Néhémie 12:43 - Mbeti ti Nzapa - Tënë so amu fini

⁴³ Na lango ni so, azo amu gba ti *sandaga na Nzapa, ala sara ngia mingi. Biani, Nzapa asara si be ti azo ti lo asi singo na kota ngia. Na Jérusalem, awali na amolenge asara nga ngia mingi si a ma ngia ni na mbeni ndo yongoro.

Néhémie 12:43 ပူးပေါင်းရင်းမြစ်များ

2 Mbai 20:13

Azo ti Juda kue aluti na dawa ti KOTA GBIA, ala na awali ti ala na amolenge ti ala.

2 Mbai 20:27

Azo ti Juda kue na azo ti Jérusalem alondo ti kiri na Jérusalem na ngia, ngbanga ti so KOTA GBIA azia kota ngia na be ti ala na lege so lo kinda awato ti ala. Yosafat ayeke na li ti tambula ni.

2 Mbai 7:10

Na pekoni, na lango baleuse na ota ti nze mbarambara ni, gbia azia lege na azo ti kiri na da ti ala. Na kiringo ti ala, tere ti ala anzere, be ti ala gi na ngia ndali ti nzoni so KOTA GBIA asara lani na David, na Salomon nga na azo ti Israel, azo ti lo.

Esdras 3:13

Lege titene a hinga go ti azo so ayeke toto na ti azo so ayeke dekongo na ngia ayeke daa pepe, ngbanga ti so azo kue ayeke dekongo ngangu si a yeke ma go ti ala yongoro mingi.

Néhémie 12:27

So ala hunzi ti leke gbagba ti Jérusalem awe, a tokua titene a iri azo ti mara ti Lévi so ayeke lango na ando nde nde ti ga na Jérusalem ti sara matanga ti ziango gbagba ti gbata ni nde ndali ti Nzapa. Ala sara matanga ni na ngia, na lege ti abia ti sepelango Nzapa, na lege ti pikango ngo, akota kundi na akete kundi.

Néhémie 12:42

Ambeni wayango-sandaga ni ayeke Maaseya, Shemaya, Elazar, Uzi, Yohanan, Malkia, Elam na Ezer. Azo ti hengo bia ayeke he bia ngangu si Izrahia laa ayeke baa ndo na ndö ti ala.

Mbeti ti Job 34:29

Me tongana Nzapa akanga maboko aduti, zo wa laa ayeke fâ ngbanga na li ti lo? Tongana lo honde le ti lo, zo wa laa alingbi ti baa lo, zo wa? Andaa lo yeke bata kodro nga na azo.

Abia (Psaumes) 27:6

Ti fadeso, mbi yeke tambula gi na baba na le ti awato ti mbi so angoro mbi. Na ya ti kota da ti KOTA GBIA, mbi yeke dekongo na ngia si mbi yeke ya na lo asandaga. Fade mbi yeke pika mozoko ti gonda na lo si mbi yeke he bia ti yamba na lo.

Abia (Psaumes) 28:7

KOTA GBIA ayeke tongana gbagba ti bira na tere ti mbi; lo yeke tongana *vala ti mbi. Mbi zia be ti mbi kue na ndö ti lo si lo mu maboko na mbi. Be ti mbi kue asi singo na ngia si mbi yeke he bia ti gonda na lo.

Abia (Psaumes) 9:2

*KOTA GBIA, mbi yeke mu singila na mo na be ti mbi kue; mbi yeke tene tënë ti akota ye so kue mo sara.

Abia (Psaumes) 92:4

Ayeke nzoni ala he bia ni na lege ti ye ti mozoko ti kamba baleoko nga na pikango kota kundi na kete kundi.

Ésaïe 61:3

Ala yeke na mua ndali ti *Sion, me Nzapa atokua mbi ti zia na li ti ala ye ti pendere na plase ti mburu ti wâ; ti kpaka na tere ti ala mafuta so afa ngia ti ala, me afa mua pepe; ti yu na ala bongo ti matanga na plase ti be so awoko. Tongaso, a yeke haka ala na akeke so afa mbirimbiri ti Nzapa, a yeke haka ala na yaka so afa gonda ti KOTA GBIA.

Jérémie 31:13

Tongaso, fade amaseka-wali ayeke dodo na ngia, amaseka-koli na ambakoro ayeke sara legeoko tongaso. Mbi yeke sara si mawa ti ala aga ngia, mbi yeke de be ti ala. Na peko ti vundu ti ala, mbi yeke sara si ala duti na ngia.

Jérémie 33:11

bia ti azo so tere ti ala anzere, bia ti azo so ayeke na ngia, bia ti akoli na awali so amu tere fini ni. A yeke ma nga bia ti azo so ayeke ga na *sandaga ti mungo singila na ya ti kota da ti KOTA GBIA, atene: ‘Ala mu singila na KOTA GBIA so ayeke na ndö ti dunia kue, ngbanga ti so lo yeke nzoni, nzoni be ti lo angba kpu na kpu!’ Biani, fade mbi yeke sara titene kodro so akiri na kozo ndo ti lo”; tënë so KOTA GBIA atene laa.

Wungo ti azo 10:10

Na lango ti sarango amatanga ti ala nga na amatanga ti ala ti fini nze, ala yeke huru atatalita ni na ndembe so ala yeke mu *asandaga ti ala so ayeke gbi ni kue na wâ nga na asandaga ti beoko. Na lege ti ye so, fade mbi yeke dabe ti mbi na ala. Mbi laa mbi yeke KOTA GBIA Nzapa ti ala.”

Matthieu 21:15

So akota wayango-sandaga na awafango-ndia abaa aye ti kpene so Jésus asara si ala baa nga amolenge so ayeke dekongo na ya ti kota da ti Nzapa, atene: “E gonda Molenge ti David”, be ti ala aso.

Matthieu 21:9

Azo so ayeke tambula na dawa ti Jésus na ala so ayeke tambula na peko ti lo ayeke dekongo, atene: “E gonda Molenge ti David! Ayeke nzoni Nzapa asara tufa na ndö ti lo so aga na iri ti Kota Gbia! E gonda Nzapa so ayeke na yayu kâ na ndö ti aye kue!”

Jean 16:22

Ye so ayeke si na ala fadeso ayeke tongaso: fade ala yeke na vundu, me na pekoni, mbi yeke kiri ti ga ti baa ala si be ti ala akiri asi na ngia. Mara ti ngia so, zo oko alingbi ti zi ni na be ti ala pepe.

Efeze 5:19

Tongana ala bongbi, ala he abia ti Mbeti ti Nzapa, abia ti gondango Nzapa na abia so Yingo ayeke mu na ala. Ala he abia si ala sepela Kota Gbia na be ti ala kue.

Jacques 5:13

Mbeni zo na popo ti ala ayeke baa pasi? Alingbi lo sambela Nzapa. Mbeni zo ayeke na ngia? Alingbi lo he bia ti gonda Nzapa.

1 Samuel 4:5

Gi so sanduku ti mbuki ti KOTA GBIA asi na ya ti bâbâ ni awe, azo ti Israel kue adekongo ngangu si sese ayingi.