Rome 9:32 - Mbeti ti Nzapa - Tënë so amu fini

³² Ala girisa ni ndali ti nyen? Ndali ti so ala ye ti ga mbirimbiri na le ti Nzapa na lege ti anzoni ye so ala yeke sara, me ala gi ti ga mbirimbiri na lege ti mabe pepe. Ala pika gere ti ala na tere ti têne so asara si zo aye ti ti,

Rome 9:32 ပူးပေါင်းရင်းမြစ်များ

Ésaïe 8:14

Ndali ti akodro-gbia use ti Israel, lo yeke duti ndo so a zia ni nde ndali ti Nzapa, lo yeke duti têne so azo ayeke pika gere ti ala daa, kota têne so ayeke sara titene azo ati, gbanda na kuku ndali ti azo so alango na Jérusalem.

Ésaïe 8:15

Ndali ti lo, azo mingi aye ti ti, ala yeke ti si ya ti tere ti ala ayeke kungbi. Ala yeke ti na ya ti kuku si kuku ni ayeke gbu ala.”

Matthieu 13:57

Aye so kue asara si ala ma na be na lo pepe. Nilaa Jésus atene na ala: “Na ndo kue, azo ayeke ne wayanga-Nzapa; me na ya ti gbata so adu lo daa, wala na popo ti asewa ti lo, azo ayeke ne lo pepe.”

Nzoni Tënë so Luc asu na mbeti 2:34

Siméon asara tufa na ndö ti ala si lo tene na Marie, mama ti molenge ni, lo tene: “Baa, ndali ti Molenge so, fade azo ti Israel mingi ayeke ti si ambeni mingi ayeke londo. Molenge so ayeke ga mbeni ye ti kite;

Nzoni Tënë so Luc asu na mbeti 7:23

Ti lo nzoni, lo so lo ma na be na mbi awe si lo kiri lo zia lege ni pepe!”

Rome 10:3

Lege so Nzapa aleke titene zo amu si lo ga mbirimbiri na le ti lo, azuife ahinga ni pepe, ala leke lege ti ala wani ti ga mbirimbiri. Tongaso ala ke lege so Nzapa aleke titene zo amu si lo ga mbirimbiri.

Rome 11:11

Tongaso mbi hunda ndo, mbi tene: so azuife apika gere ti ala si ala ti so, ala ti biani biani awe? Oko pepe! Me ndali ti tingo ti azuife, azo ti amara nde awara lege ti soo kuâ, tongaso si kota be asara azuife.

Rome 4:16

Ndani laa azo alingbi ti wara aye so Nzapa amu zendo ni gi na lege ti mabe; lo mu aye ni na ahale ti Abraham gi senge senge. Tongaso zendo ni ayeke ndali ti ahale ti Abraham kue. Ambeni zo so azia be ti ala na ndö ti *Ndia, zendo ni ayeke gi ndali ti ala oko pepe, me ayeke nga ndali ti azo so ama na be tongana Abraham, babâ ti e kue.

1 Korente 1:23

Me ti e, e yeke fa tënë ti Christ so a fâ lo na ndö ti keke ti kroa. Na le ti azuife, tënë ni ayeke tongana mbeni ye so azo ayeke pika gere ti ala daa ti ti, na le ti agreke, tënë ni ayeke buba tënë.

1 Pierre 2:6

Biani, na ya ti Mbeti ti Nzapa, a tene: “Ala baa, mbi soro mbeni têne ti ngangu ngere si mbi zia ni na gbata ti *Sion; têne ni ayeke ngangu têne ti gere ti da. Zo so azia be ti lo na ndö ti têne ni, fade kamene ayeke gbu lo pepe.”

1 Pierre 2:8

Mbeti ti Nzapa akiri atene: “Ayeke têne so azo ayeke pika gere ti ala daa, kota têne so ayeke sara titene azo ati.” Ala yeke pika gere ti ala na têne ni, ngbanga ti so ala ke ti yeda na tënë ti Nzapa. Ye so Nzapa aleke ala ando ndali ni laa.