Néhémie 13:15 - Mbeti ti Nzapa - Tënë so amu fini

¹⁵ Na ngoi ni so, mbi baa so na sese ti Juda, ambeni zo ayeke pete ale ti *vinye na ya ti du so a leke ti pete ale ti vinye daa; ala yeke pete ale ti vinye ni na *lango ti wungo tere. Ambeni akanga gba ti ale ti kobe na ndö ti alele, vin, ale ti vinye, fige na ambeni ye nde nde si ala yeke gue na ni na Jérusalem na lango ti wungo tere. Mbi gboto mê ti ala na lango so ala yeke ka akungba ti ala ni.

Néhémie 13:15 ပူးပေါင်းရင်းမြစ်များ

2 Mbai 24:19

Na pekoni, KOTA GBIA atokua awayanga ti lo na popo ti azo ni ti mu wango na ala titene ala kiri na mbage ti lo; me zo oko ama tënë ti ala pepe.

Néhémie 10:31

Tongaso, e mu zendo e tene, fade e yeke mu amolenge ti e ti wali na azo ti kodro ni pepe ti ga awali ti ala. E yeke soro amolenge-wali ti azo ti kodro ni pepe ti mu na amolenge ti e ti koli.

Néhémie 10:32

Na *lango ti wungo tere, wala na mbeni lango ti matanga, tongana azo so aga na *ble, wala na akungba nde ti kango ni, fade e yeke vo ni na maboko ti ala pepe. Lakue na peko ti ngu mbarambara, fade e yeke zia sese awu tere, e yeke zi ayongo kue na li ti azo.

Néhémie 13:16

Azo ti Tir so alango na Jérusalem ayeke nga daa. Ala yeke ga na asusu na akungba nde nde ti ka ni na lango ti wungo tere na azo ti Juda nga na azo ti Jérusalem.

Néhémie 13:21

Mbi gboto mê ti ala, mbi tene: “Ngbanga ti nyen si ala lango na dawa ti gbagba ti Jérusalem? Tongana ala kiri asara ni, fade mbi yeke gbu ala!” Ti londo na ngoi ni so, ala kiri aga na ndo so na lango ti wungo tere pepe.

Néhémie 9:29

Mo mu wango na ala titene ala kiri na gbe ti *Ndia ti mo; me na lege ti kuru baba ti ala, ala ma atënë ti ndia ti mo pepe. Ala sara siokpari ti ke andia ti mo, ataa so andia ni ayeke mu fini na azo so asara ye alingbi na ni. Akotara ti e angba ti sara ngangu li, ala tomboka na tere ti mo, ala ke ti ma yanga ti mo.

Mbeti ti Job 39:12

Mo yeke zia be ti mo na ndö ti lo ti ro ale ti kobe ti mo ti zia ni na ya ti gogoro?

Abia (Psaumes) 50:7

Azo ti mbi, ala ma mbi, mbi yeke tene tënë na ala; azo ti Israel, mbi yeke bi tënë na li ti ala: mbi laa mbi yeke Nzapa, Nzapa ti ala!

Sigingo 31:12

KOTA GBIA atene na Moïse:

Sigingo 31:16

Fade azo ti Israel ayeke bata lango ti wungo so ngu na ngu. So ayeke *mbuki so ayeke ngba kpu na kpu.

Sigingo 34:21

“Fade ala yeke sara kua na ya ti lango omene, me na lango mbarambara ni, ala yeke wu tere ti ala. Ataa ayeke ngoi ti fango yaka wala ngoi ti fango ale ti kobe, ala yeke sara kua pepe.

Sigingo 35:2

‘Fade azo ayeke sara kua ti ala na ya ti lango omene, me lango mbarambara ni ayeke *lango ti wungo tere, lango so ala yeke zia nde ndali ti KOTA GBIA. Zo so ayeke sara kua na lango ni so, fade a yeke fâ lo.

Amato 28:4

Azo so azia lege ti *Ndia, ala yeke gonda azo ti sioni; me azo so abata lege ti Ndia, ala yeke kanga lege na azo ti sioni ni.

Ésaïe 58:13

*KOTA GBIA atene: “Tongana mo ke ti sara kua na *lango ti wungo tere, mo ke ti sara ye so mo lingbi ti baa nzoni na peko ni na lango so a zia nde ndali ti mbi; tongana mo iri lango ti wungo tere ‘Lango ti ngia’, mo iri *lango ti KOTA GBIA ‘Nengo lango’, tongana mo ne lango ni so, mo ke ti sara kua, mo ke ti sara ye so mo lingbi ti baa nzoni na peko ni, mo ke ti papa,

Jérémie 17:24

‘Me ti ala, ala ma mbi nzoni; so tënë ti yanga ti KOTA GBIA laa. Na lango ti wungo tere, alingbi ala hon na akungba na ayanga ti gbagba ti gbata so pepe. Ala bata lango ni so nde ndali ti mbi, ala sara nga mbeni kua na lango ni so pepe.

Jérémie 17:27

Me tongana ala ma mbi pepe, tongana ala ke ti bata lango ti wungo tere nde ndali ti mbi, tongana ala yo akungba na lango ni so si ali na ni na yanga ti gbagba ti Jérusalem, fade mbi yeke bi wâ na tere ti ayanga ti gbagba ni. Wâ ni ayeke gbi apendere da ti gbata ni si ayeke mingo pepe.’ ”

Jérémie 42:19

“Ala atanga ti azo ti Juda, KOTA GBIA atene na ala: Ala gue na Ezipte pepe! Ala ma tënë so nzoni: laso, mbi tene tënë so na ala polele!

Ezekiel 20:13

Me na benyama, azo ti Israel atomboka na tere ti mbi; ala sara ye alingbi na andia ti mbi pepe nga na lege ti asarango ye so mbi fa na ala. Andaa aye ni ayeke sara titene zo aduti na fini tongana lo sara ye alingbi na ni. Ala sara si lango ti wungo tere aga sioni ahon ndoni. Tongaso mbi tene: Mbi yeke kiri ti tuku ngonzo ti mbi ti wâ na ndö ti ala na benyama si mbi yeke fâ ala ti hunzi ala.

Amos 8:5

Ala yeke tene: “Lawa laa matanga ti fini nze ayeke hunzi si e lingbi ti ka kobe ti e so-oo? Lawa laa *lango ti wungo tere ayeke hunzi si e lingbi ti zi yanga ti ada ti kango ale ti kobe ti e so-oo? Fade e yeke pika ngbonda ti sembe ti hakango na ye, e yeke pusu ngere na nduzu, e yeke sanze kilo ti nzi azo na ni.

Mishe 6:3

lo tene: “Ala azo ti mbi, nyen laa mbi sara na ala, nyen? Ye so mbi sara si awoko ngangu ti ala so ayeke nyen? Ala kiri tënë na mbi!

Awatokua 2:40

Pierre atene ambeni tënë mingi, lo mu wango na ala titene tënë ni ali be ti ala si amu ngangu na be ti ala; lo tene: “Azo ti fadeso ayeke asioni zo; ayeke nzoni ala sigigi na popo ti ala si ala soo kuâ.”

Awatokua 20:21

Mbi iri azuife na azo ti amara nde titene ala zia ngbene lege ti sarango ye ti ala, ala kiri na Nzapa si ala ma na be na Kota Gbia ti e Jésus.

Galasii 5:3

Mbi kiri ti tene polele na zo so kue ayeda titene a fâ lo na ganza, mbi tene: alingbi lo sara ye alingbi na *Ndia kue.

Efeze 4:17

Tongaso, na iri ti *Kota Gbia, mbi yeke tene tënë so biani na ala: ala kiri asara ye tongana ti azo ti amara nde pepe, ngbanga ti so atënë ti be ti azo ti amara nde ayeke buba ye.

Ndia ti fani use ni 8:19

Tongana be ti ala agirisa na KOTA GBIA Nzapa ti ala, tongana ala mu peko ti ambeni nzapa nde, tongana ala voro anzapa ni so, tongana ala kuku na gbe ti ala, mbi tene na ala laso biani: fade ala yeke kui kue.

1 Tesalonike 4:6

Na ya ti tënë so, ayeke nzoni zo oko asara mbeni ye ti songo be wala ye ti kirikiri na mba ti lo pepe. E tene tënë so na ala awe, e gboto mê ti ala na ndö ni awe: azo so asara mara ti asioni ye tongaso, fade Kota Gbia ayeke zia peko ni angba senge pepe.