Rome 1:17 - Mbeti ti Nzapa - Tënë so amu fini

¹⁷ Biani, Nzoni Tënë ni afa na le ti azo lege so Nzapa asara titene azo aga mbirimbiri na le ti lo: gi na lege ti mabe, na tongo ndani ngbii asi na ndani, tongana ti so Mbeti ti Nzapa atene: “Zo so aga mbirimbiri na lege ti mabe, fade lo yeke duti na fini.”

Rome 1:17 ပူးပေါင်းရင်းမြစ်များ

Ezekiel 18:9

Lo yeke tambula alingbi na atënë ti ndia ti mbi, lo yeke sara ye alingbi na aye so mbi fa; sarango ye ti lo alingbi na lege ti taa-tënë. Lo yeke zo ti mbirimbiri; fade lo yeke duti na fini biani. So tënë ti yanga ti Kota Gbia NZAPA laa.

Habakuk 2:4

Su tënë ni tongaso: ‘Zo so baba ahon ndö ti lo, fade lo yeke kui; me fade zo ti mbirimbiri ayeke na fini na lege ti batango tënë ti yanga ti Nzapa.’

Wungo ti azo 21:9

Moïse aleke ngbo ni na bengba wen, lo kanga ni na ndö ti keke na nduzu. Tongana ngbo ate mbeni zo si zo ni abaa ndo na mbage ti ngbo ti bengba wen ni, lo yeke kui pepe.

Jean 3:36

Zo so ama na be na Molenge ni, lo yeke na fini so angba lakue lakue; zo so ake ti ma na be na Molenge ni, fade lo yeke na fini so pepe, me ngonzo ti Nzapa angba na ndö ti lo.”

Rome 10:3

Lege so Nzapa aleke titene zo amu si lo ga mbirimbiri na le ti lo, azuife ahinga ni pepe, ala leke lege ti ala wani ti ga mbirimbiri. Tongaso ala ke lege so Nzapa aleke titene zo amu si lo ga mbirimbiri.

Rome 3:21

Me fadeso, Nzapa afa so, zo yeke ga mbirimbiri na lege ti *Ndia pepe. Ndia ti Moïse na ambeti ti awayanga-Nzapa afa tënë ni awe.

Rome 3:22

Nzapa asara si azo aga mbirimbiri na le ti lo na lege so ala ma na be na Jésus Christ. Lo sara ni ndali ti azo so kue ama na be na Christ, ngbanga ti so kangbi ayeke na popo ti ala pepe:

Rome 3:3

Nyen? So ambeni zuife ake ti bata tënë ti yanga ti lo so, so laa akanga lege na Nzapa ti bata tënë ti yanga ti lo?

Rome 9:30

Tongaso, fade e yeke tene nyen? Fadeso azo ti amara nde aga mbirimbiri na le ti Nzapa awe ndali ti so ala ma na be. Andaa titene ala ga mbirimbiri, ala gi ando lege ni pepe.

2 Korente 3:9

Tongana kua ti ndia so ayeke fâ fade ngbanga na li ti azo ayeke na gonda mingi, fade kua ti Yingo so ayeke sara si azo aga mbirimbiri na le ti Nzapa ayeke na gonda mingi ahon ndoni!

2 Korente 5:21

Christ asara siokpari oko pepe, me Nzapa asara si siokpari ti e akiri na li ti lo. Tongaso na lege ti Christ, Nzapa asara si e ga mbirimbiri.

Galasii 3:11

Tënë so ayeke taa-tënë biani: zo oko alingbi ti ga mbirimbiri pepe na le ti Nzapa na lege ti Ndia. Mbeti ti Nzapa atene: “Zo so aga mbirimbiri na le ti Nzapa na lege ti mabe, fade lo yeke duti na fini.”

Filipe 3:9

si mbi na lo, e ga oko. Batango ndia ti ga mbirimbiri, so laa amu lege na mbi ti ga oko na Christ pepe, me mbi ga oko na Christ na lege ti mabe. Nzapa laa ayeke mu na zo lege ti gango mbirimbiri tongana zo ni ama na be.

Ahebro 10:38

Nzapa atene: “Zo so aga mbirimbiri na le ti mbi na lege ti mabe, fade lo yeke duti na fini. Me tongana lo zia lege ti mabe, fade mbi yeke wara ngia na lege ti lo pepe.”