leke akeke daa aluti na nduzu ndali ti nzapa-wali *Ashera nga na ayanda nde nde; lo sara aye ni so kozo titene lo sara tere ti lo kete.

Sigingo 23:24

Fade ala yeke kuku na gbe ti anzapa ti amara ni so pepe, ala yeke voro anzapa ni pepe; ala yeke mu peko ti sarango ye ti amara ni pepe. Me fade ala yeke buba alimo ti anzapa ni biani biani, ala yeke kungbi na sese angbongboro têne ti ala so ala leke si aluti na nduzu so.

Ésaïe 17:8

Ala yeke kiri ti baa ndo pepe na mbage ti agbalaka so maboko ti ala wani asara. Akeke so ala leke aluti na nduzu si ala yeke voro ni, wala ata ti wen so ala zia nde titene ala zö dukani na ya ni, ala yeke kiri ti baa ndo daa pepe.

Ésaïe 27:9

Lege so a yeke zi sioni na li ti Jacob laa; ye so ayeke si na peko ti zingo siokpari na li ti lo ni ayeke so: fade a yeke nika atêne kue ti agbalaka tongana ti so a yeke nika mbamba si aga fuku. Akeke so azo aleke aluti na nduzu si ala yeke voro ni, wala ata ti wen so ala zia nde titene ala zö dukani na ya ni ayeke kiri ti ngba na nduzu pepe.

Jérémie 17:2

Tongana ti so ala yeke dabe ti ala na amolenge ti ala, ala yeke dabe ti ala legeoko tongaso na agbalaka ti ala, na akeke ti Ashera ti ala nga na akeke so afini kugbe ayeke daa gbani gbani si ayeke na ndö ti ahoto.

Mishe 5:14

Fade ngonzo ti mbi ayeke londo tongana wâ na tere ti amara so ake ti ma yanga ti mbi; mbi yeke kiri na ala peko ti sioni so ala sara na mbi.”

Wungo ti azo 33:52

fade ala yeke tumba azo ti kodro ni kue, ala yeke buba ayanda ti azo ni so ala sara na têne nga na wen, ala yeke kungbi ayanda ti ala kue na sese. Ala yeke buba ando so azo aleke na ndö ti ahoto ti voro anzapa nde daa.

Ndia ti fani use ni 16:21

Moïse atene: Na tere ti gbalaka so ala sara ndali ti *KOTA GBIA Nzapa ti ala, fade ala yeke lu mbeni yongoro keke pepe, wala mbeni keke pepe ndali ti *Ashera.

Ndia ti fani use ni 16:22

Fade ala yeke leke angbongboro têne aluti na nduzu nga pepe; be ti KOTA GBIA Nzapa ti ala ake ye so mingi.

Ndia ti fani use ni 7:5

Baa ye so ala, azo ti Israel, alingbi ala sara na azo ti amara ni so laa: ala kungbi agbalaka ti ala na sese, ala fâ ya ti angbongboro têne ti ala so ala leke aluti na nduzu so, ala de na sese akeke ti ala so ala leke aluti na nduzu ndali ti nzapa-wali Ashera so, ala gbi ayanda ti ala.

Awafango-ngbanga 2:2

Me mbi mu yanga na ala titene ala na azo ti kodro so aga ambuki pepe. Fade ala kungbi agbalaka ti azo ni kue na sese. Me ala ma yanga ti mbi pepe. Nyen laa ala sara so, nyen?

Awafango-ngbanga 6:25

Gi na bi ni so, *KOTA GBIA atene na Gédéon: “Mu koli-bagara ti babâ ti mo, so ti tene use koli-bagara ni so ngu ti lo ayeke mbarambara so. Gue mo kungbi na sese gbalaka so babâ ti mo ayeke mu *asandaga na *Baal so. Mo fâ nga keke so ayeke na tere ni si a leke aluti na nduzu ndali ti nzapa-wali *Ashera.

Awafango-ngbanga 6:26

Fade mo leke na KOTA GBIA, Nzapa ti mo mbeni gbalaka so a leke ni nzoni na li ti hoto so. Na pekoni, mo mu koli-bagara ni, mo ya na sandaga so a yeke gbi ni kue na wâ na KOTA GBIA. Mo mu keke so a leke aluti na nduzu ndali ti Ashera si mo fâ ni so, mo gbi na sandaga ni.”