Nzoni Tënë so Luc asu na mbeti 20:20 - Mbeti ti Nzapa - Tënë so amu fini

²⁰ Ala to nda ti *bembe ndo na tere ti Jésus. Ndani laa ala tokua ambeni zo na lo so asara tere ti ala tongana anzoni zo. Azo ni ague ti hunda lo na mbeni tënë titene na lege ti tënë ti yanga ti lo wani, lo ti na ya ti gbanda ti ala. Ala ye ti wara lege ti gbu lo ti zia lo na maboko ti akota zo ti kodro nga na govoronere.

Nzoni Tënë so Luc asu na mbeti 20:20 ပူးပေါင်းရင်းမြစ်များ

2 Samuel 14:2

Nilaa lo tokua azo na gbata ti Tekoa ti iri mbeni wali ti ndara. Lo tene na wali ni, lo tene: “Fade mo sara ye tongana zo so ayeke na mua; yu abongo ti mua, zia yombo na tere ti mo pepe. Mo sara ye tongana mbeni wali so ayeke na mua aninga awe.

Abia (Psaumes) 38:12

Azo so mbi na ala e ye tere na azo so mbi na ala e yeke fono lakue, ala ga nduru na mbi pepe ndali ti aka ti mbi; a-ita ti mbi aluti yongoro na tere ti mbi.

Abia (Psaumes) 66:3

Ala tene na Nzapa, atene: “Aye so mo sara ayeke zia mbeto na be ti zo! Ndali ti kota ngangu ti mo, awato ti mo ayeke woko tere ti ala na gbe ti mo.

Abia (Psaumes) 81:15

ka mbi kinda gi hio tongaso awato ti ala, ka mbi pika azo ti sarango ngangu na ala so awe!

Jérémie 11:19

Ti mbi, mbi yeke tongana molenge ti taba so a yeke gue na lo na ndo ti fango anyama. Mbi hinga pepe mbi tene, sioni mayere ti ala so ayeke ndali ti mbi. Ala tene: “E buba keke ni na ngangu ni kue! E zi lo na popo ti azo so ayeke na fini, e sara si zo oko akiri adabe na iri ti lo pepe!”

Jérémie 18:18

Tongaso azo ni atene: “Ala ga, e leke tënë na tere ti Jérémie. Awayango-sandaga ayeke daa, fade ala yeke ngba ti fa na e atënë ti ndia. Azo ti ndara ayeke daa, fade ala yeke mu na e awango senge. Awayanga-Nzapa atia pepe, fade ala yeke tene na e peko ti atënë ti yanga ti Nzapa senge. Ala ga, e tene asioni tënë ti buba iri ti Jérémie. Atënë so asigigi na yanga ti lo so, e dingi mê ti e ti ma ni oko pepe.”

Jérémie 20:10

Mbi yeke ma gi sioni tënë ti gba ti azo. Ala yeke di iri ti mbi: “Mbeto-mbage-na-mbage-kue”. Ambeni ayeke tene: “Ala gue na lo na ngbanga ma!” Ambeni ayeke tene ti ala: “Een, e yeke gue na lo!” Ataa amba ti mbi so mbi na ala e ye tere mingi, ala yeke ku ti baa wala mbi yeke girisa lege. Ala yeke tene na be ti ala, atene: “Tongana lo ti fade na ya ti handa ti lo wani, ka anzere mingi. Tongaso si fade e gbu lo si e kiri na lo peko ti sioni so lo sara na e”.

Daniel 6:4

Daniel ahon tanga ti agbenyogbia use so na amakonzi ni kue, ngbanga ti so hingango ndo ti lo ahon ti azo kue. Nilaa gbia aleke na be ti lo ti zia lo titene lo baa ndo na ndö ti kodro ni kue.

Matthieu 27:2

Ala kanga lo, ague na lo si ala zia lo na maboko ti govoronere Pilate.

Marc 3:2

Le ti azo ni ayeke gi na tere ti Jésus; ala yeke ku ti baa wala lo yeke kai kobela ti koli so na *lango ti wungo tere titene ala wara mbeni tënë ti bi na li ti lo.

Nzoni Tënë so Luc asu na mbeti 11:54

ala ye ti sara si lo ti na ya ti gbanda ti ala gi na lege ti mbeni tënë ti yanga ti lo.

Nzoni Tënë so Luc asu na mbeti 20:21

Ala hunda lo, atene: “Wafango-ye, e hinga so mo yeke tene tënë si mo yeke fa ye gi na legeni mbirimbiri; mo yeke mu mbage ti zo oko pepe, me mo yeke fa mbirimbiri lege ti sarango ye so Nzapa aye.

Nzoni Tënë so Luc asu na mbeti 20:26

Tongaso ala wara tënë na yanga ti lo pepe ti gbu lo ndali ni na le ti azo ni. Li ti ala kue akpe ndali ti tënë so lo kiri na ni na ala so si ala zi yanga oko pepe.

2 Pierre 2:3

Ndali ti nzara ti nginza, azo so ayeke handa ala ti te ala na lege ti atënë ti mvene. Me ti azo ni, aninga mingi so ngbanga ti ala alondo awe, ngbanga so aga nduru ti ti na ndö ti ala: kpale so ayeke mingo ala ade yongoro pepe.