Rome 14:17 - Mbeti ti Nzapa - Tënë so amu fini

¹⁷ Biani, *Kodro-gbia ti Nzapa abaa tënë ti tengo kobe wala tënë ti nyongo ye pepe, me abaa tënë ti sarango ye ti mbirimbiri, ti siriri na ti ngia so Yingo-Vuru ayeke mu na zo.

Rome 14:17 ပူးပေါင်းရင်းမြစ်များ

Ésaïe 32:17

Sarango ye ti mbirimbiri ayeke du siriri, ayeke sara si azo aduti kpoo, mbeni ye ti sioni ayeke si na ala pepe kpu na kpu.

Ésaïe 45:24

Ala yeke tene tënë na ndö ti mbi, atene: “Gi na lege ti *KOTA GBIA oko si sarango ye ti mbirimbiri na ngangu ayeke daa.” Azo so kue atiri na mbi, fade ala yeke ga na mbage ti mbi, kamene ayeke hon ndö ti ala.

Ésaïe 55:12

Fade ala yeke londo na Babilone na ngia, a yeke kiri na ndo ti ala na siriri. Na hongo ti ala, ahoto na akete hoto ayeke dekongo na ngia, akeke kue ti ngonda ayeke pika sako.

Ésaïe 61:3

Ala yeke na mua ndali ti *Sion, me Nzapa atokua mbi ti zia na li ti ala ye ti pendere na plase ti mburu ti wâ; ti kpaka na tere ti ala mafuta so afa ngia ti ala, me afa mua pepe; ti yu na ala bongo ti matanga na plase ti be so awoko. Tongaso, a yeke haka ala na akeke so afa mbirimbiri ti Nzapa, a yeke haka ala na yaka so afa gonda ti KOTA GBIA.

Daniel 2:44

Na ngoi ti agbia ni, fade Nzapa so ayeke na yayu ayeke sara mbeni kodro so ayeke buba laoko pepe; kodro ni ayeke ti na gbe ti azo ti ambeni mara nde pepe. Fade kodro ni ayeke fâ si ayeke nika ambeni kodro ni kue; gi kodro oko so laa ayeke ngba ti lo lakue lakue.

Daniel 9:24

A diko ngoi mbarambara fani balembarambara ndali ti azo ti mo nga ndali ti gbata ti mo so ayeke nde si ayeke nzoni kue. A diko ngoi ni titene sioni sarango ye na siokpari akai, titene a zi siokpari na li ti azo si mbirimbiri ti Nzapa angba lakue lakue, titene aye so zo abaa na ya ti mbeni ye tongana bango-li na tenengo peko ti tënë ti yanga ti Nzapa aga taa-tënë, titene kota da ti Nzapa so ayeke nde si ayeke nzoni kue, azo akiri azia ni nde ndali ti lo.

Matthieu 3:2

lo tene: “Ala zia ngbene lege ti sarango ye ti ala, ngbanga ti so *Kodro-gbia ti yayu aga nduru awe!”

Matthieu 6:33

Ala gi lege ti *Kodro-gbia ti Nzapa kozoni, ala sara nga ye so ayeke mbirimbiri na le ti lo; fade lo yeke mu na ala tanga ti aye kue na ndö ni.

Nzoni Tënë so Luc asu na mbeti 14:15

Na mango tënë so, mbeni zo so aga na matanga ni atene na Jésus: “Ti lo nzoni, zo so ayeke te ande kobe na *Kodro-gbia ti Nzapa!”

Jean 16:33

Mbi tene tënë so na ala titene ala duti na siriri na lege ti gango so ala ga oko na mbi. Na dunia so, fade ala yeke baa pasi, me ala gbu ngangu! Mbi hon dunia so na ngangu awe!”

Jean 3:3

Jésus akiri tënë na lo: “Biani, mbi tene na mo taa-tënë: tongana a kiri a du zo pepe, lo lingbi ti baa *Kodro-gbia ti Nzapa pepe.”

Jean 3:5

Jésus akiri tënë na lo: “Biani, mbi tene na mo taa-tënë: tongana a du zo na ngu na Yingo pepe, zo ni alingbi ti li na Kodro-gbia ti Nzapa pepe.

Awatokua 13:52

Me ti adisiple so ayeke na Antioshe, be ti ala asi na ngia na Yingo-Vuru.

Awatokua 9:31

Tongaso *Eglize ti sese ti Judée kue, ti Galile na ti Samarii ayeke lani na siriri. Na lege ti ngangu ti Yingo-Vuru, Eglize ni ayeke kpengba, ayeke kpe mbeto ti Kota Gbia si ayeke mai.

Rome 15:13

Nzapa so ayeke mu na zo lege ti zia be ti lo ti ku ye so lo tene tënë ni, ayeke nzoni lo sara si be ti ala asi na ngia nga na siriri ndali ti mabe so ala yeke na ni. Tongaso, na lege ti ngangu ti Yingo-Vuru, ala ngba ti zia be ti ala ti ku lo lakue.

Rome 8:6

Asioni nzara ti be ti zo ayeke gue na lo na kuâ; me zo so be ti lo ayeke gi na ndö ti ye so Yingo aye, fade lo yeke duti na fini nga na siriri.

1 Korente 1:30

Me Nzapa asara si ala, a-ita, ala ga oko na Jésus Christ si lo sara titene Christ aga ndara ti e. Na lege ti Christ, Nzapa asara si e ga mbirimbiri na le ti lo, e ga azo so ayeke duti nde ndali ti so lo laa lo zi e na ya ti siokpari.

1 Korente 4:20

Biani, *Kodro-gbia ti Nzapa ayeke dikongo gba ti atënë pepe, me ayeke ngangu ti sarango na ye.

1 Korente 6:9

Ala hinga pepe? Azo ti sarango sioni, fade *Kodro-gbia ti Nzapa ayeke ga ti ala pepe. Ala handa tere ti ala pepe: azo ti gingo wali wala gingo koli kirikiri, azo ti vorongo anzapa nde, azo ti gingo wali wala koli ti amba ti ala, akoli so ayeke lango na amba ti ala akoli,

1 Korente 8:8

Kobe laa ayeke sara titene e ga nduru na Nzapa pepe. Ataa e te ni pepe, e yeke girisa ye oko daa pepe, ataa e te ni, e yeke wara ye oko daa pepe.

2 Korente 5:21

Christ asara siokpari oko pepe, me Nzapa asara si siokpari ti e akiri na li ti lo. Tongaso na lege ti Christ, Nzapa asara si e ga mbirimbiri.

Galasii 5:22

Me ye so Yingo ti Nzapa ayeke du ayeke so: ndoye, ngia, siriri, kangango be, nzoni be, sarango nzoni na azo, mabe,

Filipe 2:1

Gango so ala ga oko na Christ asara si ala kpengba. Ndoye ti lo asara si be ti ala awara ngangu, ala yeke na beoko na Yingo, ala ye tere si ala yeke sara nzoni be na azo.

Filipe 3:3

E so, e yeke voro Nzapa na lege ti Yingo ti lo si e yeke gonda tere ti e ndali ti gango so e ga oko na Jésus Christ so, e laa e fâ mbirimbiri ganza; e yeke zia be ti e na ndö ti e wani pepe.

Filipe 3:9

si mbi na lo, e ga oko. Batango ndia ti ga mbirimbiri, so laa amu lege na mbi ti ga oko na Christ pepe, me mbi ga oko na Christ na lege ti mabe. Nzapa laa ayeke mu na zo lege ti gango mbirimbiri tongana zo ni ama na be.

Filipe 4:4

Ala duti na ngia lakue, ngbanga ti so ala ga oko na *Kota Gbia awe! Mbi kiri mbi tene: ala duti na ngia!

Filipe 4:7

Tongaso, fade siriri ti Nzapa so ahon hingango ndo ti azo kue ayeke bata be ti ala na yingo ti ala oko na Christ.

Kolose 1:11

Fade Nzapa ayeke sara titene ala kpengba mingi na lege ti ngangu ti lo so ayeke fa gonda ti lo. Tongaso, na ya ti aye ti ngangu kue, ala lingbi ti gbu ngangu, ala kanga be ti ala ti ku.

1 Tesalonike 1:6

Ti ala, ala sara ye tongana ti e nga tongana ti Kota Gbia; ataa so ala wara tënë ti Nzapa na ya ti pasi mingi, Yingo-Vuru azia ngia na be ti ala.

1 Tesalonike 2:12

E mu na ala wango, e sara titene be ti ala akpengba, e hunda na ala mingi titene lege ti dutingo ti ala alingbi na ti so be ti Nzapa aye, lo so lo iri ala ti li na ya ti Kodro-gbia ti lo nga na ya ti gonda ti lo.

Ahebro 13:9

Ala zia lege na ambeni zo pepe ti handa ala na lege ti afango ye ti kirikiri nde nde. Titene be ti zo awara ngangu na lege ti nzoni ye so Nzapa asara, so laa ayeke nzoni, me na lege ti kobe pepe; azo so ayeke bata andia ti kobe, ala wara nzoni ye na peko ni pepe.

1 Pierre 1:8

Ataa so ala baa lo pepe, ala ye lo; ataa so ala de ti baa lo pepe, ala ma na be na lo. Ndani laa ala yeke duti na kota ngia, ngia so ahon ndoni, zo alingbi ti tene tënë ni pepe.

2 Pierre 1:1

Mbi Simon Pierre, zo ti kua nga na *watokua ti Jésus Christ, mbi tokua mbeti so na azo so awara gi oko mabe ti kota ngere tongana e. Ala wara ni na lege ti mbirimbiri ti Jésus Christ, lo so lo yeke Nzapa ti e na Wasongo e.