Sigingo 23:24 - Mbeti ti Nzapa - Tënë so amu fini

²⁴ Fade ala yeke kuku na gbe ti anzapa ti amara ni so pepe, ala yeke voro anzapa ni pepe; ala yeke mu peko ti sarango ye ti amara ni pepe. Me fade ala yeke buba alimo ti anzapa ni biani biani, ala yeke kungbi na sese angbongboro têne ti ala so ala leke si aluti na nduzu so.

Sigingo 23:24 ပူးပေါင်းရင်းမြစ်များ

2 Agbia 17:11

Na ando so kue ala leke na ndö ti ahoto titene ala voro anzapa nde daa, ala zö dukani tongana amara nde so KOTA GBIA atumba ando ala na dawa ti azo ti Israel so. Ala sara asioni ye mingi ti zia ngonzo na be ti KOTA GBIA.

2 Agbia 17:8

Ala sara ye alingbi na andia ti amara nde so KOTA GBIA atumba ando ala na dawa ti azo ti Israel si lo mu kodro ti amara ni na azo ti Israel. Azo ti Israel asara nga ye alingbi na andia so agbia ti Israel azia na sese.

2 Agbia 18:4

Ando so azo aleke na ndö ti ahoto ti voro anzapa nde daa, Ezekias azi ni. Angbongboro têne so azo aleke ni aluti na nduzu, lo kungbi ni na sese; lo fâ na sese akeke so a leke si aluti na nduzu ndali ti nzapa-wali *Ashera; ngbo so Moïse amu bengba wen si aleke na ni, lo fâ ya ni. Biani, azo ti Israel angba ti zö dukani na dawa ti ngbo ni so ngbii asi na ngoi ni kâ. Ala di iri ti ngbo ni Nehushtan.

2 Agbia 3:2

Yoram asara ye so ayeke sioni na le ti *KOTA GBIA. Me lo sara ni tongana ti babâ ti lo na mama ti lo pepe, ngbanga ti so têne so babâ ti lo aleke ando aluti na nduzu na iri ti *Baal so, lo zi ni.

2 Mbai 14:2

Lo zi agbalaka ti anzapa ti awande nga na ando so azo aleke na ndö ti ahoto si ala yeke voro anzapa nde daa; lo kungbi na sese angbongboro têne so azo aleke si aluti na nduzu, lo fâ ya ti akeke so ala leke si aluti na nduzu ndali ti nzapa-wali *Ashera.

2 Mbai 25:14

So Amasia akiri na kodro na peko ti so lo kinda azo ti Edom awe, lo mu ayanda ti azo ti Edom ni, lo ga na ala. Lo baa ayanda ni tongana anzapa ti lo, lo yeke voro ala si lo yeke zö dukani ndali ti ala.

2 Mbai 33:2

Lo sara ye so ayeke sioni na le ti *KOTA GBIA. Lo mu gi peko ti sioni sarango ye ti amara so KOTA GBIA atumba ala na ya ti kodro ni si lo mu kodro ni na azo ti Israel; sioni sarango ye so zo alingbi ti baa na le ti lo fani use pepe.

2 Mbai 33:9

Me Manase apusu azo ti Juda na ti Jérusalem titene ala kiri asara sioni ahon amara so KOTA GBIA afâ ando ala kue kue kue na dawa ti azo ti Israel so.

Abia (Psaumes) 101:3

Fade mbi yeke zia le ti mbi angba na ndö ti ye ti sioni pepe. Be ti mbi ake sarango ye ti azo so ake mo, ngbanga ti mbi ayeke na sarango ye ti ala ni pepe.

Sigingo 20:3

“Alingbi mo voro ambeni nzapa nde pepe, gi mbi oko.

Sigingo 20:5

Alingbi mo kuku na gbe ti ayanda so pepe, mo voro ala pepe, ngbanga ti so mbi KOTA GBIA Nzapa ti mo, mbi yeke Nzapa so ayeke sara mbanda ti azo ti lo. Azo so asara sioni ti ke mbi, mbi yeke kiri na sioni ti azo ni na ndö ti *ahale ti ala, ngbii asi na molongo ota ni wala molongo osio ni.

Sigingo 23:13

“Aye so kue mbi mu yanga daa na ala so, ala sara ye alingbi na ni. Ala sambela ambeni nzapa nde pepe; ala di nga iri ti anzapa ni na yanga ti ala pepe.”

Sigingo 23:32

Alingbi ala na azo ni wala ala na anzapa ti azo ni aga ambuki pepe.

Sigingo 23:33

Alingbi azo ni asara kodro na ndo ti ala pepe, tongaso pepe, fade azo ni ayeke handa ala titene ala sara siokpari so ake mbi. Biani, tongana ala azo ti mbi, ala voro anzapa ti azo ni, fade vorongo anzapa ni ayeke ga tongana kuku ndali ti ala.”

Sigingo 32:20

Moïse amu yanda ti bagara so azo ni asara so, lo gbi na wâ, lo nika ni si aga fuku. Lo tuku fuku ni na le ti ngu si lo mu ngu ni na azo ti Israel titene ala nyon.

Ezekiel 16:47

Mo mu gi lege ti sarango ye ti ala pepe, mo na ala asara gi mara sioni ye so zo alingbi ti baa na le ti lo fani use pepe; so kue alingbi na mo pepe! Me lege ti sarango ye ti mo ayeke sioni mingi ahon ti ala kue!

Osée 10:2

Be ti azo ti Israel ayeke use use. Fadeso ala yeke wara ye ti peko ti sioni ti ala: *KOTA GBIA wani ayeke kinda agbalaka ti ala si lo yeke kungbi angbongboro têne ti ala so ala leke aluti na nduzu so.

Awayango-sandaga 18:3

Ye so azo asara na sese ti Ezipte, ala sara ni pepe; ala lango ando kâ. Ye so azo asara na sese ti Kanaan, ndo so mbi yeke sara titene ala gue daa so, ala sara ni pepe. Ala sara ye alingbi na andia ti azo ni pepe.

Awayango-sandaga 26:1

“Ala sara ayanda pepe, ala sara limo ti mbeni nzapa wala mbeni ngbongboro têne so aluti na nduzu ndali ti ala wani pepe. Atêne so a de alimo na tere ni, ala zia ni na ya ti kodro ti ala pepe, ala kuku, akpo li ti ala na sese na dawa ni pepe. Biani, mbi laa mbi yeke KOTA GBIA, Nzapa ti ala.

Wungo ti azo 25:2

Awali ni ahanda azo ti Israel ti mu *asandaga na anzapa ti ala. Azo ti Israel ate akobe ti anzapa ni si ala kuku na gbe ti ala ti voro ala.

Wungo ti azo 33:52

fade ala yeke tumba azo ti kodro ni kue, ala yeke buba ayanda ti azo ni so ala sara na têne nga na wen, ala yeke kungbi ayanda ti ala kue na sese. Ala yeke buba ando so azo aleke na ndö ti ahoto ti voro anzapa nde daa.

Ndia ti fani use ni 12:3

Fade ala yeke kungbi agbalaka ti amara ni na sese, ala yeke fâ ya ti angbongboro têne so ala leke aluti na nduzu, ala yeke gbi na wâ akeke so ala leke aluti na nduzu ti voro ni, ala yeke kungbi alimo ti anzapa ti ala; ala yeke zi iri ti anzapa ni na ya ti ando ni so.

Ndia ti fani use ni 7:5

Baa ye so ala, azo ti Israel, alingbi ala sara na azo ti amara ni so laa: ala kungbi agbalaka ti ala na sese, ala fâ ya ti angbongboro têne ti ala so ala leke aluti na nduzu so, ala de na sese akeke ti ala so ala leke aluti na nduzu ndali ti nzapa-wali Ashera so, ala gbi ayanda ti ala.