Malashii 2:17 - Mbeti ti Nzapa - Tënë so amu fini

¹⁷ Ala woko KOTA GBIA na atënë ti ala. Ala hunda ndo, atene: “Atënë ti nyen laa e woko lo na ni?” Ala woko lo na lege ti tënë so ala yeke tene: “Zo so asara ye ti sioni, lo laa lo yeke nzoni zo na le ti KOTA GBIA. Mara ti azo tongaso laa be ti KOTA GBIA anzere na ala”; wala ala yeke tene: “Nzapa so ayeke fâ ngbanga mbirimbiri so ayeke na ndo wa?”

Malashii 2:17 ပူးပေါင်းရင်းမြစ်များ

Mbeti ti Job 34:17

Tongana Nzapa ake fade ye so ayeke mbirimbiri, ka lo lingbi ti le-gbia? Nzapa ayeke mbirimbiri, lo so ngangu ti lo ahon kue. Mo kpa ti fâ ngbanga na li ti lo?

Mbeti ti Job 34:36

Lo yeke tene tënë tongana zo ti sioni. Nilaa, alingbi a gi nda ti tënë ti lo mbirimbiri si.

Mbeti ti Job 36:17

Me a fâ ngbanga na li ti mo tongana ti zo ti sioni; ngbanga so a de na li ti mo ayeke sanze pepe.

Mbeti ti Job 9:24

Tongana a zia sese na maboko ti azo ti sarango sioni, Nzapa ayeke kanga le ti awafango-ngbanga ni. Tongana lo laa lo sara pepe, zo wa laa asara?

Zo ti bongbingo azo 8:11

Zo so asara sioni, a yeke fâ ngbanga na li ti lo hio pepe. Ndani laa azo ayeke na nzara ti sara sioni.

Ésaïe 1:14

Amatanga ti fini nze ti ala na amatanga nde nde, mbi ke ni na be oko. Amatanga ni aga kungba na ndö ti mbi; mbi woko na yongo ni awe.

Ésaïe 29:15

So mawa na azo so ayeke sara ye na gbe mingo si ala yeke honde apialo ti ala na *KOTA GBIA so! Ala yeke sara aye ti ala na ya ti vukongo ndo, ala yeke tene: “Zo wa laa abaa e, zo wa? Zo wa laa ahinga ye so e sara, zo wa?”

Ésaïe 30:18

Me *KOTA GBIA ayeke ku mbeni ngoi ti sara nzoni be na ala, lo yeke londo ti baa mawa ti ala. Biani, KOTA GBIA ayeke Nzapa ti mbirimbiri. Ti ala nzoni, azo so kue azia be ti ala na ndö ti lo!

Ésaïe 43:22

*KOTA GBIA atene: “Israel, mbi laa mo iri mbi pepe; me mo Jacob, be ti mo awoko na mbi awe.

Ésaïe 43:24

Ndali ti mbi laa mo vo pere ti yombo ti kota ngere so pepe, ndali ti mbi laa mo zö mafuta ti anyama ti mo titene ya ti mbi asi na ni pepe. Me na lege ti siokpari ti mo, mo gbu mbi ti ga ngbaa ti mo; mo woko mbi na lege ti asioni ti mo.

Ésaïe 7:13

Tongaso Ésaïe atene: “Ala *ahale ti David, ala ma mbi si! So ala ngba ti so li ti azo so, alingbi na ala pepe si ala ye ti so li ti Nzapa ti mbi so?

Jérémie 12:1

*KOTA GBIA, mo yeke mbirimbiri ahon ndoni, mbi lingbi ti dekite na mo pepe; me mbi ye ti hunda na mo tënë na ndö ti alege ti fango ngbanga ti mo: Ngbanga ti nyen si gigi ti azo ti sioni ayeke ga nzoni so? Ngbanga ti nyen si azo so ake tënë ti mo ayeke duti ti ala kpoo so?

Jérémie 15:6

So tënë ti yanga ti KOTA GBIA laa: Mo laa mo zia mbi, mo zia peko ti mo na mbi. Nilaa mbi yoro maboko ti mbi ti fâ mo. Mbi baa mawa ti mo alingbi awe.

Jérémie 17:15

Azo ayeke tene na mbi: “Tënë ti KOTA GBIA ni ague na ndo wa? Ayeke nzoni tënë ni asi, e baa ma!”

Jérémie 44:22

KOTA GBIA akanga be ti lo gbaa na asioni sarango ye ti ala nga na asioni sarango ye ti ala so zo alingbi ti baa na le ti lo fani use pepe so. Ndani laa kodro ti ala aga ndo ti gba ti atêne, aga ngonda si zo ayeke daa mbeni pepe, aga tapande ndali ti azo so ayeke deba amba ti ala; ye ni laa a yeke baa ni laso so.

Ezekiel 16:43

Ye so mbi sara na mo na ndembe so mo de maseka, mo dabe ti mo na ni pepe; mo kiri mo so be ti mbi na sarango aye ti mo. Tongaso, mbi nga, mbi yeke sara titene futa ti sarango ye ti mo ati na li ti mo wani! So tënë ti yanga ti mbi, Kota Gbia NZAPA laa. Mo sara sioni ye so zo alingbi ti baa na le ti lo fani use pepe. Na ndö ni, mo sara aye ti potopoto pepe?”

Ezekiel 18:25

Me ala yeke tene: ‘Sarango ye ti KOTA GBIA ayeke na legeni pepe!’ Ala azo ti Israel, ala ma tënë so nzoni: Mbi laa sarango ye ti mbi ayeke na legeni pepe? Wala ala laa sarango ye ti ala ayeke na legeni pepe?

Ezekiel 8:12

Nzapa atene na mbi: “Molenge ti zo, ye so akangba ti Israel ayeke sara na gbe mingo so, mo baa ni na le ti mo awe-aa? Zo oko oko ayeke na ndo ti vorongo nzapa ti lo na ya ti kubu ti lo. Ala yeke tene: ‘KOTA GBIA alingbi ti baa e oko pepe; lo do kodro ni, lo zia awe!’ ”

Ezekiel 9:9

KOTA GBIA akiri tënë na mbi, atene: “Sioni ti azo ti Israel na ti azo ti Juda ayeke kota ahon ndoni; mene asi singo na ya ti kodro ni, sarango ngangu na azo asi singo na ya ti gbata ni. Biani, azo ni ayeke tene: ‘KOTA GBIA ado kodro ni azia awe, lo lingbi ti baa e oko pepe.’

Amos 2:13

“Fade mbi yeke nika ala tongana ti so pusu so ayo nengo gba ti kobe ayeke nika sese na hongo ti lo.

Sofonii 1:12

Na ngoi ni so, fade mbi yeke mu lamba ti gi ndo na ya ti gbata ti Jérusalem; mbi yeke ga na tere ti azo so ayeke duti senge senge na ndö ti mosoro ti ala so; ala yeke tene na be ti ala, atene: ‘KOTA GBIA alingbi ti sara mbeni ye oko pepe, ataa nzoni ye wala sioni ye!’

Malashii 2:14

Ala hunda ndo, atene: “Ye tongaso asi ngbanga ti nyen?” – Asi ngbanga ti ye tongaso: Na dawa ti KOTA GBIA laa zo oko oko amu tere na wali ti lo ti maseka; wali ni ayeke mba ti lo, lo na wali ni aga oko na lege ti *mbuki so ayeke na popo ti ala. Me zo ni abuba lege ti mbuki ni na wali ni awe!

Malashii 3:8

Mbi kiri tënë na ala, mbi tene: Zo alingbi ti nzi Nzapa? Me ti ala, ala yeke nzi mbi! Ala hunda ndo, atene: ‘E nzi mo na nyen?’ Ala nzi mbi na ya ti *adime nga na ya ti aye nde nde so ala yeke mu na mbi.

Ndia ti fani use ni 32:4

Nzapa ayeke Kota Têne ti batango e. Aye so kue lo sara ayeke nzoni kue, lege ti sarango aye ti lo kue ayeke mbirimbiri. Lo yeke Nzapa so ayeke sara ye alingbi na tënë ti yanga ti lo, lo yeke sara ye ti kirikiri pepe, lo yeke lakue mbirimbiri, lo yeke fâ ngbanga na legeni.

1 Samuel 2:3

Ala azo, ala ngba ti diko atënë ti baba ti ala pepe; ala zia atënë ti mbana so ayeke sigigi na yanga ti ala. KOTA GBIA ayeke Nzapa so ahinga ye kue; lo laa lo yeke fâ ngbanga ti aye so kue azo ayeke sara.